Roma
Horok Lirna La'an
Nonolu kota Roma namwali kota lalapa ma na'ono lolo hair Italia. Lere onne hair Italia nin rai lalap wekel Kaisar la ai nodi molollo hair-hair namehin nammori nano kota Roma onne haenhi. Paulus nin panaeku hi'i horok eniyeni wakuku agame Kristen nin panaeku ma na'ono laa ri Kristen man minle Roma. An hi'i horok eni ono ai kan lernala leken laa Roma makun.
Ik lese panaeku ma na'ono wake'e lolo horok eni lolo lisir eniyeni: Lir Wawa'an onne kukunohi maika hi'ihehewi Makromod Lalap hi'i ri na'akeme ma akin naili'il Ai ramwali ri molololo Ai leken kalarna. Onne naise Horok Lape Lirna ma na'aheni, “Ri ma akin naili'il Makromod Lalap, ai onne namwali ri molololo Ai kalarna, de lernala morimori ma namlolo.” Onne namwali ono hi akin naili'il Makromod Lalap mehe, kalla namehin kaale (1:17)!
Lolo horok eniyeni Paulus wakuku heheni: Kade ik ken hi'i wewehe Musa nin keneri hono'ok mamani, maa ik ka kamwali ri molololo Makromod Lalap kalarna, ono ri kaale man paekunala hi'i wewhe Musa nin keneri hono'ok na'akeme leke namwali ri molololo (3:27-28; 4:15). Makromod Lalap Nala Nin rere'e haharu maika, de hi'i ika koro Ai kahuwa'an wali'ur lolo Yesus Kristus man huri we'er ik nano dohohale nin hunukum eni, la ka napanak wanalhane ida (3:24-25; 5:8). Ende lo'o ik akin naili'il Yesus, Makromod Lalap huri we'er ika nano iknik dohohala nin hunukum, la An nou nahenia ik kamwali ri molololo Ai leken kalarna (3:22, 26; 4:24-25).
Paulus horok Makromod Lalap Nin panaeku ma na'ono ri Yahudi haenhi (pnk. 9-11). Nonolu ri nadedem wekel hi ri Yahudi, ri Israel, noro idewe Israel upun ananhe. Ri Yahudi enihe ramwali Abraham upun ananhe, la Abraham eni Makromod Lalap nili leke namre'e namharue, la hi'i ai namwali hair man lap, la nala ai upun ananhe nammori. Yesus eni namwali Abraham upun anan, maa ri Yahudi nammori ra'okuledi Ai. Ler onne ri aile ma nauroin nahenia lo'o Makromod Lalap hamlinuwedi Nin ri Yahudi onne. Paulus na'aheni ri Yahudi nammori ra'okuledi Yesus ono ramhene derne rakani Ai (10:1-4). Ai na'aheni, ‘Namlolo hir hi'i sala, ono akinhe ka naili'il Yesus, maa rir sala onne nakoko ri ma ka namwali Yahudi lernala leken ramwali Makromod Lalap Nin ri’ (11:11-15, 30-31). Panaeku eniyeni na'akeme horokedi lolo Horok Lap raram nano nonolu (9:25-29; 10:19-21). Makromod Lalap Nin panaeku lere li'ur huri we'er ri Israel na'akeme nano rir dohohala nin hunukum (11:26).
Lere Paulus hi'i horok eni ai kan laa Roma makun. Kade an ken laa enne rew'ira, maa panaeku aile man kawala, de an hi'i lir napanak leke anna onne an lernala leken laa ka'arala hi (1:10-13; 15:22-29).
Horok Ihin
1. Paulus nala wanakunu man hari horok eni (1:1-15).
2. Paulus nala wanakuku ma na'ono lolo horok eni (1:16-17).
3. Ri morimori na'akeme sala lolo Makromod Lalap kalarna (1:18-3:20).
4. Paulus kukul kalla ma namlolo leke ik kamwali ri molololo Makromod Lalap kalarna (3:21-5:21).
5. Paulus na'aheni ik koro Yesus kamwali mahaku, de ik kahinuriyedi nano dohohala nin molollo (pnk. 6), ik kahinuriyedi nano keneri hono'ok nin molollo (pnk. 7), la Roh Kudus nala morimori worworu maika (pnk. 8).
6. Paulus konohi hi'ihepe ri Yahudi heruwali ka ramwali Makromod Lalap Nin ri (pnk. 9-11).
7. Paulus konohi hini'i wenewhe man wa'an ri Kristen hi'ie (12:1-15:13).
8. Paulus wakunu nin honowok nodi Lira Wawa'an loikaru ri ma ka namwali Yahudi noro nin panaeku ki ka'ar manin Roma (15:14-33).
