4
Kalo kotong parcaya sang Yesus Kristus, kotong bisa idop badame deng Tuhan Allah, sama ke kotong ada barenti cape deng Dia
1 Ma sakarang kotong musti pikir panjang, tagal Tuhan masi janji, bilang, Dia pung orang dong bisa barenti cape sama-sama deng Dia. Jadi, jang sampe ada dari bosong yang tola buang apa yang Tuhan su janji tu.
2 Te kotong su dapa dengar itu kabar bae, sama ke kotong pung nene-moyang dong ju dapa dengar. Ma tagal dong sonde parcaya itu kabar, dong sonde dapa ontong apa-apa.
3 Ma kalo kotong parcaya, kotong bisa barenti cape sama-sama deng Tuhan Allah. Te dolu, Dia su janji bagitu deng kotong pung nene-moyang, ma ais Dia mara deng kasi tau sang dong, bilang,
“Beta su sonde tahan lia bosong pung jahat bagitu lai.
Andia ko Beta kutuk sang bosong, bilang,
‘Bosong su sonde bole maso lai,
ko barenti cape sama-sama deng Beta.’ ”
Jadi kotong tau, bilang, waktu Tuhan bekin langit deng bumi, Dia su ator memang ko Dia pung orang dong bisa barenti cape, ko idop sama-sama deng Dia.
4 Di carita so'al Tuhan Allah bekin langit deng bumi, ada tatulis so'al Tuhan Allah barenti cape, bilang,
“Tuhan karjá abis samua,
ju dia pung beso, pas deng hari katuju,
Dia barenti.”
5 Deng di bagian laen lai, Tuhan Allah omong sang kotong pung nene-moyang dong, bilang,
“Bosong su sonde bole maso lai,
ko barenti cape sama-sama deng Beta.”
6 Jadi, Tuhan Allah mau ko Dia pung orang dong barenti cape ko idop sama-sama deng Dia. Ma kotong pung nene-moyang yang dengar lebe dolo itu kabar bae tu, dong sonde bisa maso, tagal dong sonde bekin iko Tuhan pung mau.
7 Ma lama-lama, Tuhan pili waktu yang laen, ko Dia pung orang bisa maso barenti cape sama-sama deng Dia. Te Dia pake ba'i Daud ko omong, bilang,
“Ini hari, kalo bosong dengar Tuhan Allah pung omong,
jang bekin bosong pung hati karás ke batu,
ma dengar bae-bae su.”
8 Waktu ba'i Daud omong, bilang, “ini hari”, dia sonde tunju itu hari waktu Yosua antar bawa nene-moyang dong pung ana-ana maso pi tana Kana'an. Te waktu ba'i Daud omong bagitu, dong samua su lama mati.
9 Tagal itu, kotong tau, bilang, Tuhan su ator waktu yang laen, ko Dia pung orang dong bisa barenti cape, ko idop sama-sama deng Dia.
10 Deng orang yang maso ko barenti cape sama-sama deng Tuhan Allah, dia su barenti dari dia pung karjá, sama ke Tuhan ju barenti dari Dia pung karjá pas di hari katuju, waktu Dia su bekin abis ini dunya.
11 Jadi pasang kaki ko bosong bisa maso barenti cape ko idop sama-sama deng Tuhan Allah. Jang sampe ada yang sonde dapa maso, tagal dia sonde mau dengar Tuhan pung Kata-kata, sama ke kotong pung nene-moyang tu.
12 Te Tuhan Allah pung Kata-kata dong kasi tunju jalan idop yang batúl. Dong ada pung kuasa ko maso pi dalam kotong pung hati, ko nilei kotong pung pikiran deng kotong pung mau-mau samua. Te itu Kata-kata dong memang lebe tajam dari satu parang yang maso pi dalam daging ko potong urat balá tulang, ko kasi tabuka samua.
13 Di langit deng bumi samua, sonde ada yang bisa tasambunyi dari Tuhan Allah, te Dia bisa lia samua-samua deng jalás. Deng nanti kotong musti pi mangada sang Dia, ko lapor samua yang kotong su bekin.
Yesus su jadi Kapala Agama Paling Tinggi yang lebe hebat dari kapala agama model lama dong
14 Kotong musti pegang kuat-kuat kotong pung parcaya, tagal Tuhan Allah pung Ana, Yesus, su jadi kotong pung kapala agama paling tinggi. Te Dia su ada di Tuhan Allah pung muka di sorga, ko bela sang kotong.
15 Dia bisa bela bae-bae sang kotong, tagal Dia mangarti, bilang, kotong ni, manusia. Kalo ada yang buju-buju ko bekin sala, na, kotong gampang jato. Yesus ju kaná goda yang sama parsís ke kotong, ma Dia sonde parná jato.
16 Tagal itu, mari ko kotong barani deka-deka deng Tuhan Allah di Dia pung korsi parenta. Te Dia tu, hati bae. Jadi, kalo kotong sambayang sang Dia, na, pasti Dia mau kasi tunju Dia pung rasa kasian ko tolong sang kotong pas waktu.