ဧဇရမှတ်စာ
နိဒါန်း
ဧဇရမှတ်စာသည် ရာဇဝင်ချုပ်ကျမ်းများ၏အဆက်အဖြစ်ဖြင့် ပြည်နှင်ဒဏ်သင့်သူယုဒအမျိုးသားအချို့ ဗာဗုလုန်နိုင်ငံမှနေရင်းတိုင်းပြည်သို့ပြန်လည်ရောက်ရှိလာပုံနှင့် ယေရုရှလင်မြို့သည်လူတို့နေထိုင်ရာအရပ်ဖြစ်ပြန်လျက် ၎င်းမြို့တွင်ဘုရားဝတ်ပြုကိုးကွယ်မှုကိုပြန်လည်အစပြုပုံကိုဖော်ပြသည်။ ဤအဖြစ်အပျက်များကို အောက်ပါအတိုင်းတင်ပြထားသည်။ (၁) ပေရသိဧကရာဇ်ကုရု၏အမိန့်အရ ပြည်နှင်ဒဏ်သင့်သူယုဒအမျိုးသားများထဲမှ ပထမတစ်စုသည်ဗာဗုလုန်နိုင်ငံမှပြန်လာကြသည်။ (၂) ယေရုရှလင်မြို့တွင် ဗိမာန်တော်ကိုပြန်လည်တည်ဆောက်၍ဆက်ကပ်ပြီးလျှင် ဘုရားသခင်အားဝတ်ပြုကိုးကွယ်မှုကိုပြန်လည်အစပြုကြသည်။ (၃) နှစ်ပေါင်းများစွာကြာပြီးနောက် ဘုရားသခင်၏ပညတ်တရားတော်၌ကျွမ်းကျင်သူဧဇရခေါင်းဆောင်၍ ပြည်နှင်ဒဏ်သင့်သူယုဒအမျိုးသားနောက်တစ်စုသည် ယေရုရှလင်မြို့သို့ပြန်လာကြသည်။ ဧဇရသည် ဣသရေလအမျိုးသားတို့၏ဘုရားဝတ်ပြုကိုးကွယ်မှုအမွေအနှစ်ကိုထိန်းသိမ်းရန် ဘာသာရေးနှင့်လူမှုရေးကျင့်ဝတ်များကိုပြန်လည်ဖော်ထုတ်ပေးသည်။
အကြောင်းအရာအကျဉ်းချုပ်
ပြည်နှင်ဒဏ်သင့်သူယုဒအမျိုးသားများ
ပထမတစ်စုပြန်လာကြခြင်း ၁:၁-၂:၇၀
ဗိမာန်တော်ကိုပြန်လည်တည်ဆောက်၍ဆက်ကပ်ခြင်း ၃:၁-၆:၂၂
ဧဇရသည်အခြားသောပြည်နှင်ဒဏ်သင့်သူများနှင့်ပြန်လာခြင်း ၇:၁-၁၀:၄၄
ယုဒအမျိုးသားတို့အားမိမိတို့ပြည်သို့ပြန်ကြရန်ကုရုမင်းအမိန့်ထုတ်ခြင်း
၁
၁ ပေရသိဘုရင်ကုရုသည်ဧကရာဇ် မင်းအဖြစ်နန်းစံပထမနှစ်၌ထာဝရဘုရားသည် သူ၏စိတ်ကိုနှိုးဆော်တော်မူသဖြင့် အင်ပါယာနိုင်ငံတစ်လျှောက်လုံးတွင်ကြေညာရန်အမိန့်စာထုတ်ပြန်တော်မူ၏။ ဤသို့ပြုတော်မူသည်မှာပရောဖက်ယေရမိအားဖြင့် ထာဝရဘုရားပေးတော်မူသည့်ဗျာဒိတ်တော်နှင့်အညီ ဖြစ်ပျက်လာစေရန်ပင်ဖြစ်ပေသည်။
၂ ထိုအမိန့်တော်တွင် ဤကားပေရသိပြည်ကုရုမင်း၏အမိန့်တော်ဖြစ်သည်။ ကောင်းကင်ဘုံရှင်ဘုရားသခင်ထာဝရဘုရားသည် ငါ့အားကမ္ဘာတစ်ဝှမ်းလုံးကိုအစိုးရစေတော်မူ၍ ယုဒပြည်ယေရုရှလင်မြို့၌ဗိမာန်တော်ကိုတည်ဆောက်ရန် တာဝန်ကိုငါ့အားပေးအပ်တော်မူလေပြီ။-
