22
Tuhan Yesus kasi umpama so'al orang yang sonde mau datang di pesta kawin
(Lukas 14:15-24)
1 Ais Yesus omong lai deng dong pake umpama, bilang,
2 “Tuhan Allah pung pegang parenta tu, sama ke satu raja yang ada bekin pesta kawin kasi sang dia pung ana laki-laki.
3 Waktu pesta su siap, ju dia suru dia pung hamba ko pi kasi tau orang-orang yang kaná undang dong, bilang, ‘Mari, te acara su mau mulai.’ Ma itu orang dong sonde mau datang.
4 Ais, itu hamba dong pulang ko lapor sang raja. Dengar bagitu ju, itu raja suru dia pung hamba yang laen dong, bilang, ‘Bosong pi kasi tau itu orang dong, ko datang su, te pesta su siap. Beta su potong sapi, deng su masa ena-ena. Suru dong datang makan pesta, te samua su siap ni.’
5 Itu hamba dong pi kasi tau bagitu. Ma itu orang yang kaná undang dong sonde mau toe. Ada yang pi kabón, ada yang pi di dong pung tampa karjá,
6 deng ada yang tangkap itu raja pung hamba dong, ko siksa sampe mati.
7 Dengar bagitu, ju itu raja mara mo mati. Ais dia suru dia pung tantara dong ko pi bunu itu orang-orang yang su bunu dia pung hamba dong. Ais, itu tantara dong bakar itu kota sampe rata deng tana.
8 Ais ju, itu raja pange dia pung hamba yang laen dong deng kasi tau, bilang, ‘Pesta kawin su siap, ma orang-orang yang beta su undang tu, sonde pantas iko beta pung pesta.
9 Sakarang, bosong kaluar pi di jalan rame dong, ko undang sapa sa yang bosong katumu di situ.’
10 Ais, itu hamba dong pi di jalan rame dong. Dong bawa datang banya orang yang dong katumu di situ, ko pi di pesta kawin tu. Ada orang bae deng ada orang jahat yang datang bekin ponu itu tampa pesta.
11 Ais, itu raja maso pi di tampa pesta ko lia kuliling dia pung tamu dong. Ju dia dapa lia satu tamu yang sonde pake pakean pesta.
12 Ais itu raja tanya, bilang, ‘He, tamán! Akurang ko lu maso di sini sonde pake pakean pesta?’ Ma itu orang babingung bodo sa.
13 Tarús itu raja parenta sang dia pung ana bua dong, bilang, ‘Ika ini orang pung kaki deng tangan, ko angka buang sang dia pi luar. Biar ko dia manangis deng sangsara di tampa galáp sana.’
14 Bagitu ju, Tuhan Allah undang banya orang, ma Dia cuma pili sadiki sa ko jadi Dia pung orang.”
Tuhan Yesus omong so'al bayar pajak kasi pamarenta
(Markus 12:13-17; Lukas 20:20-26)
15 Dengar abis Yesus pung omong bagitu, ju orang Farisi dong ba'akór ko mau hiki deng tudu sang Dia.
16 Ais dong suru dong pung ana bua sama-sama deng orang dari Herodes pung partei politik, ko pi baso'al deng Yesus. Dong angka-angka nae sang Dia, bilang, “Bapa Guru! Botong tau Bapa pung hati lurus. Bapa sonde tau putar-balek deng sonde pili muka. Bapa salalu ajar Tuhan Allah pung Kata-kata deng batúl.
17 Sakarang, botong mau tanya satu hal. Iko kotong pung atoran agama Yahudi, kira-kira kotong musti bayar pajak kasi pamarenta Roma pung raja bésar, ko sonde?”
18 Ma Yesus su tau dong mau pancing sang Dia, ko Dia omong malawan pamarenta Roma. Ju Dia manyao, bilang, “Dasar orang muka-balakang! Akurang ko bosong mau hiki sang Beta deng itu so'al?
19 Coba kasi lia sang Beta doi perak satu yang orang pake ko bayar pajak!” Ju dong kasi tunju satu doi perak sang Dia.
20 Ais Dia tanya sang dong, bilang, “Ini sapa pung gambar ni? Deng ini sapa pung nama ni?”
21 Dong manyao, bilang, “Itu keser, pamarenta Roma pung raja bésar tu.”
Ju Yesus kasi tau sang dong, bilang, “Naa! Kalo bagitu, bosong pi kasi sang pamarenta apa yang pamarenta pung hak. Deng kasi sang Tuhan Allah apa yang jadi Tuhan Allah pung hak.”
22 Dengar Dia manyao bagitu, ju dong samua taheran-heran, ko Dia bilang batúl na. Andia ko dong sonde bisa hiki sang Dia. Ju dong jalan kasi tenga sang Dia.
Tuhan Yesus ajar so'al orang mati idop kambali; deng orang bakawin di sorga, ko sonde?
(Markus 12:18-27; Lukas 20:27-40)
23 Di situ ada ju orang dari partei Saduki. Orang dari ini partei Saduki ni, ajar, bilang, orang mati sonde idop kambali. Itu hari, dong ju cari jalan ko mau hiki sang Yesus. Andia ko dong datang baso'al deng Dia, bilang,
24 “Bapa Guru! Ba'i Musa su tulis kasi tenga sang kotong, ini adat bilang: kalo ada satu laki-laki mati kasi tenga dia pung bini, ma sonde ada ana, na, itu laki-laki pung adi musti kawin ame itu janda, ko biar kasi turunan sang dia pung kaka yang su mati tu.
25 Memang, dolu ba'i Musa ajar bagitu, ma sakarang botong ada mau tanya bagini: ada tuju laki-laki basodara. Yang partama kawin, ma dia mati, deng sonde kasi tenga ana. Ju dia pung adi yang iko sang dia, kawin bale itu janda.
