5
Kristus su kasi bebas sang kotong
1 Dolu, orang Yahudi pikol barát-barát dong pung atoran agama dong. Ma sakarang Kristus su angka itu barát dari orang yang parcaya sang Dia. Andia ko, sakarang kotong su bebas. Jadi, bosong jang kaná tipu ko pi pikol ulang lai itu atoran, sama ke budak!
2 Dengar, é! Ini beta, Paulus, yang omong ni. Kalo bosong tarima sunat ko iko orang Yahudi dong pung atoran, na, Kristus pung mati yang bekin bosong bebas tu, sonde ada pung guna lai.
3 Kalo orang tarima sunat, dia ju musti pikol ulang lai itu atoran dong samua. Bosong inga, ko sonde? Te dolu, beta su kasi tau memang.
4 Orang yang mau pake atoran ko bekin Tuhan Allah tarima bae sang dia, dia bekin diri tapisa dari Kristus. Te deng bagitu, dia su tola buang Tuhan Allah pung hati bae.
5 Ma Tuhan pung Roh Barisi yang buka jalan ko kotong parcaya sang Yesus Kristus. Andia ko kotong batunggu-tunggu, bilang, nanti Tuhan Allah cap sang kotong, bilang, kotong orang lurus.
6 Biar orang sunat ko, sonde ko, itu sonde pantíng. Ma yang pantíng, andia orang parcaya sang Kristus, deng sayang sang orang laen.
7 Dolu, bosong su idop iko jalan yang batúl. Ma sakarang, sapa yang su putar-balek sang bosong, sampe bosong su sonde iko itu jalan lai?
8 Te ajaran putar-balek yang bosong dengar tu, sonde datang dari Tuhan Allah. Padahal Dia tu, yang su pange sang bosong ko jadi Dia pung orang.
9 Apa yang dong ajar tu, mula-mula cuma satu-dua kata sa. Ma lama-lama nanti itu ajaran su bekin bosong pung pikiran jadi rusak. Sama ke ragi sadiki yang orang campor deng tarigu ko mau bekin roti. Lama-lama ju, itu ragi bekin camporan jadi reis samua.
10 Tagal kotong su jadi satu deng kotong pung Bos Yesus Kristus, andia ko beta yakin, bilang, Dia nanti bekin bosong parcaya kambali deng apa yang beta su ajar tu. Deng Tuhan Allah sandiri nanti hukum sapa sa yang su bekin rusak bosong pung parcaya.
11 Bagini, sodara dong! Kalo beta ajar, bilang, orang musti dapa sunat, na, tantu beta sonde dapa siksa lai sama ke sakarang ni. Deng orang Yahudi dong sonde tola buang beta pung ajaran lai so'al Yesus pung mati di kayu palang tu.
12 Ma itu orang yang su bekin bingung sang bosong so'al sunat tu, kasi tenga pi ko dong sandiri pi potong buang dong pung ‘burung’ samua!
13 Sodara dong! Tuhan su kasi bebas sang bosong, ko bosong sonde usa idop ta'ika deng itu atoran agama pung mau. Ma jang kira, kata, bosong su bebas ko idop iko bosong pung mau-mau! Te yang batúl, andia bosong musti idop basayang, deng bosong musti layani satu deng satu, sama ke budak layani dia pung tuan.
14 Di Tuhan pung Tulisan Barisi ada tatulis, bilang, “Lu musti sayang orang laen dong, sama ke lu sayang lu pung diri sandiri.” Kalo bosong cuma bekin iko ini atoran satu sa, na, bosong su bekin iko orang Yahudi pung atoran pung maksud samua.
15 Ma kalo bosong satu bara'u deng satu, ko satu baru'i deng satu, na, lia sa! Sonde lama lai, te bosong su kasi ancor bosong pung diri sandiri tu.
Idop iko manusia pung mau, ko iko Roh Barisi pung mau?
16 Beta pung maksud bagini: kalo bosong idop iko Tuhan pung Roh pung mau, bosong sonde iko manusia pung mau lai.
17 Te manusia pung mau sonde iko Roh pung mau. Deng Roh pung mau sonde iko manusia pung mau. Ko dong dua bamalawan na! Andia ko bosong sonde bole bekin lai, iko bosong pung mau-mau sa.
18 Ma kalo Tuhan pung Roh ada pimpin sang bosong, bosong su sonde ta'ika lai deng itu atoran dong.
19 Orang yang bekin-bekin iko manusia pung mau tu, conto ke: orang yang maen serong deng orang yang bukan dia pung laki ko dia pung bini, orang yang pung pikiran kotor, yang sonde tau malu,
20 yang songgo setan ko suanggi, yang bamusu, yang suka basambung mulu, yang suka ba'iri hati, yang suka mangamok, yang cuma inga diri sandiri, yang suka tusu-tusu orang, yang suka bekin kaco,
21 yang suka camburu, yang suka minum mabo deng bapesta liar, deng yang bekin sala laen dong. Dolu, beta su parná kasi inga, bilang, orang yang bekin iko hal-hal bagitu, dong tu sonde bisa jadi Tuhan Allah pung orang.
22 Ma orang yang idop iko Tuhan pung Roh pung mau tu, nanti itu Roh bekin dia ko jadi orang yang suka basayang, yang pung hati babunga, yang suka badame, yang sabar, yang pung hati bae deng orang, yang suka batolong orang, yang suka bapegang janji,
23 yang manis deng samua orang, deng yang bisa jaga diri bae-bae. Sonde ada satu atoran ju, yang larang ini hal dong.
24 Orang yang su maso jadi Yesus Kristus pung orang, dia su sonde iko manusia pung mau lai. Te itu kapingin bekin jahat dong su tapaku mati di kayu palang sama-sama deng Yesus.
25 Jadi, kalo Tuhan pung Roh su kasi idop baru sang kotong, na, kotong musti bekin iko tarús Dia pung mau.
26 Andia ko kotong jang bagila hormat, jang suka bamalawan satu deng satu, deng jang ba'iri hati lai.