Yakobus
Horok Lirna La'an
Man hi'i horok eniyeni, Yakobus. Ri man wakuku la rauroin Horok Lap enihe pene'ek nahenia Yakobus eni Makromod Yesus mo'oniwalla man karuri (Mat. 13:55; Gal. 1:19). Yakobus eni namwali man panulu lolo Yerusalem nin kerei raramne (HN. 21:18; Gal. 2:9). Lere onne an hi'i horok eni aku laa Israel nin luhu-luhu idaweli woro'o man aiyedi noho wawan na'akeme me'e (1:1), maa Yakobus lirneni namwali lira man wa'an ri na'akeme lese haenhi.
Lolo horok eni, Yakobus konohi ika agame ma namlolo lolo Makromod Lalap kalarna (1:27). Ai na'aheni, “Lo'o ik ka'aheni ik akin naili'il Makromod Lalap, maa kak hi'i wewhe lernohi Nin honorok aki, onneni nin panaeku ik akin ka naili'il kokkoo, de kan min haida” (2:14-26). Horok eniyeni nin nounaku nammori aile man paku ika lolo iknik popono orereki akilere.
Horok Ihin
1. Yakobus nala wanakunu man hari horok eni (1:1).
2. Ai nala wanakunu ma na'ono akin ma namkene naili'il noro woroin ma nano wawan (1:2-8).
3. Ai nala wanakunu ma na'ono ma na'alehe naulinu noro man karu (1:9-11).
4. Ai nala wanakunu ma na'ono kenene panatal noro man ken patal (1:12-18).
5. An hopon ik derne kakani Makromod Lalap la hi'i wewhe Nin konomdere (1:19-27).
6. An hopon ika yon ka'ili kaloho ri (2:1-13).
7. Ai nala wanakunu ma na'ono ik akin ma naili'il noro iknik hini'i wenewhe man wa'an (2:14-26).
8. Ai nala wanakunu ma na'ono ri Kristen nuran wonohirn namal panaitne (3:1-18).
9. Ai nala wanakunu ma na'ono ri Kristen noro noho wawan (4:1-5:6).
10. Ai nala nounaku man horu (5:7-20).
1
1 I wal'u na'ahoru, mi ri Yahudi ma namwali Israel nin luhu idaweli woro'o man aiyedi a'am lehern me'e, ya'u eni, Yakobus. Ya amwali Makromod Lalap Nin hophopon wahwahan man ilitolle Makromod Yesus Kristus Nin honowok. Ainu'u tape masi rakanala ki mi na'ahoru.
Yon ik akin sus lere ik lernala wewerek pananaka
2 I wal'u na'ahoruwedi. Lere ik lernala wewerek pananaka warna-warna, yon ik akin sus, maa wa'an rehi ik akin nahuwa'an mamani,
3 ono ik kauroin lo'o ik akin ka nado'o lolo iknik wewerek pananaka, ik akin eren narururi lernohi Makromod Lalap mamani.
4 Lo'o ik akin ka nado'o hehen nanumene wewerek pananaka onne horu, Makromod Lalap nala ha man kukuku noknokor maika leke kamwali ri ma namlolo ma akin namkene mamani.
5 Lo'o i wal'uhe ka mauroin lolo kalla ewi ma namlolo, mapanak Makromod Lalap leke Ai nala woroin ki mi. Na'amoli Ai nala honorok aki man wa'an ki mi, ono ik Makromod raram nodi paku ri na'akeme lernohi Nin aki man mou eni, la Ai ka na'ahan ri ma napanak eni.
6 Enimaa ma napanak onne nodi akin naili'il kokkoo, ono lo'o ik akin nado'odo'o, onne naise wo'o man anna huu laa ki laa mai.
7 Ri onne yon pene'ek Makromod Lalap walha nin lir napanak ma naisa onne,
8 ono ai akin woro'o de ka namkene lolo nin hini'i wenewhe na'akeme.
Orkanaru noro ri ma na'alehe naulinu
9 I wal'u ma na'alehe naulinu man lernohi Yesus enihe, yon mi akim sus ono mi ma'alehe haida-haida, maa mahuwa'anedi mi akim ono Makromod Lalap kikanedi mi mamwali Nin ri me'e.
10 Enla mi Kristen man karu, mahuwa'anedi mi akim ono mi ma'adeul ma'atanedi mi akim me'e leke akim naili'il Yesus Kristus. Mi noro idewe minim kanaru na'akeme penia maisa audipi man lere eni aile, maa oreki moluwedi me'e.