26 Sonde lama lai dia ju mati, deng sonde ada ana. Bagitu ju deng adi yang nomer tiga; dia kawin deng itu janda, ma dia ju mati, deng sonde kasi tenga ana. Bagitu tarús-tarús sampe adi bungsu ju mati.
27 Abis ju, itu janda mati.
28 Naa! Sakarang botong mau tanya bagini: itu parampuan su parná kawin deng tuju laki-laki. Nanti kalo dunya kiamat, ais Tuhan kasi idop kambali orang mati dong, itu parampuan jadi sapa pung bini?”
29 Ais Yesus manyao, bilang, “Kalo bosong batanya bagitu, na, bosong su sala bésar ni! Te bosong sonde mangarti Tuhan Allah pung Tulisan pung isi. Deng bosong ju sonde mangarti Dia pung kuasa yang hebat!
30 Yang batúl, bagini. Nanti, kalo Tuhan Allah kasi idop kambali orang mati, dong ju sonde bakawin lai, sama ke Dia pung ana bua di sorga.
31 Deng Beta ju mau omong so'al orang mati bisa idop kambali, ko sonde. Dalam ba'i Musa pung tulisan ada carita pohon kici yang tabakar ma sonde angus. Dari itu carita, kotong dapa tau, bilang, orang mati bisa idop kambali. Te di situ Tuhan Allah kasi tau sang ba'i Musa, bilang,
32 ‘Beta ni, lu pung ba'i-ba'i pung Tuhan Allah.
Andia ba'i Abraham, ba'i Isak, deng ba'i Yakob.
Dong samua sémba tarús sang Beta sampe sakarang.’
Naa! Kotong tau, bilang, waktu Tuhan omong bagitu, itu ba'i dong su lama mati. Ma Tuhan Allah bilang Dia masi tarús jadi dong pung Tuhan. Andia ko kotong tau, bilang, dong pung jiwa ada idop tarús, biar dong su lama mati. Jadi biar orang mati, ma dia idop kambali. Te cuma orang idop yang sémba sang Tuhan Allah, bukan orang mati, to?!”
33 Dengar Yesus ajar bagitu, ju itu orang Saduki dong sonde bisa balas apa-apa lai. Ma itu orang banya dong ada taheran-heran deng ba'omong, bilang, “Awii! Ini Orang pung ajaran talalu hebat, ó!”
Tuhan Yesus ajar so'al parenta yang paling pantíng
(Markus 12:28-34; Lukas 10:25-28)
34 Waktu orang Farisi dong dengar, bilang, Yesus su ontong sang itu orang Saduki dong, ju dong bakumpul rame-rame ko mau baso'al deng Dia.
35 Dong pung ahli agama satu mau hiki coba sang Dia, bilang,
36 “Bapa Guru! Beta mau tanya bagini: kotong pung adat pung atoran, deng agama pung parenta dong, banya sakali. Dari samua parenta yang datang dari ba'i Musa tu, yang mana yang paling pantíng?”
37 Ju Dia manyao, bilang, “Parenta yang paling pantíng dalam Tuhan Allah pung Tulisan Barisi tu, bilang, bagini:
‘Tuhan Allah tu, bosong pung Allah.
Jadi, bosong musti sayang sang Dia lebe dari samua.
Tagal itu, bosong musti salalu rindu sang Dia,
mangarti sang Dia,
deng karjá karás ko iko Dia pung mau.’
38 Itu parenta tu, yang paling pantíng deng paling hebat!
39 Deng ada parenta nomer dua yang bilang bagini:
‘Lu musti sayang orang laen dong, sama ke lu sayang lu pung diri sandiri.’
40 Ini dua parenta ni, andia pohon dari ba'i Musa pung atoran deng Tuhan Allah pung jubir dong pung ajaran samua. Orang sonde mungkin iko parenta yang laen dong, kalo dia sonde iko lebe dolo ini dua parenta bésar ni.”
Kristus tu, memang raja Daud pung turunan, ma Dia ju jadi raja Daud pung Bos
(Markus 12:35-37; Lukas 20:41-44)
41 Waktu itu orang Farisi dong masi ada bakumpul di situ, ju Yesus so'al bale sang dong, bilang,
42 “Dari dolu-dolu Tuhan Allah su janji kirim Kristus ko kasi salamat Dia pung orang dong. Naa, iko bosong pung pikiran, Kristus tu, sapa pung turunan?”
Ju dong manyao, bilang, “Dia tu, raja Daud pung turunan.”
43 Yesus omong tamba, bilang, “Kalo bagitu, na, akurang ko Tuhan Allah pung Roh Barisi kasi tau sang raja Daud ko dia pange sang Kristus tu, ‘Bos’? Te Daud su tulis, bilang,
44 ‘Tuhan Allah su kasi tau sang beta pung bos, bilang,
“Mari ko dudu di Beta pung sablá kanan, di tampa yang paling hormat ni.
Te nanti Beta bekin lu pung musu dong, sampe dong ta'alok sang lu.’ ”
45 Naa! Dari itu tulisan, kotong dapa tau, bilang, raja Daud sandiri yang pange sang Kristus tu, ‘Bos’. Jadi, kalo orang bilang Kristus tu, cuma raja Daud pung turunan sa, itu balóm cukup! Tagal Dia ju jadi raja Daud pung Bos na!”
46 Dengar Yesus pung omong bagitu, ju itu orang Farisi dong jadi tabodo-bodo sa, te sonde ada satu orang ju yang bisa manyao sang Yesus. Andia ko mulai dari itu hari ju, dong su taku batanya-batanya, deng dong sonde barani hiki coba sang Dia lai.