8
Lamtua Yesus nalo atuli lihu aat
(Matius 15:32-39)
1-3 Oe mesan na pait, muik atuli mamo maas nakbua le hii-ming se Yesus. Oen muid Un lelo tiul son, tiata oen muik in kaa lo son. Kon Yesus haman Un ima-ii las, le tekas noan, “Auk namnau atuil hut mamo nias son. Tenga las maas deng maan katang. Oen maas nakbua lelo tiul son. Tiata oen muik in kaa lo son. Banan dui ka, oen pait nol tain blo deken. Ta lo kam, eta hmatu nalas sam, oen leas se lalan nua.”
4 Yesus ima-ii las siut noan, “Papa. Maan ni katang deng ingu las son. Tiata kit bel nal atuil hut mamo nias in kaa lo!”
5 Mo Yesus keket oen noan, “Mi muik ruti ila la?”
Oen situn noan, “Papa, kaim pesang ruti suma bua iut siis.”
6 Hidi kon Yesus tadu atuli las totoang le daad se dale ka. Kon Un kat ruti bua iut nas, le nodan mamo se Ama Lamtua Allah. Hidim Un bilas-bilas ruti nas, le beles laok se Un ima-ii las. Kon oen laok bating bel atuli las totoang.
7 Oen kon muik ikan dehe. Tiata Yesus nodan mamo se Ama Lamtua Allah taung ikan nas. Hidim Un tadu Un ima-ii las, le laok bating ikan nas bel atuli las pait.
8-9 Oen totoang atuli lihu aat. Oen kaa didiin silis. Kaa hidi kon, Yesus ima-ii las laok kat nakbua in kaa lisin nas, inu popos itu. Hidi na lam, Yesus tadu atuli las totoang pait.
10 Oen pait hidi totoang son kon, Yesus nol Un ima-ii las, saek lakos lui dapas, le lakos se mana mesa, ngala Dalmanuta.
Atuil Farisi las le tao nahu Lamtua Yesus
(Matius 16:1-4)
11 Nikit Yesus nol Un ima-ii las lakos lius se Dalmanutas kon, muik atuli at ila lo deng partei agama Farisi, maas tutnaal nol Una. Oen keket-ketan nol Una, le noan tao nahu Una. Oen nodan Un noan, “Papa! Tulu bel kaim taad herang, le halin daid tada noan, meman Ku haup kuasa deng Ama Lamtua Allah.”
12 Kon Yesus pel hngasa ka le tekas noan, “Eta Auk ming mi in aa ela kam, Auk maingasar! Tasao le mi nodan taad herang ela lia? Mi talalun! Taad herang meman muki, mo Auk kom in tulu bel mia lo.”
13 Hidi nam, Yesus nang soleng one, le lako sake pait se lui dapa, leo-leo nol Un ima-ii las. Kon oen pait bus el tubu halin nua.
Lamtua Yesus tui noan, doha-doh nol atuil Farisi las
(Matius 16:5-12)
14 Yesus nol Un ima-ii las lakos lius se tubu hlala halas-sam, Un ima-ii las nangan net noan, oen nadidingun in kil ruti taung in kaa se lalan. Oen suma kil ruti bua mes sii.
15 Kon Yesus tekas noan, “Mi musti doha-doha! Boel tom lahing Herodes sa nol atuil Farisi las in tui dadaat ta deken. Oen in tui ka, banansila el bibit ruti man atuli li kutang nol tarigu le tao hus ruti ka.”
16 Ming Un aa ela kon, Un ima-ii las nangan tanan lo. Tiata oen aa nol apa noan, “Blalan na aa saa na le? Bet Un aa ela, lole kit kil ruti lo kam.”
17 Mo Yesus taan oen in nangan na. Tiata Un tekas noan, “Tasao le mi suma taan in aa deng ruti sii kia! Mi daek haup Auk in teka ki lo ke? Meman mi ngengom baktetebes!
18 Mi ngat net nol mi matan nas esan son, mo taan un nahin na loo kia! Hnika ka noan mi net lo! Mi ming nol mi hngilan nas esan son, mo mi nangan tanan lo nabale. Hnika ka le mi ming lo! Mi nadidingun
19 ruti bua lim man, Auk bilas-bilas le nalo atuli lihu lima ka le? Leol neot na, mi kat nakbuan ruti lisin nas fuli bakun ne?”
Oen situn noan, “Fuli hngul dua, Papa.”
20 Yesus keket oen pait noan, “Mi nangan net neot na, Auk bilas-bilas ruti bua iut le nalo atuli lihu aat ta nabale tam? Mi kat nakbuan ruti lisin nas popos ila le?”
Oen situn noan, “Popos itu Papa!”
21 Kon Yesus tekas noan, “Meman baktebes! Mi net nol matan esan son, mo tasao le mi taan Auk in kuasa ki deng ol maa ka lo nabale lia?”
Lamtua Yesus tao banan atuling tedo mes se Betsaida
22 Hidi deng maan na, Yesus nol ima-ii las lakos lius se iung Betsaidas. Lius se luas kon, atuli las pel nol atuling tedo mes laok bel Yesus. Oen nodan le Yesus huud atuling tedo na, halin un banan.
