12
Yakobis pung mati; Petrus pung maso bui; deng orang parcaya dong pung sambayang
1 Itu waktu, ju raja Herodes mulai bekin sangsara satenga mati sang Tuhan Yesus pung orang dong saparu.
2 Dia parenta orang ko dong pi bunu bekin mati sang Yakobis pake kalewang. Yakobis tu, Yohanis pung bu.
3 Waktu Herodes lia, bilang, Yakobis pung mati tu, bekin sanáng orang Yahudi pung bos-bos dong, ju dia bekin tamba-tamba lai. Pas deng hari bésar yang dong subu, bilang, pesta Roti Sonde Pake Ragi, ju dia suru orang pi tangkap ame sang Petrus lai.
4 Tangkap abis sang dia, ju dong lempar kasi maso sang dia pi dalam bui. Tarús dong tunju ampa kalompok tantara ko jaga baganti sang Petrus siang hari malam. Satu kalompok tantara, ada ampa orang. Herodes mau ko putus Petrus pung parkara di orang banya pung muka, nanti kalo itu pesta su abis.
5 Jadi, waktu dong tahan sang Petrus dalam bui, Tuhan Yesus pung orang dong sambayang sonde putus-putus, minta ko Tuhan lia sang Petrus.
Tuhan kasi kaluar sang Petrus dari bui
6 Dia pung beso, raja Herodes mau putus Petrus pung parkara di muka umum. Ma itu malam, dong ika sang Petrus deng dua rante di dalam bui. Abis dia tidor di dua tantara pung teng-tenga. Deng ada tantara laen dong yang bajaga di muka pintu.
7 Takuju sa, Tuhan pung ana bua satu dari sorga datang badiri di situ, ju itu kamar taráng bacaya. Ais, itu ana bua goyang kasi bangun sang Petrus, bilang, “Pe'u, é! Bangun capát!” Itu waktu ju, itu rante bési talapás memang dari Petrus pung tangan.
8 Abis ju, itu ana bua suru sang dia, bilang, “Pake lu pung baju! Deng pake lu pung sandal!” Petrus pake abis, ju itu ana bua suru lai, bilang, “Pake lu pung baju luar, ko mari iko sang beta suda!”
9 Ju Petrus iko itu ana bua, ko jalan kaluar dari dalam bui. Ma Petrus kira, kata, dia cuma mimpi sa. Padahal, memang jadi batúl bagitu.
10 Waktu dong su lewat tampa jaga partama deng kadua, ju dong sampe di pintu bési. Itu pintu tabuka sandiri bagitu sa, abis ju dong dua kaluar ko iko jalan yang pi di kota. Takuju sa, Tuhan pung ana bua tu, pi kasi tenga sang Petrus sandiri di situ.
11 Abis ana bua tu ilang, ju Petrus sadar, bilang, “Memang batúl, é! Sakarang baru beta tau. Tuhan tu, batúl-batúl su kirim datang Dia pung ana bua ko kasi lapás sang beta dari Herodes pung tangan. Tuhan bekin bagitu ko orang Yahudi dong pung akal busuk sonde kaná di beta.”
12 Abis bagitu, ju Petrus pi di mama Maria pung ruma. Dia tu, andia Yohanis pung mama. Yohanis tu, pung nama laen, Markus. Di situ, banya orang ada bakumpul sambayang, minta ko Tuhan tolong Petrus deng dia pung parkara.
13 Sampe di itu ruma, ju Petrus toki deng eki dari pagar pung pintu. Tarús satu pambantu parampuan, nama Rode, pi maloi sapa yang ada datang tu.
14 Dengar Petrus pung suara tu, ju dia kanál memang. Dia sanáng mo mati, tarús dia lari capát-capát pi dalam, ko kasi tau orang dong, bilang, “We! Petrus ada badiri di luar!” Ma tagal dia su babingung tu, dia lupa buka pintu kasi sang Petrus.
15 Ma dong manyao, bilang, “Sonde mungkin! Jang maen gila bagitu!”
Ma itu parampuan batahan karás, bilang, “Sonde! Itu batúl-batúl Petrus pung suara! Dia ada di luar sana!”
Ma dong acu sa, bilang, “Mangkali, itu cuma Tuhan pung ana bua dari sorga sa, yang ada jaga sang Petrus.”
16 Dong masi batola-bahela, ma Petrus ada ba'eki tarús, sampe dong pi buka pintu. Buka abis, ju dong tanganga bodo, te dia tu, andia Petrus.
17 Petrus goyang dia pung tangan ko biar dong samua tanáng. Abis ju dia carita karmana ko sampe Tuhan Allah su kasi kaluar sang dia dari dalam bui. Ju dia suru sang dong, bilang, “Bosong pi kasi tau ini hal samua sang Yakobis deng utusan laen dong, é.” Tarús Petrus kaluar pi di tampa laen.
18 Dia pung beso papagi, waktu tantara jaga dong lia, bilang, Petrus su sonde ada lai, ju dong bingung, deng dong taku mo mati, tagal dong sonde tau nanti jadi karmana deng dong.
19 Waktu Herodes dapa tau itu hal, ju dia parenta sang dong ko pi cari sang Petrus. Ma dong sonde katumu sang dia. Ju Herodes parenta ko dong pareksa itu tantara jaga dong. Pareksa abis, ju dia suru ko bunu bekin mati sang itu tantara jaga dong samua.
Ais ju, Herodes pi jalan kasi tenga Yudea, ko tenga di kota Kaisarea.
Raja Herodes, yang dong ju pange Agripa, mati
20 Itu waktu, ada orang dong dari dua kota, nama Tirus deng Sidon, suka béli makan dari raja Herodes pung negrí. Ma su dari lama, itu raja su bamusu deng dong. Ais dong ba'akór ko cari jalan pi badame deng dia. Ju dong pili satu rombongan ko pi katumu deng Herodes. Sampe di Kaisarea, dong batamán deng satu orang dalam, nama Blastus. Dia tu, bos di raja pung ruma jabatan. Dong basakongkol deng Blastus ko dia jadi dong pung tukang buju ko buka jalan sang dong bisa katumu deng Herodes.
21 Ais Herodes satuju ko tarima sang dong, ju dong pili satu waktu ko dong bakatumu. Itu hari, dong bekin acara bésar. Herodes pake dia pung pakean jabatan, abis dudu di dia pung korsi parenta. Ju dia mulai angka omong sang dong.
22 Dengar dia pung suara, ju orang dong mulai puji angka nae sang dia, bilang, “Dengar dia pung suara tu! Ini bukan manusia pung suara! Ini dewa pung suara!”
23 Takuju sa, Tuhan Allah pung ana bua satu dari sorga kirim kasi Herodes satu panyaki, tagal dia tarima dong pung puji sang dia, deng dia ju seti kasi ondor sang Tuhan Allah. Ju cacing dong makan buang sang Herodes pung badan sampe dia mati mampos.
24 Deng samua hal yang su jadi tu, Tuhan Allah pung Kabar Bae tasiar tamba luas, deng orang yang iko Tuhan Yesus pung Jalan Idop ju tamba banya.
25 Waktu Barnabas deng Saulus antar abis orang Antiokia dong pung bantuan pi Yerusalem tu, ju dong pulang kambali pi Antiokia. Dong ada bawa satu orang muda sama-sama deng dong. Dia pung nama Yohanis. Ma dong ju pange sang dia, bilang, Markus.