3
इजीकीएलमी कागज जशो
1 मिनु मेकोमी आं कली “ए मुर, मेको इ ङोंइती बाक्शो ओल्शो कागज जावो। मिनु लशा इस्राएल आ खिं ङा मुर आन कली लोव़ पावो” देंत। येरमीया १५:१६; येरमीया १:९; प्रकाश १०:९-११
2 मोपतीके गो आं शोव़ पाक्ता। मिनु मेकोमी मेको ओल्शो कागज आं कली जचा गेती।
3 मिनु मेकोमी आं कली “ए मुर, आं गेशो ओल्शो कागज जावो। मिनु इ कोव़ज प्रिंदो” देंत। मोपतीके गो मेको जाता। मिनु मेको आं शोव़म खुदो खोदेंशो पा जिज दुम्त। भजन संग्रह ११९:१०३
4 मिनु मेकोमी आं कली “ए मुर, इस्राएली आन खिं लावो। मिनु मेको आन कली आं देंशो लोव़ नेल्ल नेंपाइक्मी।
5 मारदे हना गो इ कली मतुइक्चा ङा नु मरुप्चा ङा लोव़ ब्वाक्ब मुर आन बाक्तीक मसोइक्तन। तन्न इस्राएली आन खिं ङा मुर आन बाक्तीक सोइक्ताक्न।
6 गो इ कली मतुइक्चा ङा नु मरुप्चा ङा लोव़ ब्वाक्ब मुर आन दातेमी, मरुप्ब लोव़ पाइब मुर आन बाक्तीक मसोइक्तन। गो इ कली मोदेंशो मुर आन बाक्तीके सोइश्शो नङ हना, मेकोपुकीम इ लोव़ नेनेम वा।
7 तन्न इस्राएली आन खिं ङा मुरुम इ लोव़ मनेंनीम। मारदे हना मेकोपुकीम आं लोव़ नेंचा मदाक्नीम। इस्राएली आन खिं ङा मुर नेल्ले काइ मटीब नु खकटा थुं पाइश्शो बाक्नीम।
8 गो इ कुल मेको आन कुल क्येङा बोल्यो सेल्ता। इ थुं मेको आन थुं क्येङा बोल्यो सेल्ता। यसैया ५०:७; येरमीया १:१८
9 गो इ थुं बोल्यो फुल्लु क्येङा बोल्यो चकमक खोदेंशो सेल्ता। गे मेको आन क्येङा महिनो। मेको आन कोव़शोम ग्येत्थ लुक्च मदुमो। मारदे हना मेको मटीब आन खिं ङा मुर बाक्नीम” देंत।
10 मिनु मेकोम आं कली “ए मुर, गो इ कली देंशो लोव़ नेल्ल इ थुंम वोतो। मिनु नेनो।
11 मिनु मेको ग्याइश्शा लाइक्चा पुंइसीशो इ मुर आन बाक्तीक लावो। मिनु मेको आन कली लोव़ पावो। ‘परमप्रभु यावेमी इन कली लोव़ पाप्तु’ देनो। मेकोपुकीम नेन्मेक्ल कि मनेन्मेक्ल” देंत। इजीकीएल २:५,७
इजीकीएल खाल पाइब दुम्शो
इजीकीएल ३३:१-९
12 मिनु परमप्रभु यावे आ सोक्तीम आं कली इर क्युक्ती। मिनु गो “परमप्रभु यावे आ छेङछेङ ठेयब बाक्ब” देंशो नेंता। मिनु गो आं नोले गे ठेयब रेयके पशो नेंता। इजीकीएल १:२८
13 मेको रेयके सोक्त पाइश्शो आन फ्रां थिमुशो रेयके मेको आन नेक्था ङा गुगील रे ग्रूशो रेयके नु ख्रिनु कुशो रेयके बाक्त।
14 मिनु सोक्तीम आं कली क्युक्शा लाइक्ती। मिनु गो कशो थुं दुम्शा, गाइश्शा लती। मेना परमप्रभु यावे आ बोल्यो गुइम आं कली दिप्ती।
15 मिनु गो मेको केबार खोला आ नेक्था बाक्ब रागी रे ग्याइश्शा लाइक्चा पुंइसीशो आन बाक्तीक तेल-अबीब सहरम जाक्ती। मिनु गो ७ नाक्ती सम्म मेको आन दातेम ब्रिथ्री बाक्ती।