9. Paulus nala wanakunu tape masi noro nounaku man horu (pnk. 16).
1
Paulus nala hiyene arore ri man minle Roma
1 I walin man minle Roma na'ahoruwedi, ya'u eni Paulus, man hi'i horok eniyeni, la ya amwali Yesus Kristus Nina hophopon wahwahan. Makromod Lalap mehe nili ya amwali man loikaru Lirna Wawa'an eni, la Lirna onne
2 An nouwedi nano nonolu me'e. Lere nonolu onne, An hopon Nina nabi-nabi horok Lirna Wawa'an onne lolo Horok Lap man moumou dewdewe raram.
3 Lirna Wawa'an onne na'ono Makromod Lalap Anan, ik Makromod Yesus Kristus. Enla lere Yesus mai noho wawan eni, kemen namwali ri mormori, ono namwali rai Daud upun anan.
4 Onne kan mehe, maa Makromod Lalap na'amori wali'ur Yesus nano Nin makmaki, de onne namwali tanada ma naruri wake'e nahenia Yesus onne Ai Anan mememen, de An moumou dewdewe namnenehe Aman.
5 Makromod Lalap namre'e namharu ya'u, ono Yesus kukul ya amwali Nin hophopon wahwahan ma nodi Lirna Wawa'an eni loikaru ri ma ka namwali Yahudi na'akeme. An hopon ya'u wakuku hi, leke hi akin naili'il ik Makromod Yesus, penia derne rakani la ra'akulu ra'alap Ai Naran.
6 Makromod Lalap napoluwedi mi man minle Roma eni, leke mamwali Yesus Kristus Nin ri haenhi.
7 Onne penia ya'u hi'i horok eni maiyala ki mi ma akin naili'il Yesus man minle Roma eni. Makromod Lalap naramyaka mi la niliyedi mi mamwali Nin ri me'e. Ya apanak na'amolia ik Amad Makromod Lalap noro Makromod Yesus Kristus rala rere'e haharu noro wawa'an rara'a ki mi.
Paulus raram nodi nala'a Roma
8 Dedesne ya apanak trimkasi Makromod Lalap lolo Makromod Yesus Kristus, ono mi akim naili'il Yesus, la noho wawan na'akeme dernedi nahenia mi akim naili'il Ai kokkoo.
9 Yo odi aki man mou ilitolle Makromod Lalap Nin honowok, de ya'u loikaru Lirna Wawa'an ma na'ono Ai Anan eniyeni. Makromod Lalap nauroin nahenia akilere ya'u hi'i lir napanak leke Makromod Lalap paku mi mamani,
10 la ya apanak rehirehi lewlewen Makromod Lalap hari kalla maya'u leke ki ka'arala mi.
11 Ya'u raram nodi oro mi pakromala, ono Roh Kudus namre'e namharu ya'u penia ainu'u panaeku amre'e amharu mi la a'alapala mi akim haenhi.
12 Ainu'u panaeku ik ida ma na'alapa ida akin, ono ik akin naili'il wewerre Yesus Kristus.
13 I wal'u na'ahoru! Ya'u konohi mi leke mauroin nahenia ainu'u panaeku ki ka'arala mi, maa rakan ors eni ha man ewekala kawala aile mamani. Nonolu, ya'u laa ri ma ka namwali Yahudi namehin loikaru Lira Wawa'an eni, la ri nammori akin naili'iledi Yesus me'e. Enla ya'u raram nodi ki minim nohe leke nano i wal'uhe lo'o ri nammori akin eren nailili'il haenhi.
14 Makromod Lalap hopon ya'u loikaru Lirna Wawa'an ri na'akeme: ri man lernohi iknika noho honolla noro ma kan lernohi, ri man iskolo noro ma kan iskolo. Makromod Lalap naramyaka rehi maya'u, de ya'u raram nodi lernohi Nin konomdere mamani.
15 Onne penia ya'u raram nodi loikaru Lirna Wawa'an ki mi man minle kota Roma haenhi.
Lir Wawa'an ma nala or'ori dardari maika
16 Ya auroin Lir Wawa'an onne namwali Makromod Lalap Nina ke'eke'el an'anha, la ri na'akeme ma akin naili'il Lir onne lernala or'ori dardari ma kan horu, de ka awawa loikaru Lir Wawa'an onne. Lir Wawa'an onne loikaruwedi ri Yahudi noluwedi ri namehin ma ka namwali Yahudi.
17 Lir Wawa'an onne kukunohi maika hi'ihehewi Makromod Lalap hi'i ri na'akeme ma akin naili'il Ai ramwali ri molololo Ai leken kalarna. Onne naise Horok Lape Lirna ma na'aheni, “Ri ma akin naili'il Makromod Lalap, ai onne namwali ri molololo Ai kalarna, de lernala morimori ma namlolo.” Onne namwali ono hi akin naili'il Makromod Lalap mehe, kalla namehin kaale!
