4
Oen todan-lahing Ama Lamtua Allah se sorga
1 Atuling Baktetebes sa tek hidi Un in hida ka bel jemaat iut nas kon, Ama Lamtua tulu-balang bel auk dais didang deeh pait. Nahkiut tuun nam, auk net hnita mes holsai se sorga. Hidim auk ming pait atuling man fala ka muun na el klingu ka, tek noan, “Maa! Saek maa se ni tia, le Auk tulu bel ku totoang in mam le dadi ngas.”
2 Nol na kon, Ama Lamtua Koo la nikit nol auk lakong sorgang. Nahkitu lam auk ngat net del in prenta mesa, man muik in daad se dapa.
3 Un kaloen na kunis kai klehen nol mea, banansila el baut kaloen man osa isi, man oen noken noanyaspis nolsardius sa. Depan mes kon pukiu Un del in prenta ka. Un in kaloe ka, kunis kai klehen banansila el baut kaloen in ngaal zamrud ta.
4 Se na kon muik del ana 24 pukiu del in prenta man se hlala ka ka. Muik tulu 24 man daad se del nas dapas. Oen totoang pake kai-baut muti nol lotong hlotong lahi man daken deng lil-mea.
5 Muik bisain kaloe puit deng del in prenta man se hlala ka ka, nol lelat ulan nas dukun tene le tupang apa. Obor iut kon kaloe se del in prenta ka in salo ka, banansila el Ama Lamtua Koo in muik hngasa itu ka.
6 Se del in prenta ka in salo ka, auk ngat net hnika ka el tasi man niu-hilin el kaca ka.
Hidim auk ngat net hmukit in muun isi iut dil pukiu del na. Oen apa, sila-klupun nas inu nol mata si-sii. Oen nam lii-lau Ama Lamtua.
7 Hmukit hmunan na sila ka el singa ka. Nomer dua la sila ka el aus-sapi ka. Nomer tilu la sila ka el atuli ka. Nol nomer aat ta sila ka el lape ka.
8 Hmukit at nas mesa-mesam muik dilan eneng. Se dilang nas likun na, nol dalen nas kon, inu nol mata si-sii. Duman-lelo lam, oen tao dain tutungus, hidi nutus taan lo, le tek noan,
“Kaim naka-nahalit Ama Lamtua Allah!
Kaim nikit sakeng Lamtua ngala ka lapa-lapa!
Lamtua na mo, niu isi!
Lamtua in kuasa ka, muun isi.
Lamtua man muik lo-lolo hmunan hesa kua.
Lamtua muik ne halas nia.
Nol Lamtua man muik tutungus didiin hidi nutus taan lo!”
9 Oen tao dain ela le naka nol todan Ama Lamtua Allah, hidim nodan mamo se Una, undeng Un man daad ne del in prenta ka dapa, nol Un man muik tutungus didiin hidi nutus taan lo. Oras oen in tao dani ka,
10 tulu 24 tas senet le hai bukun nas se Ama Lamtua Allah silaꞌ, man daad se del in prenta ka dapa. Oen kolong oen hlotong in prenta ngas, hidim nenes laok se Un del in prenta ka in salo ka, le todan-lahing Una, man muik tutungus hidi nutus taan lo. Hidim oen naka-naka Un noan,
11 “Ee Lamtua Allah!
Kaim naka-naka Lamtua!
Kaim nikit sakeng Ama Lamtua ngala ka lapa-lapa.
Lamtua nia mo, kaim Tuang!
Lamtua nia mo, kaim Lamtuan Allah!
Lamtua haup in naka deng kami lam, toma.
Meman Lamtua man musti sium in todan-lahing deng kami.
Undeng Lamtua in kuasa ka tene isi.
Nol Lamtua in muun-tes sa muun dui hihidi.
Lamtua man koet totoang sa-saa lias.
Lamtua man beles totoang in nuli.
Totoang nias dadis,
undeng Lamtua man koet.
Totoang nias nulis,
muik hngasan, undeng Lamtua man beles.”