2
Tuhan Yesus bekin bae orang lumpu
(Mateos 9:1-8; Lukas 5:17-26)
1 Lewat barapa hari ju, Yesus pi ulang lai di Kapernaum. Ju dong kasi tau di mana-mana, bilang, Dia su ada di ruma.
2 Ju orang dong datang dari mana-mana. Dong makarubu sampe basesak dalam ruma. Sampe di muka pintu ju, su basesak. Ais itu, Yesus kasi tau sang dong, Tuhan Allah pung mau.
3 Dia masi ba'omong, ju ada ampa orang dorok bawa satu orang lumpu ko pi di Yesus.
4 Ma, tagal su talalu banya orang, andia ko dong sonde bisa bawa itu orang sampe di Yesus pung muka. Ju dong nae pi atas ruma, ko bongkar atap pas di atas Yesus pung kapala. Waktu atap tabuka, ju dong kasi turun sang dia deng dia pung tikar.
5 Waktu Yesus lia sang dong, Dia tau dong parcaya batúl-batúl sang Dia. Ju Dia kasi tau sang itu orang lumpu, bilang, “Ana, é! Beta su kasi ampon lu pung sala dong!”
6 Ma di situ ada dudu barapa orang guru agama Yahudi. Waktu dong dengar Yesus pung omong tu, dong rasa tar enak dalam hati.
7 Ais dong ba'omong, bilang, “Ko ini orang pung barani omong bagitu lai! Cuma Tuhan Allah sa, yang bisa kasi ampon orang dong pung sala. Ma ini orang pung omong tu, bekin diri sama ke dia Tuhan Allah sa. Dia su hojat tu!”
8 Ma Yesus su tau memang dong pung hati. Ais Dia omong, bilang, “Bosong jang pikir bagitu!
9-10 Mana lebe gampang? Kalo Beta kasi tau sang ini orang lumpu, bilang, ‘Lu pung sala su dapa ampon,’ bosong sonde tau kalo jadi bagitu, ko sonde. Ma kalo Beta bilang, ‘Bangun suda! Angka lu pung tikar ko pulang.’ Kalo dia bangun memang, bosong baru dapa lia bukti, bilang, Beta ni, Manusia Tulen. Deng Beta ada pung kuasa deng hak ko kasi ampon orang pung sala.”
Ais itu ju, Yesus kasi tau sang itu orang lumpu, bilang,
11 “Lu dengar, é! Sakarang lu su bae! Jadi, bangun, angka tikar ko pulang suda, é.”
12 Dengar bagitu, ju itu orang bangun memang. Ais dia angka dia pung tikar, ju jalan kaluar. Samua orang di situ lia deng dong pung mata biji. Ju dong samua tanganga, ko bilang, “Awii! Botong baru parná lia yang bagini, ó! Tuhan Allah memang pung hebat lai!”
Tuhan Yesus pange sang Lewi ko iko sang Dia
(Mateos 9:9-13; Lukas 5:27-32)
13 Ais itu ju, Yesus pi ulang lai di dano Galilea pung pinggir. Banya orang datang katumu sang Dia, ju Dia kasi tau sang dong, Tuhan Allah pung mau.
14 Di situ, ada satu orang, nama Lewi, Alpius pung ana. Dia karjá di tampa bayar bea kasi sang pamarenta Roma. Pas Yesus jalan lewat di situ, Dia dapa lia sang Lewi. Ju Dia bilang, “We! Mari ko iko sang Beta!”
Dengar Yesus bilang bagitu ju, Lewi bangun ko iko memang sang Dia.
15 Ais itu ju, Yesus dong ada dudu makan di Lewi pung ruma, sama-sama deng Lewi pung tamán tukang tagi bea dong. Ada ju orang-orang laen, yang orang Yahudi anggap orang tar bae dong, iko makan deng dong. Dari itu orang yang dudu makan dong, ada banya yang suka dengar sang Yesus.
