7
Stefanus bela diri di tampa urus parkara agama
1 Ais ju kapala agama Yahudi pung bos bésar tanya sang Stefanus, bilang, “Yang dong tudu sang lu tu, batúl ko sonde?”
2-3 Stefanus manyao bale, bilang, “Bapa-bapa deng sodara dong samua! Bosong coba dengar sang beta dolo. Dolu-dolu, kotong pung nene-moyang Abraham balóm pinda dari dia pung kampong asal. Ma Tuhan yang hebat tu, su kasi tunju Diri sang dia. Tuhan parenta sang dia, bilang, ‘Pi jalan kasi tenga lu pung negrí ni, deng kasi tenga lu pung kelu dong. Barangkat su, ko pi di satu negrí yang nanti Beta kasi tunju sang lu!’ Abis, baru dia barangkat dari itu tana Mesopotamia, ko pinda pi di kota Haran.
4 Ju dia jalan kasi tenga orang Kasdim dong pung negrí, ko pinda pi di kota Haran. Waktu dia pung papa barana mati, ju Tuhan Allah bawa sang dia pinda datang di Kana'an, andia ini tana yang bapa-bapa deng sodara dong ada tenga sakarang ni.
5 Itu waktu, Tuhan Allah sonde bagi kasi tana satu jingkal ju dari ini negrí ko jadi ba'i Abraham pung tana pusaka. Ma Tuhan Allah su janji memang, bilang, nanti Dia kasi ini tana sang dia jadi dia pung turunan dong pung tana pusaka. Padahal itu waktu dia sonde ada ana barana satu ju.
6 Ma Tuhan Allah omong sang dia, bilang, ‘Lu pung turunan dong nanti pi tenga di orang laen dong pung negrí. Ju nanti itu orang dong takán sang dong bekin jadi dong pung budak, deng bekin sang dong sonde karu-karuang sampe ampa ratus taon.
7 Ma abis ampa ratus taon tu, nanti Beta hukum itu bangsa yang bekin sang lu pung turunan ko jadi dong pung budak. Ais ju lu pung turunan jalan kasi tenga itu negrí, ko datang di ini tampa ko sambayang minta tarima kasi sang Beta.’
8 Omong abis bagitu, ju Dia ika itu janji deng acara sunat ko jadi tanda, bilang, Abraham deng dia pung turunan dong, su jadi Tuhan Allah pung orang. Abis, waktu dia pung ana Isak baru umur dalapan hari, ju Abraham sunat sang dia. Lama-lama, ju Isak sunat sang dia pung ana Yakob. Ais Yakob ju kasi sunat dia pung ana laki-laki dua blas orang tu, waktu dong satu-satu pung umur dalapan hari. Dong samua ni, andia kotong orang Yahudi pung nene-moyang.
9 Ais satu kali, kotong pung nene-moyang dong saki hati sang dong pung adi Yusuf, sampe dong jual buang sang dia ko pi jadi budak di tana Masir sana. Ma Tuhan Allah sonde parná kasi tenga sang dia.
10 Andia ko Tuhan kasi lapás sang dia dari dia pung susa dong samua. Tuhan Allah ju kasi sang dia otak encer ko bisa mangarti banya hal, sampe raja Masir sayang sang dia, tarús angka sang dia jadi gubernor di anteru tana Masir. Deng dia ju pegang kuasa di dalam raja pung ruma jabatan.
11 Abis itu, musim lapar datang hantam tana Masir deng tana Kana'an. Musim lapar tu, hebat talalu, sampe banya orang dong sangsara di mana-mana. Andia ko itu waktu, kotong pung nene-moyang dong ju su sonde bisa dapa makan apa-apa.
12 Ma ba'i Yakob dengar kabar, bilang, ada makanan di tana Masir. Ais ju dia suru dia pung ana-ana dong, andia kotong pung nene-moyang dong ni, ko jalan pi di tana Masir ko béli makanan di sana.
13 Béli abis, ju dong pulang. Waktu dong pung makanan tu su abis, ju Yakob suru dong pi ulang lai ko coba béli makanan di tana Masir. Baru itu kali Yusuf buka kartu, bilang, dia ni, dong pung adi barana Yusuf. Ais itu, baru dia kasi kanál dia pung kelu dong sang Raja Masir.
14 Abis, Yusuf minta ko dia pung papa deng dia pung kelu samua pinda pi tana Masir. Dong samua yang datang di sana, ada tuju pulu lima orang.
