Makromod Yesus nalhari panaeku Yohanis mehen do'on
Wahyu
Horok Lirna La'an
Horok eniyeni na'ono panaeku man Makromod Lalap nalhari Yesus Kristus leke Ai nalhari wali'ur laa Yohanis (1:1). An kukunohi Yohanis inhawe ma namwali Ai kemen lere man mai.
Dedesne An kukunohi nahenia Ai namwali Ri Mormori Anan ma namriri lolo wadu wo'ikku toro (1:12-16). An kukunohi nahenia Ai namwali Pipdumana ma namririnohi Makromod Lalap Nin naikoronno lolo a'am raram (5:6-14). An kukunohi nahenia An ha'a kuda wawarha namwali uluwakun ara man hi'i ha ma namlolo mamani lolo ara (19:11-16). An kukunohi nahenia Ai namwali Pipdumana ma nodi molollo noro Makromod Lalap lolo kota Yerusalem Worworu man moumou dewdewe (21:22-23; 22:1-5).
Ler hi'i horok eniyeni ma nodi molollo hair Roma hopon ri na'akeme ra'uli rasa'a rai lalap Kaisar, maa ri Kristen ramhene. Hi ra'aheni kan wa'an ra'uli rasa'a Kaisar ono Yesus mehe namwali rir Makromon, de hir lernala wewerek pananaka la heruwali resnedi. Maa ri Kristen heruwali sopoledi hi akin ma naili'il, de wali kili'urn ono ramka'uk hair Roma. Ende Yohanis na'alap ri Kristen akin lolo horok eniyeni leke hi ramkene akin naili'il Yesus.
Panaeku ma na'ono lolo horok eni heheni: Lolo noho wawan eniyeni ri man lernohi Yesus lernala wewerek pananaka, maa yon ik lari nano ik akin ma naili'il eni, ono lere man mai Makromod Yesus narehiyedi Nin arwali na'akeme, la Ai penia ma nodi molollo laa ewi-ewi (11:15)! Enla lere man mai ik man lernohi Ai mamani koro Ai kodi molollo wewerre.
Horok eniyeni wekel kota wo'ikku noro Makromod Lalap Nin Roh wo'ikku (1:4, 11); wekel rere'e haharu wo'ikku (1:3; 14:13; 16:15; 19:9; 20:6; 22:7; 22:14); noro lira u'uli sasa'a laa Makromod Lalap wo'ikku haenhi (5:12; 7:12); wadu onno wo'ikku (1:12), noro ha namehin nammori haenhi (1:16; 5:1, 6; 8:2; 12:3; 15:6-7; 17:9). Nomor wo'ikku onne wekel ha man moumou dewdewe la man kukkuku noknokor wake'e.
Horok Ihin
1. Yohanis nala wanakunu man hari horok eni (1:1-8).
2. Yohanis wakunu panaeku dedesne (1:9-3:22):
a. Yesus namwali Rimorimori Anan ma namriri lolo wadu onno wo'ikku toro (1:9-20).
b. Yohanis horok Yesus Lirna lolo horok wo'ikku aku laa kerei raramne ma aile kota wo'ikku (pnk. 2-3).
3. Yohanis wakunu panaeku rewro'o nine (4:1-16:21):
a. Yesus namwali Pipdumana ma namririnohi Makromod Lalap Nin naikoronno lolo a'am raram (pnk. 4-5).
b. Pipdumana hari segel wo'ikku (6:1-8:5).
c. Kowuri wo'ikku rouwedi (8:6-11:19).
d. Tanada wo'ikku kukunohi inhawe ma namwali lere man mai (pnk. 12-16).
4. Yohanis wakunu panaeku rewkelu nine (17:1-21:8):
a. Yohanis do'on maekyak ma naran Babel (17:1-19:10).
b. Yesus naikoro kuda la rehiyedi Nin arwali na'akeme (19:11-21:8).
5. Yohanis wakunu panaeku rew'akka nine (21:9-22:5):
a. Yohanis do'on maeke ma namwali Pipdumana hono, ai naran Yerusalem Worworu (21:9-21:27).
b. Yohanis do'on oir wauwau ma nala or'ori dardari (22:1-5).
6. Yohanis nala nounaku man horu (22:6-21).
1
1 Horok eniyeni ihin na'ono panaeku man Makromod Lalap nalhari Yesus Kristus, lekpananne Ai nalharile Nina hophopon wahwahan enihe inhawa ma ka nalo'ol namwali me'e. Enpenia Yesus Kristus hopon Nina hophopon a'am raram nodi Lir onne mai konohi ya'u. Ya'u eni, Yohanis ma namwali Nin hophopon wahwahan.
2 Enla ha wo'ira na'akeme i dodo'on dederne ya'u kukunohi la horok mouwedi. Ha na'akeme eni Makromod Lalap Lirna noro idewe inhawa Yesus Kristus nalhari maya'u.
