24
Orang Yahudi dong datang baparkara deng Paulus di Kaisarea
1 Lewat lima hari ju, orang-orang Yahudi yang mau baparkara deng Paulus datang sampe di kota Kaisarea. Di itu rombongan ada Ananias, andia kapala agama Yahudi pung bos bésar. Bos-bos laen dong ju ada iko. Dong ju datang deng satu orang laen, nama Tertulus. Dia tu, pintar omong. Andia ko dong pake sang dia jadi dong pung jubir ko lawan sang Paulus.
2-3 Waktu orang dong samua su bakumpul di tampa urus parkara, ju gubernor suru bawa maso sang Paulus. Ais Tertulus bangun badiri, ko mau omong kasi jato sang Paulus. Dia kasi hormat sang gubernor, ais dia angka omong, bilang,
“Bapa gubernor yang beta hormat! Su bagini lama ni, mulai dari bapa pegang parenta di sini, bapa su tau lebe dolo apa yang bae kasi sang botong. Ais bapa ju su bekin bae banya hal, sampe botong orang Yahudi su bisa idop aman, sanáng, deng tanáng. Jadi, botong mau pake ini waktu ko minta tarima kasi bam-banya sang bapa gubernor. Ko sapa lai yang bisa bekin bae bagitu banya di mana-mana sama ke bapa.
4 Ma biar beta sonde usa pake waktu talalu banya, beta omong langsung di dia pung isi sa. Jadi, beta minta bapa dengar bae-bae hal-hal yang beta mau kasi tau so'al Paulus ni.
5 Bagini, bapa. Buat botong orang Yahudi, Paulus ni, sama ke satu panyaki yang pinda dari satu tampa pi tampa laen. Dia suka lawan botong pung agama, deng tukang bekin kaco botong pung adat di mana-mana. Di mana sa dia pi, pasti orang Yahudi dong baparkara satu deng satu. Dia ni, satu kapala tukang propaganda dari partei agama yang iko satu orang dari Nasaret, yang botong bilang ‘partei Nasarani’. Ma apa yang dong ajar tu, batasala bésar deng apa yang botong pung agama ajar.
6 Ini orang su coba mau bekin kamomos botong pung Ruma Sambayang Pusat yang barisi tu, deng dia bawa orang kafir pi di dalam. Andia ko botong tangkap sang dia. [Iko botong pung mau, botong mau hukum sang dia pake botong pung atoran sandiri.
7 Ma komandán Lisias datang rampas ame sang dia dari botong pung tangan.
8 Ais dia parenta, bilang, kalo ada yang mau baparkara deng Paulus, na, dong musti datang mangada sang bapa di Kaisarea. Dia pung maksud, biar ko gubernor urus langsung ini parkara]. Jadi sakarang, botong datang di sini, ko bapa pareksa ini parkara. Nanti bapa sandiri dapa tau, bilang, samua yang botong omong ni, memang batúl.
Bagitu sa. Makasi, bapa.”
9 Tertulus omong abis bagitu, ju orang Yahudi laen dong sokong dia pung omong, bilang, “Batúl, bapa! Memang bagitu.”
Paulus bela diri di muka Feliks
10 Ais gubernor kasi sein ko Paulus mulai omong, bilang, “Sakarang, beta kasi loos sang lu ko bela diri.”
Ais Paulus badiri, ju dia angka omong, bilang, “Bapa gubernor! Bapa su parenta di botong pung propinsi ni, su bagini lama. Jadi, bapa su mangarti batúl botong orang Yahudi pung dudu-badiri di sini. Tagal itu, beta sonde taku bela diri di bapa pung muka.
11 Kira-kira dua blas hari yang su lewat ni, beta ada pi di Yerusalem ko sambayang di Ruma Sambayang Pusat. Bapa bisa tanya sa deng orang-orang yang ada iko sambayang itu waktu.
12 Di Ruma Sambayang Pusat tu, beta sonde basambung mulu deng sapa-sapa. Deng di ruma sambayang laen dong, beta sonde kumpul orang ko bekin kaco. Bagitu ju di Yerusalem, beta sonde bekin onar apa-apa.
13 Ma sakarang, ini orang dong mau kasi jato sang beta. Apa yang dong omong tadi tu, ju sonde ada pung bukti apa-apa.
14 Bagini, bapa gubernor. Beta musti mangaku sang bapa satu hal. Beta ada iko satu partei baru yang orang kasi nama, bilang, ‘Tuhan Yesus pung Jalan Idop’. Beta sambayang sang Tuhan Allah, sama deng beta pung nene-moyang dong sambayang sang Dia. Beta ju iko ba'i Musa pung atoran dong samua, deng parcaya batúl apa yang Tuhan Allah pung jubir dolu-dolu dong su tulis kasi tenga sang botong.