15 Jadi, Yakob pinda pi tana Masir, sampe dia deng kotong pung nene-moyang dong mati di sana.
16 Ma lama sakali, dong bawa pulang nene-moyang dong pung tulang pi di kampong Sikem di tana Kana'an. Ais dong kubur itu tulang dong di tampa kubur yang tempo hari ba'i Abraham su béli ame dari Hemor pung turunan dong.”
Stefanus manyao so'al Musa deng orang yang sonde mau dengar sang dia
17 Stefanus sambung dia pung omong, bilang, “Ini samua jadi, tagal Tuhan su janji memang, bilang, nanti Dia kasi tana pusaka sang Abraham di itu tampa. Waktu su mulai deka-deka dia pung hari ko Tuhan bekin ganáp Dia pung janji tu, kotong pung bangsa Yahudi su batamba banya sakali di tana Masir sana.
18 Itu waktu, ada satu raja baru yang mulai pegang parenta di Masir. Ma dia sonde tau so'al Yusuf.
19 Itu raja inja barmaen sang kotong pung bangsa. Dia kajám mo mati deng kotong pung nene-moyang dong. Deng dia paksa sang dong ko buang kasi tenga dong pung ana-ana mea dong, ko biar dong mati.
20 Itu waktu, ba'i Musa pung mama barana sang dia. Deng dia pung badan pung ba'isi lai! Dia pung mama deng papa dong sonde iko itu raja pung parenta. Ais dong piara sambunyi-sambunyi itu ana di dong pung ruma sampe dia pung umur tiga bulan.
21 Waktu dong sonde bisa sambunyi itu ana dalam dong pung ruma lai, ju dong lapás buang sang dia. Ma raja Masir pung ana parampuan satu dapa katumu itu ana, ais dia angka ame itu ana ko dia piara sama ke dia pung ana sandiri.
22 Tagal itu, orang Masir dong ajar kasi dong pung ilmu samua sang Musa, sampe dia sandiri jadi orang hebat. Deng dia tu, pintar ba'omong deng pintar karjá.
23 Ais waktu dia pung umur su ampa pulu taon, Musa mau pi cari kanál sang dia pung orang Isra'el dong sandiri.
24 Waktu dia pi kaluar ju, dia dapa lia satu orang Isra'el kaná papoko dari satu orang Masir. Ais dia pi tolong dia pung orang satu bangsa, ju dia bunu bekin mati itu orang Masir.
25 Te Musa kira dia pung bangsa su tau, bilang, Tuhan Allah su kirim sang dia, ko kasi lapás sang dong dari dong pung susa. Ma dong balóm mangarti itu hal.
26 Dia pung beso, Musa kaluar lai ko pi lia dia pung orang Isra'el dong. Ju dia dapa lia dua orang ada bafait. Ais ju dia coba kasi dame sang dong dua, bilang, “Weh! Bosong dua ni, bakaka-adi. Ma karmana ko sampe bosong babakalai bagini ni?”
27 Ma orang yang papoko dia pung kawan tu tola buang sang ba'i Musa pi pinggir, ko bilang, ‘Sapa yang angka sang lu jadi botong pung kapala! Deng sapa ju yang angka sang lu jadi botong pung tukang putus parkara ni?
28 Lu kira lu mau bunu bekin mati sang beta, sama ke lu su bunu bekin mati itu orang Masir kamaren, ko?’
29 Dengar bagitu, ju Musa bangun bongkar dari Masir. Ais dia pi tenga di orang Median dong pung negrí. Dia kawin di situ, ju dong dapa dua ana laki-laki.
30 Abis ampa pulu taon ju, Musa pi di satu tampa karíng deka-deka deng satu gunung yang orang bilang gunung Sinai. Di situ Tuhan Allah pung ana bua dari sorga datang katumu deng Musa dari dalam api di pohon kici satu. Itu pohon tabakar, ma sonde angus.
31 Lia bagitu, ju Musa tanganga bodo sa. Ju dia pi deka-deka ko mau tau ada apa tu. Ma takuju, te dia dengar Tuhan omong dari dalam itu api, bilang,
32 ‘Beta ni, lu pung nene-moyang dong pung Tuhan Allah; andia ba'i Abraham, ba'i Isak, deng ba'i Yakob pung Tuhan Allah.’ Dengar bagitu, ju dia taku mo mati sampe dia gamatar dingin, deng dia sonde barani angka muka ko lia itu pohon yang ada tabakar.