16 Itu waktu, ada guru agama dari partei Farisi barapa orang, dapa lia Yesus dudu makan deng tukang tagi bea, deng itu orang sonde bae dong. Ju dong tanya sang Dia pung ana bua dong, bilang, “Akurang ko bosong pung Guru dudu makan deng itu orang tukang tagi bea, deng itu orang tar bae dong?”
17 Ma Yesus dapa dengar dong batanya bagitu, ju Dia manyao, bilang, “Orang saki memang parlú dokter, ma orang su bae sonde parlú. Beta datang ko urus orang yang tar bae dong. Ma sonde datang ko urus orang yang su rasa diri batúl dong.”
Tuhan Yesus pung ajaran baru, laen dari orang Farisi dong pung ajaran
(Mateos 9:14-17; Lukas 5:33-39)
18 Satu kali, orang dari partei agama Farisi dong ada puasa. Dong lia Yohanis Tukang Sarani pung ana bua dong ju ada puasa. Ma dong sonde lia Yesus pung ana bua dong ada puasa sama ke dong. Ais dong pung orang datang katumu deng Yesus ko batanya, bilang, “Papa. Botong ada puasa. Yohanis pung orang dong ju puasa. Ma, akurang ko Papa pung ana bua dong sonde puasa?”
19 Ju Yesus manyao, bilang, “Memang bosong su tau, kalo ada pesta kawin, tamu dong sonde puasa, ma dong makan kinyang. Kalo baroit laki-laki masi ada di situ, tantu dong samua makan rame-rame.
20 Ma nanti satu kali, kalo orang laen tangkap bawa itu baroit laki-laki dolo, dia pung tamán dong rasa susa, baru dong puasa.”
21 Ais ju Yesus tamba satu umpama, bilang, “Orang sonde tempel ko jaet kaen baru di baju lama. Te nanti kalo cuci, itu kaen baru takundur, ko bekin tamba tarobe lai itu baju lama.
22 Sama ju, ke orang sonde isi tuak baru pi dalam haik yang su lapuk. Te nanti itu haik pica, ju itu tuak malele buang. Jadi, tuak baru musti po'a pi dalam haik yang baru.” [Bagitu Yesus ajar sang dong, bilang, Dia pung ajaran baru, jang kasi campor deng orang Farisi dong pung ajaran lama.]
Tuhan Yesus pung ana bua dong ketu ame padi-gandum pas deng hari barenti karjá
(Mateos 12:1-8; Lukas 6:1-5)
23 Satu kali, pas deng orang Yahudi pung hari sambayang, Yesus ada jalan lewat iko kabón. Ju Dia pung ana bua dong ketu ame padi-gandum ko makan.
24 Ma orang Farisi dong dapa lia, ais ju dong kasi tau sang Yesus, bilang, “Akurang ko lu pung ana bua dong langgar kotong pung atoran agama? Dong ada ketu padi-gandum pas deng hari barenti karjá! Bosong sonde bole bekin bagitu!”
25-26 Dia manyao, bilang, “Karmana, ó? Bosong sonde inga ba'i Daud pung carita tu. Itu waktu, bapatua Abiatar jadi kapala agama Yahudi dong pung bos bésar. Ba'i Daud deng dia pung ana bua dong pung parú su karoncong sampe lapar mo mati. Ju dong maso pi dalam Tuhan Allah pung Tenda Sambayang, ko ame itu roti yang kapala agama dong su kasi sang Tuhan, ko dong makan. Padahal cuma kapala agama dong sa yang bole makan, ma orang laen sonde bole. Ais ba'i Daud dong makan, ma sonde ada orang kasi sala sang dong.”
27 Ju Yesus kasi tau tamba, bilang, “Bosong jang lupa, bilang, Tuhan Allah bekin hari barenti karjá ko jadi berkat, ko tolong kotong manusia. Ma Dia sonde bekin kotong manusia ko cuma iko hari barenti karjá pung atoran sa.
28 Jadi Beta ni, Manusia Tulen. Beta ni yang ada pung hak ko bilang manusia bole, ko sonde bole bekin apa-apa pas deng hari barenti karjá.”