Rakot Nohora Makodi Upler lirni
La' Puk di de rakot nohora riy maka kodia Uplerlawna lirni-tunnu (rasul) de hihi'ini-yapyapni. Rakot nohora emkameni la Uplerlawna Nhiw Lululli Nodi plolli la' ira pede rla rakot nohora Uplerlawna Kot kalwiedni la'a Yerusalem, Yudea me Samaria la'pa la noheri woru-lyanti nayanni (1:8). Uplerlawna Nhiw Lululli ed maka ktut tialan la' ira me Nhi' aruri makpesiay honona pesiayni.
Riy id nanni Lukas ed maka khorta puk di. Enor wut wualia Paulus pa rla'a meni-meni pede Lukas nhorta puka pa nakot nohora ir yala'ani re. (16:10-17; 20:5-21:18; 27:1-28:16)
La'a puk di rakot nohor walia ler maka makden Yahudi atia'a na'nama rpesiaya me rlernana Uplerlawna Nhiw Lululli. La' ler de makden Yahudi edon rora Yahudi atia'a rwahaur wutu yoma Yahudi atia'a re edon rlernohora Musa deullu-tatarni sunat onde maka ha rakot nohor ya'ana-yemnu mak haliarna onde deulu-tatra korni. Pede la'pa makden Yahudi atia'a na'nama rpesiaya de Yahudi makpesiaya rahmena rwahaur wutu enekneka to'ama Yahudi atia'a re rlernohora agama Yahudi deullu-tatarni. Mere Paulus ntekal reria niwra Uplerlawna Nreiniana-na'nana he' to'a hornama rhoitio'or doini do'oni-halli pa rpesiaya Yesus. Ne krei o'tani-matni la Yerusalem ra'enyatga horta id la Yahudi atia'a re totpena rakot nohora Musa deullu-tatarni ida-woru tututu maka hota rlernohora totpena hota makden Yahudi rora Yahudi atia'a rlernan talan pa nhi'inde rwatamputu/rwahaur wutu.
La' puk di ralamni de rakot nohor emkadille:
1. Yesus Nano'targa Uplerlawna Nhiw Lululli me nnio'a-niatu korni. (1:1-4)
2. Rwahaka Yudas wniaunu. (1:15-26)
3. Makodia Uplerlawna lirni-tunnu re hihi'ini-yapyapni la'a Yerusalem. (2:1-8:3)
4. Makodia Uplerlawna lirni re hihi'ini-yapyapni la'a Yudea me Samaria. (8:4-12:25)
5. Paulus hihi'ini-yapyapni. (13:1-28:31)
-Yala'ani yanulu maka enakot nohora Kot Kalwieda-Paitiota. (13:1-14:28)
-Rwahu'ru ralma-riora la'a Yerusalem. (15:1-35)
-Yala'ani wornu maka enakot nohora Kot Kalwieda-Paitiota. (15:36-18:22)
-Yala'ani wotellu maka enakot nohora Kot Kalwieda-Paitiota. (18:23-21:16)
-Paulus hihi'ini la Yerusalem, Kaisarea, me Roma. (21:17-28:31)
1
Yesus Ntutga Enmori owa'an la matmiati ralamni ne Nakot targa hota Uplerlawna Nhiw Lululli Nmai
1 Hya'lu Topilsu. La'a puka yanulnulu de, aghorat targ oleka, hya'a-hya'a mak Yesus Nhi' oleka me Nwatutg oleka la'a lerni la Enariri kniarni
2 la'pa ntutu-nte' wal lia ler maka Narian pa Nla'awa Ilyamou-Watyatoha. Mere edon Narian ma'ta la heyanan de, Uplerlawna Nhiw Lululli Nodi plolli la Yesus pa Nano'a-na'atga makodia Uplerlawna lir kalwiedni mak Nwalir niana.
3 De la ler mak Enlernana yamuki-yama'ala, la la'pa Nmati dewade, Nmori owa'an pa lerni terampwogat ma'ta la noha wawannu de, Yesus mana Ntutga rupni re'eni wo'ir memna la mak Enhopan pa rodi Uplerlawna lir kalwiedni, ne Ntutga de Nmori owa'an olek la matmiatni ralamni totpena rpesiay miemna. Iramkek memna Yesus, ne Yesus Nakot nohora la ira, la emkameni la Uplerlawna Nodi plolli pa emek Ray ida.
4 Ne la' lerni Enora ir ra'an wutu rewre'wa, de Enakot lir dilla ira: “Hyal miy re, yan mihgalia (mliergot la) Yerusalem di. Mpiei lia handi pa A'mu Nal memna E' Nhiw Lululli mak Enettiarg oleka wa, mak A'ukot oleka tiy miy lia' ler ululu.
5 Yoma A'ukot oleka tiy miy die Giwra: “Yohansi nharania de nnairi gera. Mere hota ler wo'ir wal pia Uplerlawna Nala Nhiw Lululli pa Nodi plolli la miy.”
Yesus Narian pa Nla'awa Ilyamou-Watyatoha
6 La' lerni la Yesus Nora mak Enhopan pa rodia Uplerlawna lir kalwiedni re rawok taru, noma ratiana Yesus riwra: “Matroma, hota la' hadi de Matro'mu Niwra Nhi' mak kodi plolli la hairi Israel totpena makden Roma edon nodi plolli mai ita?”
7 Noma Yesus Nwahla lirni re: “A A'mu nanpena ed mak kmeh'a ketlia ler meni-mel mueni. Yana mihak nohora hade yatianni yoma A'mu nanpena Nodi plolli.
