14
Tuhan Yesus bekin bae orang, kaná deng hari sambayang
1 Satu kali, kaná deng hari sambayang, orang partei agama Farisi pung kapala satu undang sang Yesus ko datang makan di dia pung ruma. Dia dudu makan, ma ada orang yang mama'u sang Dia ko mau lia Dia mau bekin apa kaná deng hari sambayang.
2 Itu waktu, ada satu orang saki bere-bere yang ada iko dudu di situ.
3 Ais, Yesus tanya sang ahli hukum Yahudi deng orang Farisi yang ada iko dudu makan di situ, bilang, “Iko ba'i Musa pung atoran, bole bekin bae orang saki, kaná deng hari sambayang, ko sonde?”
4 Ma sonde ada satu orang yang buka mulu. Ju Yesus sonto itu orang saki, ais dia bae memang. Tarús Yesus suru sang dia ko pulang.
5 Abis itu, Yesus tanya sang dong lai, bilang, “Kalo ada ana yang jato maso pi dalam parigi, kaná deng hari sambayang, bosong pi hela kasi kaluar sang dia, ko sonde? Kalo sapi yang jato, bosong kasi tenga, ko hela kasi kaluar? Tantu bosong hela kasi kaluar. Naa, itu dia pung arti, bilang, bosong su karjá, to!”
6 Dengar Yesus omong bagitu, sonde ada satu orang ju yang bisa manyao sang Dia.
Jang cari-cari muka
7 Itu waktu, Yesus ada lia-lia orang yang datang makan pesta di itu ruma. Ada banya orang yang pili tampa di muka, ko pi dudu di situ. Lia bagitu, ju Dia omong, bilang,
8 “Ati-ati, ó! Kalo orang undang sang bosong pi pesta kawin, na, jang pi cari dudu di tampa orang bésar dong. Te jang sampe tuan pesta ada undang tamu yang lebe pantíng.
9 Kalo bagitu, tuan pesta nanti datang omong sang lu, bilang, ‘Jang mara, é! Bapa tolong pinda pi balakang dolo, te beta su sadia ini korsi kasi ini orang bésar ni.’ Ju lu bangun kasi tenga itu korsi deng malu, ko pi dudu di balakang.
10 Jadi, kalo lu dapa undangan, na, pi dudu sa di korsi paling balakang. Nanti kalo tuan pesta dapa lia sang lu, ju dia datang, bilang, ‘Eh, Pak! Mari ko dudu di muka sini sa.’ Deng bagitu bosong dapa hormat di muka tamu samua.
11 Te orang yang angka-angka diri, nanti Tuhan kasi jato sang dia. Ma orang yang bekin diri sama ke orang kici, nanti Tuhan angka nae sang dia.”
12 Abis itu, Yesus omong deng itu tuan ruma, bilang, “Laen kali, kalo pak bekin pesta, na, jang undang pak pung kelu deng tamán orang kaya dong sa! Te dong pasti bisa undang balas sang pak.
13 Ma kalo pak bekin pesta, na, undang orang miskin, orang kaki hela, orang yang sonde bisa jalan, deng orang buta dong.
14 Tantu dong sonde bisa balas sang pak. Ma kalo pak undang sang dong, Tuhan Allah yang balas. Nanti kalo Dia kasi idop kambali orang parcaya yang su mati dong, Dia sonde lupa pak pung bae.”
Umpama so'al pesta bésar
(Mateos 22:1-10)
15 Dengar bagitu ju, ada orang yang dudu satu meja deng Yesus angka omong, bilang, “Paling ontong tu, andia orang yang iko makan rame-rame di Tuhan Allah pung istana, ó!”
16 Yesus manyao sang dia, bilang, “Beta carita bagini: ada satu orang bekin pesta bésar. Ju dia undang orang bam-banya.
17 Waktu pesta su siap ju, dia suru dia pung tukang suru-suru ko pi pange orang-orang yang kaná undang dong, bilang, ‘Mari, te acara su mau mulai.’
18 Ma dong samua bekin alasan macam-macam ko biar dong sonde bisa datang. Satu kasi alasan, bilang, ‘Waa! Beta baru béli ame satu kabón, jadi beta musti pi lia coba dolo. Jang mara ó! Te beta sonde bisa datang.’