15 Beta ada harap sang Tuhan Allah sama ke ini orang dong ju, yang sakarang ada badiri di sini ko lawan sang beta. Botong parcaya, bilang, nanti Tuhan Allah kasi idop orang mati: orang bae ko, orang jahat ko, sama sa.
16 Andia ko beta salalu usaha deng karás ko biar beta bisa idop deng hati lurus di Tuhan Allah deng manusia pung muka. Deng bagitu, sonde ada orang yang bisa bekin jato sang beta.
17 Beta ada karjá barapa taon di luar tana Isra'el, baru beta pulang pi di Yerusalem. Waktu beta datang, beta ada bawa doi yang orang dong ada kumpul kasi, ko bantu botong pung orang-orang yang idop susa. Abis, beta ju pi di Ruma Sambayang Pusat ko mau sambayang, deng mau kasi korban macam-macam sang Tuhan Allah di situ.
18 Waktu beta ada bekin barisi diri di Ruma Sambayang Pusat iko botong pung atoran adat, ju dong datang ko mau tangkap sang beta. Ma itu waktu, sonde ada orang banya di situ, deng sonde ada yang bekin kaco apa-apa ju!
19 Yang ada, cuma barapa orang Yahudi yang datang dari propinsi Asia ko mau sambayang ju di situ. Jadi, kalo memang dong ada so'al deng beta, na, dong tu, yang musti bekin parkara deng beta di sini. Bukan ini bapa-bapa dong!
20 Ma itu orang dong sonde datang. Jadi, Bapa tanya coba sang ini orang dong, beta pung sala apa? Tempo hari, waktu dong pareksa sang beta di tampa urus parkara agama, dong sonde dapa beta pung sala satu ju. Bapa tanya sang dong sa!
21 Cuma mangkali ada satu hal sa, bapa, yang bekin dong kaco, deng sonde sanáng sang beta. Waktu beta omong deng suara karás, bilang, ‘Bosong mau hukum sang beta, tagal beta parcaya, bilang, Tuhan Allah bisa kasi idop orang mati!’ ”
22 Paulus omong bagitu, ma tagal gubernor Feliks ju su tau banya, so'al ‘Tuhan Yesus pung Jalan Idop’, ju dia tutu sidang, bilang, “Bagini! Beta mau pange sang komandán Lisias, ko dengar dia pung carita dolo. Kalo beta su omong abis deng dia, baru beta bisa putus ini parkara.”
23 Ais dia suru parwira satu ko pi tahan sang Paulus. Ma dia parenta ko kasi sadiki bebas sang dia, deng jang larang dia pung tamán dong ko datang layani sang dia.
Paulus omong deng Feliks deng dia pung bini Drusila
24 Gubernor Feliks pung bini, orang Yahudi, nama Drusila. Su lewat barapa hari, ju dia cari kans, ko dia deng dia pung bini mau omong-omong deng Paulus. Jadi, dia suru bawa sang Paulus ko mangada sang dong dua. Ju Paulus kasi tau sang dong, jalan karmana ko orang dapa parcaya sang Yesus Kristus, andia Orang yang Tuhan su janji memang dari dolu.
25 Dia ju kasi tau jalan karmana ko orang dapa idop lurus, deng karmana ko orang bisa jaga diri ko jang bekin sala. Dia ju kasi tau, bilang, nanti Tuhan Allah mau hukum sang samua orang.
Waktu Feliks dengar bagitu, ju dia taku satenga mati. Ais dia bilang sang Paulus, “Paulus. Su cukup. Sampe di sini sa, suda! Nanti kalo ada waktu, beta pange sang lu lai.”
26 Itu waktu, Feliks ada cari-cari salák ko Paulus sogok sang dia deng doi, ko dia lapás sang dia. Ais dia maen pange Paulus ko omong-omong deng dia tarús.
27 Ma di sablá laen, gubernor Feliks ju ada ame hati sang orang Yahudi pung bos-bos dong. Andia ko dia sonde putus capát Paulus pung parkara. Dia kasi tenga itu parkara tarendam sampe dua taon. Abis itu, ada gubernor baru yang datang ganti sang Feliks. Dia pung nama Porkius Festus. Ma dong ju masi tahan tarús sang Paulus.