3 Inhoi lese horok ma namwali nabi lirna eni lolo heri kalarna, ai akin nahuwa'anedi. Enla inhoi derne nakanie, ai akin nahuwa'anedi haenhi, ono ka nalo'ol ha eniyenihe na'akeme namwali me'e.
Yohanis aku nina tape masi laa kerei wo'ikku
4 Konohiyala i wal'uhe, kerei wo'ikku raramne man aile lolo propinsi Asia. Ya apanak Makromod Lalap man aile nonolu, man aile lere eniyeni, la man aile laa ewi-ewi nala Nin rere'e haharu noro Nin wawa'an rara'e ki mi. Na'amoli mim lernala rere'e haharu noro wawa'an rara'e nano Roh wo'ikku man minle Makromod Lalap Nin naikoronno kalarna,
5 la nano Yesus Kristus man kuku kalla maika. Ai onne namkene kukunohi Makromod Lalap Nina wanakunu ma namlolo mamani maika. Ai penia man mori wali'ur nano makmaki, la An mori noluwedi ri man maki na'akeme, la nodi molollo rai noho wawan na'akeme.
Yesus Kristus naramyaka ika,
la rarna nakliuwedi
leke huri ika nano dohohala nin molollo.
6 An hi'i ik kamwali hair ida,
la kamwali imam-imam man ilitolle Aman Makromod Lalap.
Ende ka'uli kasa'a Yesus man kulu narehi lap narehi,
la ma nodi molollo laa ewi-ewi. Amin!
7 Loi honorok wawa'an! An mai lolo hulik loiloi kakam larlari raram,
la ri lolo noho wawan na'akeme do'on Nin mamai eni.
Ri man nonolu kadiyesne, do'on haenhi.
Enla ri mormori nano hair na'akeme do'on Ai de rahere.
Ya, namlolo kokkoo namwali! Amin!
8 Makromod Lalap na'aheni, “Ya amwali Alfa noro Omega. Ya amwali man aile nano nonolu, man aile lere eniyeni, la man aile laa ewi-ewi. Ya'u peni Makromod Lalap Ma Nodi Molollo Narehi Nalewen Na'akeme.”
Yohanis do'on Yesus mai nalhari kemen
9 Maya'u, Yohanis, yo oro i wal'uhe kamwali mahaku lolo Yesus Kristus. Ik lernala wewerek pananaka wewerre, maa ik kamkene kerhu ono kamwali Nin ri. Man panulu lolo hair Roma ra'ahan maya'u, ono i loikaruwedi Makromod Lalap Lirna Wawan noro panaeku man Yesus konohiyedi maya'u me'e, de hi rodi ya'u laa sopoledi lolo noho Patmos.
10 Ler ida, alam domeku, Roh Kudus nodi molollo ya'u, mene i derne Lir ida man lap naise kowuri lirna lolo ya'u kili'urne,
11 na'aheni, “Horokedi inhawa man om dodo'on, la aku horok onne laa kerei wo'ikku raramne enihe: Epesus, Smirna, Pergamus, Tiatira, Sardis, Piladelpia, noro Laodikia.”
12 Enime'ede ya'u po'on laa kili'uru, leke po'on inhoi wakunkunu noro ya'u. Ya'u po'on wadu onno wo'ikku rodi maha hi'ie.
13 Lolo wadu onno wo'ikku toro onne, i do'on ri ida naise na'oi Ri Mormori Anan namririri aile. An nair nainair man sorsoru rakan ein kawin, la kornelhe rodi mahe hi'ie ra'akerkerhe irhun makan.
14 Murukne wawarhe naise awaha lue, la makan siksika naise aiye man mormori.
15 Ein ad'ada naise pirmere man rala nano aiye raram, la Lirna lapa naise oir rulu lapa.
16 Liman malanne nasalsala kaliyoro waku wo'ikku, la raa ma namlorno wali-wali namhara nano nuranne, la oin makan siksika naise lere ma na'inuknukue.
17 Ya'u do'on ri onneni ne, ya alwali yawa ahinononow naise ri man makie, maa Ai nala liman malanna parhu maya'u na'aheni, “Yono mamkauk! Ya'u penia ma nolu, man kauli'ure,
18 la man mori eni. Po'onala! Lere man laa onne, Ya'u maki, maa lere eni Ya'u mormori laa ewi-ewi. Ya asala konse rodi hari makmaki onno nin nika, leke ri man makiyedi ramhara enne la mori wali'ur.
19 Ende horokedi ha wo'ira om dodo'on eni na'akeme, ha ma namwali lere eniyeni noro idewe ma namwali lere man mamai.
20 Kaliyoro waku wo'ikku Ya asasale i lim'u malanna noro wadu onno wo'ikku onnenihe, ri ka nauroin onne nin panaeku makun, de Ya'u konohi o nin panaeku. Kaliyoro waku wo'ikku onnenihe na'ono Makromod Lalap Nin hophopon wo'ikku ma nadiyaka kerei wo'ikku raramne, la wadu onno wo'ikku onnenihe na'ono kerei wo'ikku raramne haenhi.”