6
Orang parcaya jang nae pangadilan deng sodara orang parcaya laen
1 Kalo satu orang sarani baparkara deng orang sarani laen, akurang ko bosong maju pi pangadilan di muka tukang putus parkara yang sonde kanál deng Tuhan Allah? Karmana bisa bagitu? Lebe bae badiri di muka orang parcaya dong, ko dong yang urus bosong pung parkara!
2 Tingka ke bosong sonde tau, bilang, orang parcaya dong yang nanti putus parkara kasi samua orang di ini dunya. Jadi, karmana sampe bosong sonde mampu urus hal kici ana dong sandiri?
3 Yang batúl, kotong yang nanti putus parkara kasi Tuhan pung ana bua dari sorga dong. Jadi, pasti bosong yang musti urus parkara hari-hari dong.
4 Tamba lai, kalo bosong orang parcaya ada baparkara so'al hal kici ana dong, akurang ko bosong pake tukang putus parkara yang orang sarani sonde hormat sang dong?
5 Sakarang, beta mau omong satu hal yang musti bekin bosong malu. Karmana? Sama ke di bosong pung teng-tenga, sonde ada satu orang ju yang cukup pintar ko urus hal kici ana dong, macam ke parkara yang muncul di kotong pung sodara.
6 Ma orang parcaya satu hela bawa dia pung sodara orang parcaya pi di muka tukang putus parkara! Padahal itu tukang putus parkara sonde parcaya sang Tuhan!
7 Ada yang sonde batúl, to? Bosong su kala tu, kalo bosong satu maju pi pangadilan deng satu. Ada lebe bae, kasi biar lu pung sodara kalo dia bekin sala kasi lu. Deng kalo lu pung sodara orang parcaya ada curi ame lu pung barang, ada lebe bae kasi biar ko dia ame itu barang sa!
8 Ma bosong orang parcaya satu bekin sala kasi dia pung sodara. Deng satu ada curi ame dari satu. Padahal bosong sama-sama orang parcaya!
9 Bosong tingka ke sonde mangarti ini hal dong! Padahal, orang yang sonde suka bekin yang batúl, sonde mungkin bisa maso jadi Tuhan Allah pung kelu dong. Jang kasi biar bosong pung diri kaná tipu, ko bosong bekin sala! Orang yang maen parampuan, yang maen songgo, yang maen serong deng orang yang bukan dong pung laki ko bini, laki-laki yang batidor deng laki-laki,
10 orang yang pancuri, yang balalas, yang minum mabo, yang omong bekin busuk orang pung nama, yang putar-balek ko ame orang pung barang dong. Te samua orang yang macam ke dong sonde mungkin bisa maso jadi Tuhan pung orang!
11 Padahal, dolu bosong saparu memang bagitu ju! Ma Tuhan Allah su hapus buang bosong pung sala-sala dong ko bekin barisi sang bosong. Deng Dia ju su buka jalan ko bosong bisa babae kambali deng Dia. Dia bekin samua tu, tagal bosong ta'ika deng kotong pung Bos Yesus Kristus, deng tagal bosong ju ta'ika deng Tuhan pung Roh.
Kalo lu piara bae-bae lu pung badan, itu kasi tunju hormat sang Tuhan
12 Beta ada pung hak ko bekin samua-samua. Ma samua yang beta mau bekin tu, balóm tantu bae kasi sang beta. Ais, biar beta ada pung hak ko bekin samua-samua, ma beta sonde mau hal yang sonde bae ada pegang kuasa sang beta.
13 Conto ke, ada orang bilang, “Makanan parlú sang parú, deng parú parlú sang makanan.” Ma inga, te nanti Tuhan kasi ancor dua-dua. Conto laen lai, kotong sonde dapa kotong pung badan ko biar kotong bisa maen serong deng orang yang bukan kotong pung laki ko bini. Kotong dapa kotong pung badan ko kotong bisa karjá kasi sang kotong pung Bos. Deng kotong pung Bos yang piara kotong pung badan.
14 Waktu kotong pung Bos Yesus su mati, Tuhan Allah yang kasi idop kambali sang Dia. Jadi, nanti kalo kotong su mati, Dia ju ada pung kuasa ko kasi idop kambali sang kotong.
15 Bosong pung badan jadi Kristus pung milik, sama ke bosong jadi bagian dari Kristus pung badan. Tantu bosong su tau itu hal! Jadi, kalo beta pake bagian dari Kristus pung badan, ais pi bacampor deng parampuan nakal pung badan, karmana? Jangan! Te itu sonde pantas!
16 Tantu bosong su tau, kalo orang maen serong ko tidor bacampor deng parampuan nakal bagitu, dong dua su ta'ika jadi satu. Te ada tatulis di Tulisan Barisi, bilang, “Dong dua su ta'ika jadi satu.”
17 Ma orang yang idop satu hati deng kotong pung Bos, su jadi satu deng Dia, sama ke dong dua ada ta'ika deng satu roh.
18 Kalo lu dapa sampat ko maen serong deng orang yang bukan lu pung laki ko lu pung bini, na, lari jao-jao! Orang bekin sala macam-macam yang bekin rusak sang dong sandiri, deng bekin rusak orang laen ju. Ma orang yang maen hohongge tu, bekin rusak dia pung badan sandiri.
19 Lu pung badan tu, sama ke Tuhan pung Roh yang Barisi pung ruma sambayang. Dia pung Roh tu, yang ada idop di bosong pung hati, te Tuhan Allah sandiri yang kasi Dia pung Roh sang bosong. Andia ko bosong sonde ada pung hak sandiri sa lai, ko jadi bos sang bosong satu-satu pung badan sandiri. Ma akurang ko bosong ada idop tingka ke sonde tau ini hal dong?
20 Kristus su tabús ame sang bosong pake harga yang mahal. Ais, bosong musti idop deng hormat bosong pung badan sandiri, ko kasi tunju, bilang, bosong ju hormat sang Tuhan Allah.