16 मिनु ७ नाक्त नोले परमप्रभु यावेमी आं कली लोव़ पाप्तु।
17 मार लोव़ पाप्तु देंशा हना “ए मुर, गो इ कली इस्राएली आन खिं ङा मुर आन कली खाल पाइब सेल्तन। गे आं देंशो लोव़ नेंतीवी हना, मेको आन कली आं लोव़ रे पा हिंच कोंइदीमी। इजीकीएल ३३:७; यसैया ५२:८; हिब्रू १३:१७
18 मिनु गो आं अरेशो लोव़ मटीब मुर का कली ‘गे थमा पा इ मटितीके आ पर्बम बेक्नेवे’ दे माइक्नुङ। मिनु गे मेको कली ब्रोंइचा कली हिंच मकोंइताक्वी हना, मेको आं अरेशो मटीब आ मरिम्शो पशो आ पर्बम बेक्ब। मेको मुर आ हुश आ क्येक्क इ रे पा ताक्नुङ। इजीकीएल १४:१०
19 तन्न गे मेको आं अरेशो लोव़ मटीब मुर कली हिंच कोंइताक्वी हना, नु मेको मुर आं अरेशो लोव़ मपतीक रे मलेत्त हना, मेको आं अरेशो मटिशो नु आ मरिम्शो पशो आ पर्बम बेक्ब। तन्न गे ब्रोंइनेवे।
20 मिनु ठीक पाइब मुर काम आ ठीक पतीक रे लेश्शा मरिम्शो पाप्तु हना, गो मेको आ ङोंइती दाइल पाइक्तीक फुल्लु वोइक्ता हना, मेको बेक्ब। गे मेको कली हिंच मकोंइतीके, मेको आ पापम पतीके बेक्ब। मेको आ ङोंइती ठीक पशो मारेइ ममिम्सीब। मिनु गो मेको आ हुश आ क्येक्क इ रे पा ताक्नुङ। इजीकीएल १८:२४
21 तन्न गे मेको ठीक पाइब मुर कली ‘पाप मपावो’ दे हिंच कोंइताक्वी हना नु मेकोमी पाप मपाप्तु हना, मेको थमा पा ब्रोंइब। मारदे हना मेकोम हिंच कोंइशो टिशो बाक्ब। मिनु गे ब्रोंइनेवे” देंत।
22 मेना परमप्रभु यावे आ गुइम आं कली थिती। मेकोमी आं कली “बोक्को, बेंसीम लावो। मिनु गो मेकेर गे नु लोव़ पाइनुङ” देंत। इजीकीएल १:३
23 मोपतीके गो बोक्शा बेंसीम लती। मिनु गो केबार खोला आ नेक्थाम तशो परमप्रभु यावे आ छेङछेङ मेकेर यो बाक्त। मिनु गो खुम्की पा बाप्ती। इजीकीएल १:२८
24 मिनु सोक्त आं थुंम ओव़त। मिनु मेकोम आं कली राप्पाइक्ती। मिनु आं कली लोव़ पा “लावो, इ खिं लशा, लाप्चो चोक्शा बाक्को। इजीकीएल २:२
25 ए मुर, मेकोपुकीम इ कली डोरीम फ्रेंनीम। मिनु गे फ्रेंचा पुंइसीशा, मुर आन दातेम लचा मताइनेवे।
26 मिनु गो इ लें इ कुंकुम खोक्पाइक्नुङ। मिनु गे मब्वाक्ब दुम्शा, मेको आन कली हुइक्ने मचाप्नेवे। मारदे हना मेकोपुकी मटीब आन खिं ङा मुर बाक्नीम।
27 तन्न गो, गे नु लोव़ पङानु, इ कली ब्वाक्ने चाप्ब सेल्नन। मिनु गे मेको आन कली ‘परमप्रभु, परमप्रभु यावेमी इन कली लोव़ पाइब। नेंने दाक्बम नेन्मेक्ल। नेंने मदाक्बमी मनेन्मेक्ल’ देनो। मारदे हना मेकोपुकी मटीब मुर आन खिं ङा मुर बाक्नीम” देंत।