၃ ထာဝရဘုရားသည် မိမိလူမျိုးတော်ဝင်ဖြစ်သူတို့နှင့်အတူရှိတော်မူပါစေသတည်း။ သင်တို့သည်ယုဒပြည်ယေရုရှလင်မြို့သို့သွားရောက်၍ ထိုမြို့တွင်ကိုးကွယ်ဝတ်ပြုသည့်ဘုရားတည်းဟူသော ဣသရေလအမျိုးသားတို့၏ဘုရားသခင်ထာဝရဘုရားအတွက် ဗိမာန်တော်ကိုပြန်လည်တည်ဆောက်ကြရမည်။-
၄ အကယ်၍ပြည်နှင်ဒဏ်သင့်လျက်ရှိသည့် ကိုယ်တော်၏လူမျိုးတော်ဝင်ပြန်သွားရန်အတွက် အကူအညီလိုပါကသူတို့၏ပတ်ဝန်းကျင်ရှိလူတို့က ကူညီရကြမည်။ သူတို့သည် ရွှေ၊ ငွေ၊ ရိက္ခာ၊ ဝန်တင်တိရစ္ဆာန်များအပြင် ယေရုရှလင်မြို့ရှိဘုရားသခင်၏ဗိမာန်တော်အတွက် အလှူဒါနများကိုပေးရကြမည်'' ဟုပါရှိသတည်း။
၅ ထိုအခါယုဒနှင့် ဗင်္ယာမိန်အနွယ်ဝင်သားချင်းစုခေါင်းဆောင်များ၊ ယဇ်ပုရောဟိတ်များ၊ လေဝိအနွယ်ဝင်များနှင့် မိမိတို့စိတ်နှလုံးကိုဘုရားသခင်ပြင်ဆင်တော်မူခြင်းခံကြရသူအပေါင်းတို့သည် ယေရုရှလင်မြို့သို့သွားရောက်၍ ထာဝရဘုရား၏ဗိမာန်တော်ကိုပြန်လည်တည်ဆောက်ရန်အသင့်ပြင်ဆင်ကြကုန်၏။-
၆ ထိုသူတို့ပတ်ဝန်းကျင်ရှိလူတို့သည် သူတို့အားငွေထည်၊ ရွှေ၊ ရိက္ခာ၊ ဝန်တင်တိရစ္ဆာန်၊ အခြားအဖိုးထိုက်ပစ္စည်းများနှင့်ဗိမာန်တော်အတွက် အလှူဒါနများကိုပေးအပ်ကူညီကြလေသည်။
၇ သူတို့အားကုရုမင်းသည် ယေရုရှလင်မြို့မှ နေဗုခဒ်နေဇာမင်းသိမ်းယူ၍ မိမိ၏ဘုရားတို့ဗိမာန်တွင်ထားရှိခဲ့သည့်ဖလားများကိုပေးအပ်တော်မူ၏။-
၈ မင်းကြီးသည်ထိုဖလားတို့ကိုရွှေတိုက်စိုးမိသရေဒတ်သို့ပေးအပ်၍ မိသရေဒတ်သည်ယင်းတို့ကိုယုဒဘုရင်ခံရှေရှဗာဇာသို့၊-
၉-၁၀ အောက်ပါအတိုင်းစာရင်းပြုလုပ်ပေးအပ်လေသည်။ ပူဇော်သကာများထည့်ရန်ရွှေဖလား ၃၀
| ပူဇော်သကာများထည့်ရန်ငွေဖလား | ၁၀၀၀ |
| အခြားဖလား | ၂၉ |
| ရွှေဖလားအငယ် | ၃၀ |
| ငွေဖလားအငယ် | ၄၁၀ |
| အခြားအသုံးအဆောင်များ | ၁၀၀၀ |
၁၁ ရှေရှဗာဇာသည်ပြည်နှင်ဒဏ်သင့်သူများနှင့်အတူ ဗာဗုလုန်ပြည်မှယေရုရှလင်မြို့သို့ပြန်သောအခါ ရွှေဖလား၊ ငွေဖလားနှင့်အခြားပစ္စည်းအသုံးအဆောင်အရေအတွက် စုစုပေါင်းငါးထောင့်လေးရာတို့ကိုယူဆောင်ခဲ့၏။