9
1 Bosong jang lupa Beta pung omong ni. Ada yang dari bosong samua ni, yang balóm mati, ma nanti dapa lia Tuhan Allah ada pegang parenta deng kuasa bésar.”
Tuhan Yesus jadi laen, deng Dia pung pakean mangkilat di atas gunung
(Mateos 17:1-13; Lukas 9:28-36)
2 Abis anam hari ju, Yesus minta sang Petrus, Yakobis, deng Yohanis, ko dong sama-sama pi nae di atas satu gunung tinggi yang sonde ada orang. Waktu dong sampe di atas, dong lia Yesus su jadi laen.
3 Deng Dia pung pakean su jadi puti mangkilat. Di ini dunya sonde ada barang yang lebe puti dari Dia pung pakean tu.
4 Takuju sa, ju dong dapa lia Yesus ada ba'omong deng ba'i Elia deng ba'i Musa.
5-6 Petrus dong taku mo mati. Ju Petrus su bingung sa, sampe dia omong sambarang bagitu. Ais dia kasi tau sang Yesus, bilang, “Papa! Botong enak di sini, é! Jadi lebe bae botong bekin tiga lopo. Satu kasi sang Papa, satu kasi ba'i Musa, deng satu lai kasi ba'i Elia.”
7 Abis itu, ju awan turun datang ko tutu ame sang dong. Ju dong dengar suara kaluar dari itu awan, bilang, “Dengar, ó! Yesus ni, Beta pung Ana sayang. Bosong dengar bae-bae sang Dia sa!”
8 Waktu Petrus dong dengar itu suara, dong lia kuliling, ma takuju dong sonde dapa lia orang laen lai. Cuma Yesus sandiri sa.
9 Abis itu, Yesus deng dia pung ana bua dong jalan turun dari itu gunung. Ju Yesus pasán sang dong, bilang, “Apa yang bosong baru lia tadi tu, bosong jang kasi tau sapa-sapa. Beta ni, Manusia Tulen. Beta musti mati dolo. Ais, nanti kalo Beta su idop kambali, baru bosong bole kasi tau orang.”
10 Dong pegang bae-bae Yesus pung pasán tu, ju dong sonde kasi tau orang. Ma dong tiga mulai batanya sandiri, bilang, “Dia pung maksud apa, bilang, Dia mau ‘idop kambali dari Dia pung mati’ tu? Karmana, é?”
11 Ju dong tanya sang Dia, bilang, “Guru agama dong bilang, ‘Ba'i Elia musti datang dolo, baru Kristus datang.’ Ma iko Papa, karmana?”
12 Yesus manyao, bilang, “Memang batúl. Ba'i Elia musti datang dolo ko buka jalan kasi Kristus, itu Orang yang Tuhan Allah su tunju dari dolu. Ma karmana? Bosong balóm mangarti apa yang dong su tulis di Tuhan Allah pung Tulisan Barisi so'al itu Manusia Tulen, ko? Te dong su tulis memang, bilang, nanti kalo Dia su datang, na, orang bekin susa sampe dong mau bunu mati sang Dia.
13 Ma bosong musti pasang talinga bae-bae ó! Itu ba'i Elia memang su datang. Ma orang bekin susa sang dia, iko dong pung mau. Itu ju pas deng apa yang ba'i-ba'i dong su tulis memang dari dolu.”
Tuhan Yesus bekin bae ana yang takaná setan jahanam
(Mateos 17:14-21; Lukas 9:37-43a)
14 Waktu Yesus deng Dia pung ana bua tiga orang tu, bakatumu kambali deng ana bua laen, dong dapa lia orang banya ada bakumpul. Itu orang banya dong ada datang ko lia Yesus pung ana bua laen bakanjar deng guru agama dong.
15 Waktu orang banya dong dapa lia sang Yesus, dong takuju, te dong kira Dia masi ada di atas gunung. Ais dong lari pi katumu deng Dia.
16 Ju Yesus tanya sang dong, bilang, “Bosong ada bakanjar apa di sini?”
17 Ada satu orang datang, bilang, “Papa, dengar dolo! Beta ada bawa beta pung ana laki-laki, ko Papa bekin bae sang dia. Dia bisu, sonde bisa ba'omong, te dia takaná setan.
