8
Tuhan Allah pake Kristus ko ika janji baru yang lebe bae dari janji lama
1 Jadi, beta pung omong yang pantíng bagini: sakarang kotong su ada kapala agama paling tinggi yang lebe hebat dari yang dolu-dolu dong. Dia tu, andia Yesus. Dia dudu pegang parenta di sorga, di Tuhan Allah yang Paling Tinggi pung sablá kanan.
2 Deng Dia kasi jalan Dia pung tugas di Tuhan Allah pung tampa sambayang yang asli. Itu tampa tu, Tuhan Allah sandiri yang bekin, bukan manusia yang bekin.
3 Kapala agama paling tinggi biasa bawa pemberian deng korban ko kasi sang Tuhan Allah. Andia ko Yesus ju musti bawa korban.
4 Ma Yesus sonde kasi jalan Dia pung tugas di bumi. Tagal di bumi su ada kapala agama yang kasi pemberian deng korban sang Tuhan Allah, iko ba'i Musa pung atoran.
5 Dong kasi jalan dong pung tugas di Tenda Sambayang, yang dia pung model iko tampa sambayang asli di sorga. Te waktu ba'i Musa mau bekin itu Tenda, Tuhan Allah kasi inga sang dia, bilang, “Inga bae-bae! Lu musti bekin batúl-batúl iko model yang Beta su kasi tunju sang lu di atas itu gunung!”
6 Ma Yesus pung tugas jao lebe hebat dari kapala agama model lama dong. Te sakarang, Tuhan Allah su ika janji yang lebe bae. Dia ju pake Yesus jadi jambatan ko manusia bisa badame deng Tuhan Allah.
7 Dolu-dolu, Dia ika janji deng ba'i Musa waktu Dia kasi turun itu atoran dong. Biar bagitu ju, ma manusia sonde bisa idop barisi batúl iko itu atoran. Tagal itu, dong sonde bisa babae deng Tuhan Allah. Andia ko sakarang, parlú ada janji yang lebe bae lai.
8 Te dolu, Tuhan Allah togor sang Dia pung orang, tagal dong su langgar ulang-ulang Dia pung atoran lama. Waktu Dia su sonde tahan lai, ju Dia mara, ais Dia kasi tau, bilang,
“Dengar bae-bae, te Beta ni, Bos!
Pasti nanti Beta ika janji baru
deng bangsa Isra'el,
deng suku Yahuda.
9 Itu janji yang nanti Beta ika deng dong tu,
sonde sama deng itu janji yang dolu Beta su ika
deng dong pung nene-moyang dong.
Te dolu Beta pegang dong pung tangan,
ko antar bawa sang dong kaluar dari tana Masir.
Ma dong sonde bekin iko
apa yang dong su janji deng Beta tu.
Andia ko Beta su sonde mau toe sang dong lai.
10 Itu janji yang Beta nanti ika deng bangsa Isra'el,
dia pung isi bagini:
“Nanti Beta taro Beta pung atoran di bosong pung dalam pikiran.
Nanti Beta tulis Beta pung parenta di bosong pung dalam hati.
Ais, Beta jadi bosong pung Tuhan,
deng bosong jadi Beta pung orang.
11 Nanti bosong sonde parlú ajar lai sang bosong pung tamán,
deng bosong pung sodara dong bilang,
‘Bosong musti kanál sang Tuhan!’
te bosong samua su kanál bae deng Beta,
mulai dari yang paling kici sampe yang paling bésar.
12 Biar bosong bekin hal yang sonde batúl,
ma nanti Beta jato kasian sang bosong.
Deng Beta lupa buang bosong pung sala-sala dong samua.”
13 Waktu Tuhan omong, bilang, Dia mau ika janji baru deng dong, dia pung arti, itu janji yang lama, su sonde laku lai. Sonde lama lai, te dia su ilang buang tu.