11 Lere eni audipi onne ma'aruru, maa rakan lere manha, namlau la nadiyauredi, de kan ma'aruru me'e. Namnenehe noro ri man karu, lerida ai mahan na'olu nin hahaa, maa namlilinnohi an maki me'e.
Lere ika lernala kenene panatal ma nodi ik kadiyaur dohohala, pu'ik heli mehe Yesus
12 Ri man kerhu wewerek pananaka, akin nahuwa'anedi, ono ri man kerhu hehen nanumene wewerek pananaka onne horu, an kokala mahmaha kolkoli ma namwali or'ori dardari man Makromod Lalap nouwedi nala ri na'akeme ma naramyaka Ai.
13 Lere ik lernala kenene panatal ma nodi ika hi'i dohohala, yono ka'aheni, “Makromod Lalap ken patal ika,” ono onne ka namlolo. Ha man ailanna ka nodi molollo ken patal Makromod Lalap leke hi'i yaksala, la Makromod Lalap kan ken patal ri leke hi'i yaksala,
14 maa ri ma nadiyaur kenene panatal, nin monmono kamanna ma aile irhun raramne penia napi'u nawa'u ai de nakoko hi'i yakyak salsala.
15 Lo'o ik lernohi monmono kamanna ma aile ik irhun raramne onneni, ik kadiyauredi dohohala me'e. Enla lo'o dohohala na'a'aredi ik irhun raramne, onne nodi ika laa makimaki me'e.
16 Ende, I walin man ya aramyak enihe, yono hurinohi panaeku ma na'aheni, “Makromod ken patal maya'u,” mehem wukupoho mi.
17 Ha na'akeme man wa'an la ma namlolo ik kokala nano ik Amad. Makromod Lalap hi'iyedi ha man ropropo na'akeme lolo a'am me'e, la ha ropropo onne lalaa mamai de herherre mamani, maa Ai penia kar herre. Ai namkene nala Nin wawa'an rara'e maika mamani.
18 Ai mehen hi'i kenekrohu konohi Lirna Wawan ma namloleni maika la nala morimori worworu maika lolo Lirna onne haenhi. An hi'i onne leke ik kamwali ananhe ma na'ono narehi Nin hini'i na'akemeni.
Yon derne Lirna Wawan mehe, maa hi'i wewhe haenhi
19 I walin man ya aramyaka enihe, horhorok ainu'u nounaku enie. Yon ika pelek wakunu la yon pelek ka'ahan, maa kahehe leke ik kamkene derne,
20 ono ri man pelek na'ahan kan hi'i ha ma namlolo ma nahuwa'an Makromod Lalap akin.
21 Ende sopoledi iknik hini'i wenewhe man diwar dawar noro ailanna na'akeme man ik kadedem hi'i wewhe! Mai kodi honorok aki ma kan holi kukulu lalap, leke kokala Makromod Lalap Lirna man kamanedi ik akin me'e, ono Lirna Wawan onne penia nodi molollo huri we'eredi ika nano dohohala nin molollo.
22 Yono ik derne mehe kakani mehe Makromod Lirna Wawan eni, maa hi'i wewhe lernohi inhawa man Makromod Lalap na'ahehenie! Lo'o ik kakani mehe, maa kak hi'i wewhe, ik mehe wukupohedi ik kemen me'e.
23 Ri man derne Makromod Lalap Lirna Wawan, maa kan hi'i wewhe lernohie, namnenehe noro ri man koklolo oin makan lolo kokaka oi,
24 maa nala'a ne, idewe hamlinuwedi oin makan me'e.
25 Ende wa'an rehi ik koklolo ka'inau Kristus Nin keneri hono'ok ma namlolo wake'eni, la hi'i wewhe mamani. Nina keneri hono'ok onne penia nodi molollo huri we'er ika nano dohohala. Yon ik derne Nin keneri hono'ok la idewe hamlinu, maa ik hi'i wewhe haenhi. Makromod Lalap namre'e namharu ri man hi'i wewhe onne na'akeme.
Agame ma namlolo lolo ik Makromod kalarna
26 Yono hi'i nahenia ri aile ma nampe'el laa kerei, maa ka nadiyaka nuran wonohirn namal panaitne. Ri onne mehen wukupohedi kemen me'e, la nina lalaa kerei onne kan min haida.
27 Agame ma namlolo kokkoo lolo ik Amad Makromod Lalap kalarna, onne ik karamyaka la paku tatana ana'a re'e noro re'eyaka walumyaka ma na'alehe naulinu. Enla kadiyak ik kemen leke yono noho wawan nin honorok panaeku man ailanna nano'onyaka ika.