18 Kalo itu setan su maso, na, dia banting-banting ini ana pung badan di tana. Abis, itu ana pung mulu babusa, deng dia makan gigi. Ais dia pung badan bakaku sama ke kayu. Beta su minta Papa pung ana bua dong, ko tolong usir itu setan. Ma dong sonde bisa apa-apa.”
19 Dengar bagitu, ju Yesus masparak sang dong, bilang, “Hee! Bosong ni, su talalu! Beta su ajar ulang-ulang sang bosong, ma bosong sonde mangarti bae-bae. Deng bosong sonde parcaya batúl-batúl sang Beta! Beta musti sabar sang bosong sampe kapan? Mari bawa itu ana datang di sini!”
20 Ais dong koko bawa itu ana datang sang Yesus. Ma waktu itu setan dapa lia sang Yesus, ju dia banting itu ana sampe jato taguling-guling di tana, deng dia pung mulu babusa.
21 Ais ju Yesus tanya itu ana pung papa, bilang, “Lu pung ana jadi bagini ni, su dari kapan tempo?”
Dia pung papa manyao, bilang, “Su dari kici.
22 Itu setan su lama mau kasi mati sang ini ana. Dia kasi jato beta pung ana ulang-ulang pi dalam api, deng kasi tanggalám pi dalam aer. Jadi Papa tolong dolo! Kalo bisa, Papa kasian sang botong ko bekin bae ini ana dolo.”
23 Yesus manyao, bilang, “Akurang ko lu bilang ‘kalo bisa’? Beta memang bisa bekin samua, asal orang parcaya dolo!”
24 Ais itu, bapatua manyao deng mau manangis sa, bilang, “Papa! Memang beta su parcaya. Ma tolong ko beta pung parcaya jadi lebe kuat lai!”
25 Itu waktu, Yesus lia banya orang su mulai datang makarubu di situ. Ais dia parenta itu setan, bilang, “He, setan jahanam! Lu kaluar suda dari ini ana, ko dia dapa dengar, deng dia dapa ba'omong. Lu jang maso ulang lai sang dia!”
26 Dengar Yesus omong bagitu ju, itu setan batarea karás-karás. Dia bekin itu ana jato tahela-hela, baru kaluar kasi tenga sang dia. Ju itu ana faraku sama ke su mati sa. Sampe orang dong di situ ba'omong, bilang, “Naa! Dia su mati!”
27 Ma Yesus pegang ame itu ana pung tangan ko tolong kasi bangun sang dia. Ju dia bangun memang.
28 Ais Yesus deng dia pung ana bua dong kasi tenga itu tampa, ko maso pi dalam satu ruma. Di situ dong sandiri tanya sang Yesus, bilang, “Papa! Akurang ko tadi botong sonde bisa usir itu setan?”
29 Ais Yesus kasi tau, bilang, “Dengar bae-bae! Setan dong memang jahat. Jadi, kalo bosong sonde sambayang minta tolong sang Tuhan, na, bosong sonde ontong usir setan macam bagitu.”
Tuhan Yesus kasi tau ulang lai Dia pung mati
(Mateos 17:22-23; Lukas 9:43b-45)
30 Abis itu, Yesus deng Dia pung ana bua dong kasi tenga itu tampa, ko maso pi propinsi Galilea. Itu waktu, Yesus sonde mau ada orang yang tau Dia ada di situ,
31 te Dia cuma mau ajar sang Dia pung ana bua sa. Dia kasi tau sang dong, bilang, “Sonde lama lai, te dong mau jual sang Beta pi orang laen. Ais dong bunu bekin mati sang Beta, Manusia Tulen ni. Memang Beta mati, ma nanti dia pung lusa, Beta idop kambali.”
32 Yesus kasi tau bagitu, ma Dia pung ana bua dong babingung. Dong sonde barani tanya lai Yesus pung maksud tu, apa.
Tuhan Yesus pung ana bua dong bakanjar, bilang, sapa yang paling bésar
(Mateos 18:1-5; Lukas 9:46-48)
33 Abis itu, ju Yesus dong jalan sampe di Kapernaum. Waktu dong maso pi dalam ruma, ju Yesus tanya sang Dia pung ana bua dong, bilang, “Tadi bosong bakanjar apa di jalan tu?”
