13
Kotong musti idop babae satu deng satu
1 Naa, sodara sayang dong! Ada barapa hal yang beta mau kasi inga sang bosong.
Jang lupa basayang tarús sang bosong pung sodara orang parcaya dong.
2 Jang lupa buka hati ko tarima orang yang bosong sonde kanál di bosong pung ruma. Te ada barapa sodara yang parná tarima orang bagitu, tau-tau te itu orang dong, Tuhan Allah pung ana bua dari sorga.
3 Jang lupa taro mata sang orang di bui, te dong kaná tangkap tagal dong parcaya sang Kristus. Andia ko bosong musti tolong sang dong, sama ke bosong sandiri yang kaná tangkap.
Deng jang lupa tolong orang yang kaná siksa. Urus sang dong deng bae-bae, sama ke bosong sandiri yang tarima itu sangsara.
4 Kawin laki-bini tu, barisi. Ma jang sampe kawin yang barisi tu jadi kamomos. Te Tuhan Allah tantu kasi jato hukuman sang samua orang yang maen serong deng orang yang bukan dong pung laki ko bini.
5 Jang rakus doi. Ma bosong musti idop puas deng apa yang bosong punya. Te Tuhan Allah su omong, bilang,
“Beta sonde akan lupa sang bosong.
Beta sonde akan kasi tenga sang bosong.”
6 Jadi bekin kuat bosong pung hati, sama ke orang parná tulis, bilang,
“Tagal beta pung Bos mau tolong sang beta,
andia ko beta sonde taku.
Te sonde ada satu orang ju,
yang bisa ganggu batúl sang beta.”
Jang kambali iko atoran agama yang lama, ma parcaya tarús sang Kristus
7 Jang lupa bosong pung pamimpin dong yang parná ajar Tuhan Allah pung Kata-kata sang bosong. Pikir bae-bae dong pung jalan idop, deng conto dong pung parcaya. Te apa yang dong parcaya tu, andia:
8 Yesus Kristus tu, sonde parná baroba.
Dari mula-mula, sampe sakarang, deng sampe salamanya,
Dia tatáp sama.
9 Tagal itu, bosong jang iko-iko arus deng ajaran yang sala. Tuhan Allah bekin kuat bosong pung hati, tagal Dia su kasi tunju Dia pung hati bae sang bosong. Bukan tagal bosong iko atoran so'al makan-minum. Te atoran bagitu sonde ada pung guna.
10 Dolu-dolu, di itu kintal di Tuhan Allah pung Tenda Sambayang ada satu meja korban kasi binatang korban dong. Kapala agama yang layani di situ ada pung hak ko makan daging sisa dari itu meja. Ma sakarang, kotong ada meja yang laen. Deng kapala agama model lama sonde ada hak makan di situ.
11 Dolu, tiap taon kapala agama paling tinggi bawa dara dari binatang korban ko pi taro dalam Tuhan Allah pung Kamar yang Paling Barisi. Deng bagitu, Tuhan lupa buang dong pung sala-sala dong. Ais dong bawa itu binatang, ko bakar di luar kampong.
12 Bagitu ju deng Yesus. Dia ju jadi korban ko Tuhan Allah bisa hapus buang manusia pung sala. Deng waktu Dia sangsara tu, dong ju hela bawa sang Dia, ko pi bunu sang Dia di luar kota Yerusalem.
13 Tagal itu, mari ko kotong pi di Yesus, ko parcaya tarús sang Dia. Biar orang bekin hina sang kotong ju, ma kotong musti siap tarima, sama ke Dia.
14 Te kotong cuma tenga tahan di ini dunya. Ma kotong ada baharap ko tenga di satu kota baru di sorga sampe salamanya.
15 Tagal Yesus su jadi korban kasi kotong, andia ko kotong su sonde parlú bawa binatang korban lai ko kasi sang Dia. Ma ada persembahan laen yang kotong musti bawa tarús ko kasi sang Tuhan Allah, andia persembahan puji-pujian yang angka tinggi-tinggi Dia pung nama.
16 Deng jang lupa bekin hal bae kasi orang laen. Kalo dong parlú apa, na, tolong sa. Te itu samua ju jadi sama ke persembahan yang bekin sanáng Tuhan Allah pung hati.
17 Bosong musti dengar-dengar sang samua orang yang urus sang bosong. Te dong jaga bosong pung jiwa siang-malam. Nanti dong musti tanggong-jawab dong pung karjá di Tuhan Allah pung muka. Jadi, dengar bae-bae sang dong, ko dong bisa lapor deng hati sanáng. Jang sampe dong lapor deng hati ancor, tagal bosong su kasi tenga Yesus Kristus pung jalan idop. Te deng bagitu, bosong su sonde ontong lai.
Yang tulis ini surat ni, ada ucap sukur deng sambayang kasi orang Ibrani
18 Tolong sambayang tarús kasi sang botong. Te botong pung hati memang lurus, deng botong mau bekin hal bae tarús.
19 Lebe-lebe lai, tolong sambayang ko beta bisa kambali capát pi di bosong.
20-21 Tuhan Allah tu, yang bekin tanáng kotong pung hati. Beta minta Dia tolong sang bosong, ko bosong bisa bekin iko Dia pung mau samua. Beta ju minta Dia tolong kotong samua, ko jadi orang yang bekin sanáng Dia pung hati. Te Tuhan Allah su pake Yesus Kristus pung dara yang tatumpa, ko ika janji baru deng kotong. Itu janji jalan tarús sampe salamanya. Ais, Tuhan Allah kasi idop kambali kotong pung Bos Yesus Kristus tu. Sakarang, Yesus ada piara sang kotong sama ke gambala yang paling hebat. Andia ko kotong angka tinggi-tinggi Dia pung nama, deng puji tarús-tarús sang Dia! Batúl tu.
Saloom
22 Sodara sayang dong! Beta minta ko bosong tarima bae beta pung nasiat ni deng hati tabuka. Te ini surat ni, cuma pende sa.
23 Ada kabar yang beta mau ko bosong samua tau. Andia: kotong pung sodara Timotius su kaluar dari bui. Kalo dia datang capát di beta, nanti botong dua sama-sama pi di bosong.
24 Beta titip salam kasi bosong pung pamimpin dong, deng salam kasi bosong samua yang parcaya sang Yesus Kristus. Sodara-sodara dari propinsi Italia ju ada titip dong pung salam.
25 Beta minta ko Tuhan Allah kasi tunju Dia pung hati bae sang bosong samua.
Bagitu sa!