Yuhanis surat mesa la
1
Yuhanis dul deng Yesus Kristus
1 Auk dul surat ni deng Ama Lamtua Allah in Teka-teka man Kil in Nuli ka.
In Teka-teka man Kil in Nuli nia, muik meman son lolo apan-kloma ki in dadi kua. Halas ni au, nol auk tapang ngias, net Un nini kaim matan esan son. Kaim ming Un nini kaim hngilan esan son. Nol kaim kon huud Una, nini kaim iman nias esan son. Kaim net Un ela,
2 undeng hmunan nua, Un daad nol Un Ama ka, mo halas ni Un maa tulu-balang Un apa ka se kaim hlala ki son. Tiata kaim brain tek mi noan, taon elol le halin atuli li haup in nuil toma, man hidi nutus taan lo ka. Ta Un nia mo, in Teka-teka man Kil in Nuli.
3 Kaim le tek mi deng totoang asa man kaim in net son nas, nol totoang asa man kaim in ming son nas, le halin mi dalen mes nol kami. Ta kit totoang butu-kil nol Ama Lamtua Allah, nol Un Ana Yesus Kristus, man Un belen maa son na.
4 Tiata kaim dul surat nia, le halin tao mi dalen kolo. Nini ela lam, kaim kon dalen kolo taplaeng.
Atuil in parsai ngas musti nulis se langa ka dalen
5 In tui man Yesus tek kamin son na, kaim le tek mian, elia: Ama Lamtua Allah na mo banan isi. Un muik in daat bubuit lo kon. Ta Un na mo banansila el langa in kaloe ka, man muik mitang bubuit lo kon.
6 Eta kit aa noan, “Kit nuil dalen mes nol Ama Lamtua,” molota kit in nuli ki tao sa-saa daat sii nabale lam, na banansila el kit nuling ne mitang dalen. Lole kit aa nole-lilung, nol nuil muid lalan in tom lo ka.
7 Mo eta kit nuil muid lalan in toma ka lam, kit banansila el atuil man in nuil ne Ama Lamtua Allah langa ka dalen. Nini ela, kit haup in nuil dalen mes nol apa. Nol kit dalen ni daid niu, undeng Ama Lamtua Allah Ana Yesus mate, hidim Un dala ka kose soleng kit in kula-sala ngas totoang son.
Atuil in nuil se langa dalen na, nuil tao kula pait lo
8 Eta kit aa noan, “Kit tao kula lo” kam, kit nole kit apan ni esa son na, nol taan asa man in toma ka lo.
9 Mo eta kit hao kit in kula-sala ngas sam, Ama Lamtua Allah nam mo dalen na lolo, tiata taon elola ko, Un tao muid Un in hida ka, le kose soleng kit in kula-sala ngas, nol tao niu kit dalen nia.
10 Eta kit aa noan, “Kit tao kula net lo” kam, na kit tao Ama Lamtua Allah daid atuil in nole-lilung son! Lole Un tek son noan, totoang atuli li tao kula-sala. Tiata eta kit aa ela lam, langa son noan, Un in Teka-teka ngas muik ne kit dalen ni lo.