34 Ma sonde ada yang barani manyao, te di tenga jalan dong ada basambung mulu, bilang, sapa yang paling bésar dari dong samua.
35 Ais Yesus dudu ko ajar sang dong, bilang, “Sapa yang mau jadi orang bésar, dia pung idop musti batúl-batúl jadi sama ke orang kici ko layani samua orang.”
36 Ais Yesus koko ame satu ana kici di situ, ko Dia kambali pi dong pung teng-tenga. Ju Dia omong, bilang,
37 “Sapa yang iko Beta ko layani orang kici sama ke ini ana, dia pung arti, itu orang ju ada layani sang Beta. Deng dia ju ada layani sang Beta pung Papa yang utus sang Beta datang di ini dunya.”
Sapa yang jadi kotong pung orang?
(Lukas 9:49-50)
38 Abis itu, Yesus pung ana bua Yohanis, kalák, bilang, “Papa! Satu kali, botong lia ada satu orang pake Papa pung nama ko usir setan. Ma botong larang sang dia, te dia bukan kotong pung orang na.”
39 Ma Yesus manyao, bilang, “Hee! Bosong jang larang sang dia. Te sapa yang pake Beta pung nama ko bekin tanda heran, dia sonde akan omong bekin busuk Beta pung nama.
40 Kalo dia sonde malawan sang kotong, artinya dia ju kotong pung orang.
41 Naa, inga bae-bae, ó! Kalo ada orang yang tau, bilang, bosong iko sang Kristus, ais dia tolong sang bosong, tantu Tuhan Allah sonde lupa itu orang pung cape. Biar dia cuma kasi minum aer puti satu galás sa, ju Tuhan Allah sonde lupa sang dia.”
Jang maen-maen deng dosa!
(Mateos 18:6-9; Lukas 17:1-2)
42 Ais Yesus kasi tau lai sang dong, bilang, “Kalo ada orang yang bekin satu ana kici iko jalan idop yang sala, sampe itu ana sonde parcaya lai sang Beta, awas, ó! Lebe bae kasi itu orang, kalo ame batu bésar satu, ika di dia pung batang leher, ko kasi tanggalám di tenga laut.
43 Kalo lu bekin sala pake lu pung tangan, potong buang itu tangan sa! Te lebe bae lu maso sorga biar bawa tangan sablá sa, daripada dong buang sang lu pi api naraka deng lu pung tangan dua-dua.
44 [Naraka tu, memang tampa sangsara. Dia pung api sonde tau mati na. Deng ulat-ulat di situ dong ju sonde barenti bekin busuk.]
45 Kalo lu bekin sala pake lu pung kaki, potong buang itu kaki sa. Te lebe bae lu maso sorga bawa lu pung kaki sablá sa, daripada dong buang sang lu pi api naraka deng lu pung kaki dua-dua.
46 [Naraka tu, memang tampa sangsara. Dia pung api sonde tau mati na. Deng ulat-ulat di situ dong ju sonde barenti bekin busuk.]
47 Kalo lu bekin sala pake lu pung mata, do'i buang lu pung mata sa! Te lebe bae lu maso pi sorga deng mata sablá sa, daripada dong buang sang lu pi api naraka deng lu pung mata dua-dua.
48 ‘Naraka tu, memang tampa sangsara.
Dia pung api sonde tau mati na.
Deng ulat-ulat di situ dong ju sonde barenti bekin busuk.’
49 Beta pung ajaran ni, memang barát. Jadi sapa yang mau iko sang Beta, dia musti batahan iko tarús, sama ke daging yang orang taro garam ko se'i pake api, ko biar itu daging batahan lama.
50 Garam tu, bae. Kotong pake ko bekin enak makanan. Ma kalo itu garam sonde asin lai, dia pung guna apa? Kotong buang sa. Bosong ju musti jadi sama ke garam, ko idop basayang deng samua orang.
Naa! Bosong barenti bakanjar, bilang, sapa bésar, sapa kici!”