Makromod Lalap nalhari Nin ahan penia hukum ri mormori ma kan derne rakani Ai
18 Ors eniyeni Makromod Lalap man aile a'am raram nalhari Nin ahan man werek, la An hukum ri ma namhene derne nakani Ai noro ri man hi'i dohohala. Hirira hini'i wenewhe man ailanna onne namwali ew'ewek kawkawa penia hi roro ri namehin ka rauroin Makromod Lalap Nina kalla ma namlolo eni.
19 Ri mormori na'akeme rauroiroin Makromod Lalap aile, ono Ai penia man hi'i ha wo'ira namwali leke hi rauroin.
20 Ri kan do'on Makromod Lalap, maa nano lere Ai nakuku noho naleu a'am, ri mormori rauroin kokkoo Ai onne Makromod Lalap Ma Narehi Ma Nalewen la Nina molollo rakan laa ewi-ewi. Hi rauroin eniyeni ono do'onedi hahaa na'akeme man An hihi'i enihe. Ende ri nin molollo kaale na'aheni, “Ka auroin Makromod Lalap aile!”
21 Memen ri mormori onne rauroiroin Makromod Lalap aile, ma kar horhawe, ka ra'uli rasa'a, la ka rapanak trimkasi Ai. Ende rir honorok panaeku na'akeme nawokor nakali la honorok akin makiyedi de ka rauroin ha ma namlolo ida me'e.
22 Hi ra'aheni, “Ik kauroin!” maa ma namlolo hi ramwaliyedi ma namdoo wake'e.
23 Hi ramhene hoikani la ra'uli rasa'a Makromod Lalap man mori laa ewi-ewi, maa hi raram nodi hoikani aukerhe man hi'i naise na'oi ri mormori, manu liwliwar, ha mormori man ein wo'akka, noro ha mormori ma na'ina'ik haenhi. Ha onne na'akeme kan mori laa ewi-ewi naise Makromod Lalap.
24 Ende Makromod Lalap huriyedi hi lernohi rira raram nodi aimehi, la rira hini'i wenewhe man morso onne nakoko hi ida man holi diwar dawar noro ida.
25 Hi ramhene derne panaeku ma namlolo noro ha ma na'ono Makromod Lalap, maa hi raram nodi derne ha ma ka namlolo. Hi kar hoikani Makromod Lalap ma nakuku noho ma naleu a'am, maa hir hoikani la ilitolle inhawa man Makromod Lalap hi'ie. Rir hini'i onne kan wa'an, ono wa'an rehi ik koro hahaa na'akeme man Makromod Lalap hi'ie ka'uli kasa'a Ai laa ewi-ewi! Amin.
26-27 Ri mormori onnenihe rira hini'i wenewhe namehiyala, de Makromod Lalap huriyedi hi lernohi rira raram nodi aimehi, penia mo'oni po'on maeke enihe akinhe ka namone me'e, la maeke onnenihe kar hi'i inhawa ma nadedem ri mormori hi'ie. Maeke, ida ma namono ida, la mo'oni, ida ma namono ida lernohi rira raram nodi aimehi. Ende hir hi'i ha ma kan lolo ri raram, penia lernala wanalhane lolo hi kemen lernohi rira honorok akin noro hini'i wenewhe man ailanna onne.
28 Ri mormori onne ka rahinorok Makromod Lalap la ramhene rauroin Ai me'e, penia An huriyedi hi lernohi rira honorok aki man namehiyala onne, de hir hi'i ha man morso mamani.
29 Hi raram nodi hi'i dohohala namansa, la hir hi'i ha man ailanna mamani. Hi ida ma nakmanna ida nin hahaa, la hir ida ma holi diwar dawar noro ida me'e. Ida man kunu kehen ida, ida ma nesne ida, ida ma nasesi noro ida, ida man wukupoho ida, ida ma kan wakunu wawa'an noro ida, la ida man kokoldara ida nina morimori mamani.
30 Hi radedem wakunu nano'onyaka ri heri ri wali, hadwei hadwokor Makromod Lalap, kar derne rakani nounaku, holi kukulu lalapa, mehe ra'uli kemen, ranoin kalla worworu hi'i ha man ailanna, la kar derne rakani ri leleher.
31 Hirira honorok panaeku kan min haida. Hi rala nou, maa kar hi'ie, ka raramyaka ri, de akinhe kan wa'an wake'e.
32 Hi rauroin lolo Horok Lap raram Lirna aile ma na'aheni, “Inhoi ailanna naise eniyeni Makromod Lalap hukum,” maa hi kar ren rira ailanna eniyeni. Onne kan mehe, maa hir nori ri namehin lernohi rira hini'i wenewhe man yak eni haenhi.