1-2 Dutun te ike-21 he andew te sunud he vulan, midsuǥù te Nengazen is ebpeneuven din he si Haggai he keǥiya zin heini ziyà te ki Zerubabel, ki Josue, wey ziyà te zuma pa he menge Israilihanen he nemen-ulì diyà te Israel: 3 Ke sikandin te, “Hentei keniyu is nekaahà dengan te kekempet kayi te valey te Nengazen? Ne hengkey is ked-ehè niw kayi ǥuntaan emun idhindeg duen te nehuna? Siguradu he minus is ked-ehè niw kayi? 4 Piru mebpekelig-en kew! Terebehuwa niw is baley ku su eduma a keniyu, is Nengazen he Mekeǥeǥehem. 5 Iyan daan heini impenaad ku zengan diyà te menge kepuun niw hein migawas sikandan diyà te Ehipto. Ne ǥuntaan is Mulin-ulin ku, ne kemulu pa ziyà te keniyu, umbe kenè kew mahandek.

6 “Iyan a, is Nengazen he Mekeǥeǥehem, is migkaǥi he edhuyungen ku te kesevaha is langit wey is kelibutan, is tanà wey is daǥat. 7 Edhuyungen ku is langun he nasyun ne ed-uwiten dan kayi te valey ku is menge ketiǥeyunan dan, umbe egkepenù heini is baley ku te mahalen he menge azen. 8 Egkehimu heini su is menge pelata wey menge vulawan, ne kediey man. 9 Egkehimu he edhuna pa he mekempet heini is beǥu he valey te Nengazen kenà duen te nehuna. Ne ibeǥey ku is meupiya he kebpekesavuk kayi he lugar. Iyan a, is Nengazen he Mekeǥeǥehem, is migkaǥi kayi.”

10 Duen migkaǥi te Nengazen diyà te ki Haggai hein ike-24 he andew te ikesiyam he vulan, dutun te ikezuwa he tuig te kedhadì ni Darius. 11 Ke sikandin te, “Insai nu is menge memumuhat ke hengkey is migkaǥi ziyà te kesuǥuan bahin kayi. 12 Penenglitan, ed-uwit is sevaha he etew te usa he impemuhat diyà te Megbevayà he midtenges din te kumbalè din. Ne zutun nekezegkit haazà is bisti ziyà te supas, etawa linutù he keenen, binu, lana, etawa minsan hengkey he kelasi te keenen. Egkeipiktuwan be te kegkesegradu zutun te tinenges haazà he menge keenen?” Ne hein mid-insaan ni Haggai is menge memumuhat ne iyan tavak dan is, “Kenà.” 13 Ne mid-insà si Haggai te, “Ne emun iyan nekezegkit kayi he menge keenen is etew he mid-isip he meremerik su nekesamsam sikandin te minatey, egkehimu ve he meremerik heini he menge keenen?” Ne midtavak is menge memumuhat te, “Uya!” 14 Ne migkaǥi si Haggai te, “Iring daan keniyan is menge etew te Israel, migkaǥi is Nengazen. Geina te meremerik dan dengan tenged te salà, is minsan hengkey he ebeelan dan wey ibpemuhat dan diyà te pemuhatà, ne meremerik diyà te etuvangan te Nengazen. 15 Puun guntaan, is-isipa niw is kebpekesavuk niw hein wazè niw pa puuni is kebangun te valey ku. 16 Dutun te nehuna, emun edhendiyè kew te midtembuan te menge trigu he ebperateng kew he ebpekekuwa kew te 20 he takes, ne 10 dà he takes is egkekuwa niw. Ne emun edhendiyè kew te keresà te paras is ebperateng he ebpekekuwa te 50 he galun he vinu, ne 20 zà is egkekuwa niw. 17 Midèdeetan te Nengazen is menge pinemula niw pinaaǥi te meinit he keramag, erat, wey kebpeuzan te ǥiyew he henduen be te menge vatu, piru wazè kew gihapun medlikù diyà te kandin, migkaǥi is Nengazen. 18 Ike-24 guntaan he andew te ikesiyam he vulan, ne ǥuntaan nepasad sikan is pundasyun duen te valey te Nengazen. Ne peninimè kew en ke hengkey is egkehitavù puun guntaan. 19 Minsan wazè en nesamà he trigu, wey wazè en beǥas te paras wey menge kayu he higus, pumigranata, wey ulibu, ne puun guntaan edtuvazan kew te Nengazen.”

20 Mid-uman megkaǥi is Nengazen diyà te ki Haggai zutun mismu he andew. 21 Ke sikandin te, “Keǥiyi nu si Zerubabel he meǥaan ku en edhuyungen is langit wey is kelibutan. 22 Edèdeetan ku is menge ginhedian ne id-awè ku is gehem dan. Eberiudsungen ku is menge kerwahi zan wey is ebpemen-untud kayi. Ebpemematey is menge kudà ne ed-uuney ebpehimhimetayà is menge pereuntud kayi. 23 Keǥiyi nu zaan si Zerubabel he suluǥuen ku he edhimuwen ku sikandin he ibpezumala zutun he andew. Edumala sikandin pinaaǥi te keǥehem ku, su iyan sikandin pinilì ku. Iyan a, is Nengazen he Mekeǥeǥehem, is migkaǥi kayi.”