33 Abis itu ju Tuhan omong lai, bilang, ‘We, Musa! Lu ada badiri di tana yang barisi. Lapás buang lu pung sandal!
34 Jang sangka, bilang, Beta su lupa buang Beta pung orang Isra'el di Masir sana. Sonde! Beta masi inga sang dong. Beta tau dong pung sangsara. Beta su dengar dong batarea minta tolong. Jadi Beta sakarang turun ko Beta pi kasi lapás sang dong. Mari sini dolo! Beta mau kirim sang lu ko kambali pi Masir sana.’
35 Deng bagitu, Tuhan Allah yang kasi tunju Diri dalam api tu, parenta sang Musa ko pulang pi di Masir. Tuhan tunju sang dia ko kasi lapás orang Isra'el dari dong pung sangsara. Musa ni, andia orang yang dolu dong tanya, bilang, ‘Sapa angka sang lu jadi botong pung kapala?’ Ma sakarang Tuhan sandiri yang angka sang dia!
36 Ais ju, Musa kambali pi Masir. Di situ dia bekin tanda heran bésar-bésar. Abis, dia bawa kaluar orang Isra'el dong dari Masir. Dia bawa sang dong jalan lewat Laut Mera, tarús dong jalan kuliling tampa kosong sampe ampa pulu taon.
37 Te Musa sandiri kasi tau sang orang Isra'el dong, bilang, ‘Nanti Tuhan Allah angka ame satu orang dari bosong pung teng-tenga, ko jadi Dia pung jubir, sama ke Dia su angka sang beta ni.’
38 Musa ada sama-sama deng kotong pung orang Isra'el dong di tampa kosong. Dia tu, yang jadi jambatan kasi kotong pung nene-moyang dong deng Tuhan Allah pung ana bua dari sorga. Te itu ana bua tu, kasi turun Tuhan Allah pung Kata-kata sang Musa, yang kasi tunju sang kotong jalan idop yang batúl. Itu Kata-kata dong yang Tuhan kasi turun di gunung Sinai tu.
39 Biar bagitu ju, ma kotong pung nene-moyang dong sonde mau dengar sang Musa. Ju dong tola buang sang dia, ko dong mau pulang kambali pi Masir sa.
40 Ais dong pi kokoe sang Harun, bilang, ‘Lu pung adi Musa su bawa kaluar sang kotong dari tana Masir. Ma sakarang, botong sonde tau dia su ada di mana lobang. Jadi botong minta ko lu bekin kasi botong sosonggo, ko biar dia sandiri sa yang antar bawa sang botong.’
41 Ais dong bekin ame itu sosonggo. Dia pung model sama ke sapi ana satu. Ais dong horo binatang kasi itu sosonggo. Tarús dong bekin pesta rame-rame, tagal dong pung hati puas deng itu barang yang dong su bekin deng dong pung tangan sandiri.
42 Lia bagitu, ju Tuhan Allah bale balakang sang dong. Ju dong mulai songgo lai barang di langit sama ke matahari, bulan, deng bintang-bintang. Ma Tuhan Allah kasi tenga sang dong bagitu sa. Itu pas deng apa yang Tuhan Allah pung jubir dong su tulis dari dolu, bilang,
‘Weh! Bosong orang Isra'el dong!
Ampa pulu taon bosong jalan kuliling di itu tampa kosong,
abis bosong horo binatang dong ko sémba sang Beta, ko,
bosong songgo sang sapa?
43 Bosong bukan puji-puji sang Beta!
Tiap hari bosong maen songgo bosong pung sosonggo dong sa.
Bosong suka maso-kaluar pi di setan Molok pung ruma songgo.
Bosong ju suka songgo sang bintang satu pung setan, nama Refan.
Jadi, bosong maen songgo apa yang bosong su bekin deng bosong pung tangan sandiri!
Andia ko nanti Beta pasti angka buang jao-jao sang bosong pi Babel pung sablá sana.’ ”
Stefanus manyao so'al Ruma Sambayang Pusat
44 Stefanus sambung dia pung omong, bilang, “Tuhan Allah kasi tunju sang ba'i Musa satu tampa sambayang pung model. Ju Musa dong kasi bangun satu Tenda Sambayang yang dong bekin dari kulit binatang deng kaen, iko itu model. Jadi, orang Isra'el dong datang sambayang sang Tuhan Allah di situ. Kalo dong pinda dari satu tampa pi satu tampa, dong bongkar itu Tenda Sambayang, ais dong ika sang dia, ju dong dorok pi tampa yang baru. Di situ, dong kasi badiri ulang itu Tenda.