19 Ada laen yang kasi alasan, bilang, ‘Beta baru béli ame sapi bajak lima pasang. Beta ada mau pi coba sang dong ni, jadi ma'af, ó!’
20 Yang laen lai bilang, ‘Beta baru kawin, jadi sonde bisa.’
21 Ais, itu tukang suru-suru pulang ko lapor dia pung tuan. Dengar bagitu ju, itu tuan mara mo mati. Abis dia parenta itu tukang suru-suru, bilang, ‘Kalo bagitu, lu kaluar ko pi capát-capát! Lu pi di samua strat deng lorong di ini kota, ko undang bawa orang kasian, orang kaki hela, orang buta, deng orang lumpu dong.’
22 Dengar bagitu ju, itu tukang suru-suru pi undang itu orang dong. Ais dia pulang ko lapor, bilang, ‘Bapa! Dong su datang samua, ma tampa kosong masi banya.’
23 Ju itu tuan bilang, ‘Kalo bagitu, na, lu pi lai di kampong-kampong di luar kota, sampe di kabón-kabón. Buju-buju sang sapa sa, ko bawa datang sang dong, asal bekin ponu ini tampa pesta.
24 Dengar, é! Itu orang yang su tola beta pung undangan tu, dong sonde dapa rasa ini pesta pung enak sadiki ju!’ ”
Bareken bae-bae dolo, baru iko sang Tuhan Yesus
(Mateos 10:37-38)
25 Ais itu, Yesus dong jalan tarús pi Yerusalem. Orang banya ada iko sang Dia. Ais Dia mangada sang dong, ju Dia omong, bilang,
26 “Orang yang batúl-batúl mau iko sang Beta, dia musti sayang sang Beta lebe dari samua: lebe dari dia pung papa-mama, lebe dari dia pung bini-ana, lebe dari dia pung kaka-adi, malahan lebe dari dia pung diri sandiri. Kalo sonde, itu orang sonde pantas jadi Beta pung ana bua.
27 Te orang yang sonde mau pikol sangsara tagal dia iko sang Beta, dia sonde pantas jadi Beta pung orang. Biar dia mati ju, dia musti pikol tarús.
28 Jadi kalo mau iko sang Beta, na, bareken bae-bae dolo. Conto ke orang yang mau bangun ruma batingkat. Dia musti itong lebe dolo dia pung ongkos sampe alus-alus. Jang sampe doi sonde cukup.
29 Kalo sonde itong alus-alus, mangkali dia baru bekin ruma pung fanderen, te doi su abis. Ais orang dong katawa bekin malu sang dia,
30 bilang, ‘Bosong lia coba itu orang dolo! Dia baru bekin fanderen, ma balóm apa-apa, te doi su abis.’
31 Conto laen, andia so'al baparáng. Raja yang mau baparáng musti dudu ba'itong lebe dolo deng dia pung konco dong. Kalo dia cuma ada pung tantara 10.000 orang, kira-kira dia bisa manáng lawan musu 20.000 orang, ko sonde?
32 Kalo su itong-itong abis, ma nanti dia kala paráng, na, lebe bae, waktu musu masi jao, dia kirim memang utusan ko ba'urus dame sa.
33 Bagitu ju orang yang mau iko sang Beta. Dia musti itong pi-datang, bilang, dia su siap kasi tenga samua-samua, ko sonde? Te kalo sonde, itu orang sonde pantas jadi Beta pung ana bua.”
Orang yang sonde pantas iko sang Tuhan Yesus, sama ke garam yang sonde ada pung guna lai
(Mateos 5:13; Markus 9:50)
34-35 Yesus sambung Dia pung omong deng conto laen lai, bilang, “Garam tu, bae. Kotong pake ko bekin enak makanan. Ma kalo itu garam sonde asin lai, dia pung guna apa? Sonde bisa pake sang dia lai ko bekin enak makanan. Mau bekin pupuk ju, sonde bisa. Kotong angka buang sa. Sapa ada talinga, na, dengar bae-bae, ó!”