23 Tiata Yesus pel atuling tedo na se ima ka, le nolan lako se ingu la likun na. Un puut kapen laok se atuling na mata ka, hidim kapas atuling na mata ka, le keket noan, “Elola? Ku ngat net son ne?”
24 Atuling na nikit sila ka, le ngat kliu-kanan, hidim siut noan, “Hao! Auk ngat net atuli las lako. Mo ngat tam hbabut nabale banansila el kai ina ngas man lako!”
25 Tiata Yesus tapa Un ima ka pait lako se atuling na mata ka. Kon atuling na ngat soba-naan pait tam, un mata ka banan baktetebes son. Un ngat net nol langa son.
26 Kon Yesus tadu atuling na le pait, hidim hidan noan, “Ku pait tia, mo muid lalan didang! Pait lako Betsaida deken tia.”
Petrus tek noan, Yesus nam baktetebes Kristus, Atuling man Ama Lamtua Allah in tulu meman son, deng lolo hmunan nua ka
(Matius 16:13-20; Lukas 9:18-21)
27 Hidi na kon, Yesus nol atuil in muid Una ngas laok papmes ingu-iung in se Kaisarea Filipi ngas. Se lalan hlala kam, Yesus keket oen noan, “Eta muding atuli las in nahdehe kam, oen tek noan Auk niam mo asii la?”
28 Oen situn noan, “Tenga las tek noan, ‘Yuhanis in Sarain Atuli ka.’ Nol tengas tek noan, ‘Upung Elia’, Ama Lamtua Allah mee-baah lolo hmunan nua ka. Mo tenga las pait tam, tek noan, Paap niam, at mes deng Ama Lamtua Allah mee-baah hmuna-hmunan nuas.”
29 Kon Yesus keket pait noan, “Mo muid mia lam, Auk niam mo asii la?”
Petrus situn noan, “Paap niam mo Kristus! Man Ama Lamtua Allah tulu meman son, deng lolo hmunan nua ka.”
30 Mo Yesus kaing oen noan, “Mi boel tek atuil deken ne!”
Lamtua Yesus in tek laih hmunan deng Un in haup susa-daat, nol Un in mate ka
(Matius 16:21-28; Lukas 9:22-27)
31 Hidi deng na kon, Yesus tek Un ima-ii las noan, “Auk niam, Atuling Baktetebes sa. Nesang lo kam, Auk haup in susa-daat mamo, undeng blalan hadat tas, nol tulu agama las tene-tenen nas, nol guru agama las totoang hutun soleng Au. Mam oen keo tele Au. Mo bingin dua ka lam, Auk nuling pait.”
32 Yesus tek langa-langa ela, kon Petrus pel nodat Un deng atuil hut mamo kas le kaing noan, “Papa boel aa ela deken! Auk nang oen le iman saek Paap lo.”
33 Mo Petrus in aa ela ka, muid Ama Lamtua in koma ka lo. Kon Yesus bali lis le ngat Un ima-ii tenga las. Hidim Un kaing Petrus mumuun noan, “Hoe! Ku in aa na, uikjale kas laih tuan na in aa! Laok norat tobo-dolan nia! Ku suma nangan atuli li in koma tuun, mo nangan Ama Lamtua Allah in koma ka lo!”
34 Hidi kon, Yesus haman atuil tenga las le maa nakbuan nol Un ima-ii las. Hidim Un tui oen noan, “Asii man kom le muid Au lam, un musti tahang, le muid Auk lelo-lelon! Un musti nadidingun soleng un in koma-koma ngas, le muid se Ama Lamtua Allah in koma ka sii. Atuli le keo un kon no, un musti muid napiut tuun, banansila el atuli haal un kai sangsuli la, le laok mate.
35 Ta atuil in suma nuli taung un apa ka sii, mam un in nuli ka ilang tuun ela! Mo atuil man tade le mate, undeng un in muid Au, tamlom undeng un in bani-bating Ama Lamtua lalan in nuli ka ka, mam un haup in nuli napiut nol Ama Lamtua.
36 Hii ke! Eta ku haup apan-kloma ki isin ni totoang, mo Ama Lamtua Allah hutun soleng ku lam, ku in ontong ngi saa la?
37 Ku kat lai-niin apan-kloma ki isin ni totoang kon, bisa seda nal ku hmangim ma lo!
38 Nangan ne! Halas ni atuil apan-kloma ki in daat ta bili-ngala. Oen toe muid Ama Lamtua lo. Tiata eta asii mae in muid Au, tamlom mae in kil Auk in tui ngas sam, mam Auk kon mae in hao un se Ama Lamtua Allah sila-mata ka. Ta Au, Atuling Baktetebes sia, mam Auk pait maang deng sorgang. Nol Ama Lamtua ima-ii in deng sorga ngas kon maas leo-leo nol Au. Kaim niu maang deng sorgang nini Auk Amang nga in kuasa man loe-liliman na, halas-sam atuli li taan noan, Auk niam mo asii.