8 Mere hota miy di de, mliernana ruri-lai la' ler maka Uplerlawna Nhiw Lululli Nerun la miy wawanmi. Ne hota miy mhi'a riy maka ktutrier (saksi) niohora A lia'a A li'ru-tu'nu la Yerusalem, Yudea uhunu-ewatni, Samaria ne nla' pa ntutu-nte'ela noheri woru-lyanti nayanni.”
9 La'pa Yesus Nakot emkade pa nhorwua noma E' ema rran nana pa Nha'at la Ilyamou-Watyatoha. Ir orgahi ramkek memna la matni, pa la'pa kakma mana npupniahala Yesus la heyanna pa nod hial memna yamkekni re.
10 La'pa irwatniar rer mia'ta la lyanti maka Yesus Narian de, de plinu-plinnianamde riy woru rnair wawahrani pa rtutrier lia ir onni.
11 Rrora rhar lirni riwra: “Hoi Galile' miy re! Nihya'pa mimtiutrieria tehra la hande pa mpiatniar rer lia lyanti?! Yesus mak mimkeka Narian pa Nla'awa Ilyamou-Watyatoha de, mimkek memn oleka me?! Hota Nawali pa Nmai die emkade owa'ana, emek ha mimkek de.”
Rwahaka Yudas wniaunu
12 Nhorwua noma makodi Uplerlawna lir kalwiedni re, rwatiawu wo'or Saitun pa rawal lia Yerusalem. Wo'or Saitun de olietni la Yerusalem, de kilu ida.
13 Rodi liarni la roma tniau tiar geni ida. Noma rha'at la gen miak kden la heyanna, maka ir genni oleka wa. La' ir honona de Petrus, Yohansi, Yakowsi, Andarias, Pilipsu, Tomsa, Bartolomeus, Matius, Yakowsi, Alpius a'nani, Simona mak kwayotlia memna Romawi rodi plolli la Israel, ne Yudas, Yakowsi a'nani.
14 Ir honona de nhi'inde rla'a ihru ida-ralm id la sniumbain la' Uplerlawna. Nhi'inde ror wut wali Yesus hyalli re, Yesus inni Maria me, patke'a korni wali pa rsumbaini.
15 La'pa la'awa lera ida, ne makpesiay re e rawok taru, de ir honona de edonna nhal de riy rahu ida terampworu. Noma Petrus naprir pia niwa naltieri. Lirni niwra:
16 “Ina-nara ama-hyali, hya' maka ha rhorat tar lia' Puk lawna ralamni de Uplerlawna Netlia pa hota ntutu-nte'ewa. De la it upni-tgarni lerni de, Uplerlawna Nhiw Lululli Napre'et Daud nurnu pa nakot nohora oleka Yudas mak kla' o'tani pa rtorna Yesus de.
17 Yoma Yudas de, it mutwualli ida de, ne hade wnialir nian walia pa it tora tkar wiutu.
18 Yudas di de, naweli oleka tani, nnairi kupna maka nlernana la'a ya'olu Yesus, la riy mak kodia Yesus pa rwenna. Yudas nmati lia' hande, de namehi-nayona, nlererun de o'tani nala' ulu me apannu nahniarti, me tnie'eni nripu.
19 Kuku'uni-lalawanni la'a Yerusalem natlin nan memna hya' mak Yudas nhi'a oleka, pede tan die rweta la Akaldama, nnia'eratni de rar tani.
20 Yoma la'a puk Masmur ralamni de e rhorat targa de lirni emkadi:
“Yeheni mana rdi'na, lia'arni mana rlo'wa. Ahu edonna ntowru. Hiwi edonna nkukule'a. (Genni nahgali ne riy edonna rdella.)”
La'pa e rhorat tar wualia de emkadi wali:
“Mollia la la'pa wikgeni mana riy rta'wa hgerla (rwarui-rwate'la). (Mollia pa riy dom to'a rla'a mtatanni.)”
21-22 La hade pede itwalir niana riy ida totpena nwauga Yudas pa nor rewre'wa it pa tsi'a tlin nohora-mat nohora, de Itmatromni Yesus Nmori owa'an olek la matmiatni ralamni. Twaliria riy de, de tamkek riy maka itor oleka tlernohor reria Yesus la meni-meni maka la' lerni meman la Yohansi nharani, pa la'pa nte' meman la Yesus Narian la noha wawannu pa Nokria Ilyamou-Watyatoha, de mak itden wal die.”
23 Noma riy mak kawok taru re rtut niana riy woru, id nanni Yusup. Rwet walia la Barsabas onde Yustus. Ne rwalir walia Matias.
24-25 Noma rsumbain nohora pa, rwaka plolli-mneheni la Uplerlawna. Rsumbain pa riwra: “Orgahi-Orha'a Omuat niohor oleka la riy honona ihranu ralamni. Yudas ntuini olek la genni, emolmolla makodia Uplerlawna lir kalwiedni pa e nmati olekwa, ne nla'awa geni maka hota nlernana hihi'ini-yapyapni wniahlani. Pede Matro'mu, orgahamu Mtiutga he'a mak O ralammu nala pa nkar lia kniarmu di. La' riy maroro'a ri de, Mtiutga riy id pa nwauga Yudas.”
26 Rsumbain pa nhorwua, noma rhedga patui la riy maroro'a re nanni. Noma rlernana Matias nanni. Pede rrana Matias pa nla'a mak Yesus Nhopan pa rodi Uplerlawna lir kalwiedni nor rewre'wa mutwualli termida wehrani ida re.