45 Lama-lama, waktu Yosua dong baparáng lawan bangsa-bangsa laen dong di tana Kana'an, Tuhan Allah usir kasi kaluar sang dong. Abis Dia bagi-bagi itu negrí kasi sang kotong pung nene-moyang dong. Waktu dong maso pi rampas ame itu negrí, dong ju bawa Tuhan pung Tenda Sambayang pi di situ. Itu Tenda badiri tarús di situ sampe raja Daud pegang parenta.
46 Raja Daud ni, sambayang sang Tuhan Allah yang sama ke kotong pung ba'i Yakob dong ju sambayang sang Dia. Ais Daud bekin sanáng Tuhan pung hati, ju Tuhan kasi berkat sang dia. Ais ju dia minta sang Tuhan, ko dia yang kasi bangun Ruma Sambayang Pusat yang baru.
47 Ma Daud pung ana Soleman yang kasi bangun Tuhan pung Ruma Sambayang Pusat.
48 Ma kotong tau, bilang, Tuhan Allah yang Paling Tinggi sonde tenga di ruma yang manusia bekin, tagal dolu Tuhan pung jubir satu su tulis memang, bilang,
49 ‘Langit tu, Beta pung korsi parenta.
Deng bumi tu, Beta pung tampa alas kaki.
Karmana ko bosong bisa bangun kasi Beta satu ruma yang pantas ko Beta tenga di situ? Sonde mungkin!
50 Ko langit deng bumi pung isi samua, Beta yang bekin!’ ”
Stefanus tudu sang kapala-kapala, bilang, dong sonde kanál sang Tuhan pung Orang Barisi
51 Ais Stefanus sambung dia pung omong, deng masparak sang dong, bilang, “Dasar manusia kapala batu dong! Bosong sama ke orang yang sonde kanál sang Tuhan Allah, deng sonde mau dengar sang Dia sa. Bosong tukang malawan sang Tuhan Allah, sama ke nene-moyang dong yang bale balakang sang Dia! Sakarang bosong masi mau malawan sang Tuhan pung Roh yang Barisi lai, ko?
52 Bosong pung nene-moyang dong ju bekin susa tarús sang Tuhan Allah pung jubir dong. Coba bosong kasi tau: jubir mana yang dong sonde bekin sangsara sang dia? Sonde ada, wuang! Dolu Tuhan pung jubir dong, suka kasi tau memang, bilang, nanti Tuhan Allah mau kirim Dia pung Orang yang Barisi. Ma bosong pung nene-moyang dong bunu mati Tuhan pung jubir-jubir dong. Sampe bosong sandiri ju pake orang laen bunu bekin mati Tuhan pung Orang yang Barisi tu.
53 Deng Tuhan Allah pung ana bua dari sorga dong ju su antar bawa samua atoran adat yang Tuhan mau kasi sang kotong, ma bosong sonde mau toe.”
Dong lempar bekin mati sang Stefanus
54 Waktu orang yang ada dudu urus parkara dengar Stefanus pung omong tu, dong tau memang dia ada lempar sala kasi sang dong. Ais dong saki hati deng makan gigi.
55 Ma Stefanus yang takaná Tuhan pung Roh yang Barisi tu, angka mata ko lia pi langit. Di situ, dia dapa lia Tuhan Allah pung hebat samua, deng Tuhan Yesus ada badiri di Tuhan Allah pung sablá kanan di tampa yang paling hormat tu.
56 Ju Stefanus omong, bilang, “Bagini, bapa-bapa dong. Beta ada lia langit tabuka, deng Manusia Tulen ada badiri di tampa yang paling hormat di Tuhan Allah pung sablá kanan.”
57 Dengar bagitu, ju orang yang urus itu parkara dong tutu dong pung talinga. Abis dong batarea suru Stefanus paróp dia pung mulu. Ju dong samua malompa rame-rame ko mau ru'i barmaen sang dia.
58 Ais dong hela raroso bawa sang dia pi di luar kota. Tarús saksi-saksi dong buka dong pung baju luar, ko kasi pegang di satu orang muda. Dia pung nama Saulus, deng dia jadi dong pung tukang kipas. Ais ju, dong pi lempar barmaen sang Stefanus deng batu.
59 Waktu dong masi lempar sang Stefanus, ju dia batarea deng suara karás, bilang, “Tuhan Yesus! Beta pung waktu su deka-deka. Tarima sang beta suda!”
60 Abis ju dia jato talipa di dia pung lutut ko batarea lai deng suara karás, bilang, “Bapa, jang kasi sang dong pikol ini dosa!” Ais itu, dia pung napas putus, ju dia mati.