5
Tuhan Yesus ajar di atas gunung
1 Waktu Yesus dapa lia orang bam-banya datang iko sang Dia, ju Dia nae pi di satu gunung kici, ko dudu di situ. Dia pung ana bua dong yang Dia su pili tu, datang deka-deka ko dengar sang Dia.
2 Ais Dia mulai ajar sang dong, bilang,
Orang yang dapa ontong batúl-batúl
(Lukas 6:20-23)
3 “Orang kasian dong ontong,
tagal Tuhan Allah sandiri tu, dong pung Raja yang bae.
4 Orang yang rasa dukacita dong ontong,
tagal Tuhan Allah sandiri yang kokoe sang dong.
5 Orang kici dong ontong,
tagal nanti dong tarima samua berkat yang Tuhan Allah su janji.
6 Orang yang talalu rindu sang Tuhan Allah dong ontong,
tagal nanti Dia bekin puas sang dong.
7 Orang yang kasi tunju rasa kasian dong ontong,
tagal nanti Tuhan Allah ju jato kasian sang dong.
8 Orang yang pung hati barisi dong ontong,
tagal nanti dong sandiri dapa lia Tuhan Allah.
9 Orang yang tukang bekin dame tu, dong ontong,
tagal nanti Tuhan Allah bilang, ‘Dong tu, Beta pung ana.’
10 Orang yang kaná siksa tagal iko sang Tuhan Allah dong ontong,
tagal Tuhan sandiri tu, dong pung Raja yang bae.
11 Kalo orang laen bekin sangsara sang bosong tagal bosong iko sang Beta, bosong ju ontong. Kalo dong omong jahat sang bosong, deng bacarita putar-balek bekin busuk bosong pung nama, bosong ju ontong.
12 Biar bagitu, ma bosong musti bekin diri sanáng deng hati babunga sa, tagal Tuhan Allah su sadia balas kasi bosong pung bagian, satu mal'unuk di sorga. Ma inga, é! Bukan cuma bosong sa yang dapa sangsara bagitu, te dolu-dolu orang dong ju bekin jahat bagitu sang Tuhan Allah pung jubir dong.”
Orang yang iko Tuhan Yesus, sama ke garam deng taráng
(Markus 9:50; Lukas 14:34-35)
13 “Kalo kotong mau bekin enak makanan, na, kotong parlú taro garam dolo. Bagitu ju orang-orang yang idop di ini dunya, dong parlú sang bosong. Ma kalo garam su jadi tawar, na, dia pung guna apa? Cuma angka buang di jalan ko kaná inja sa.
14 Bosong ju musti idop sama ke lampu, ko biar orang banya dapa lia deng bae-bae. Bosong musti manyala taráng-taráng, sama ke kota yang ada di atas gunung, yang samua orang dapa lia.
15 Orang yang kasi manyala lampu te'oek, sonde kasi maso itu lampu pi dalam pareu tana. Dong taro itu lampu di tampa tinggi, ko bisa bekin taráng ruma pung isi samua.
16 Bosong ju musti idop bagitu. Bosong musti bacaya, ko biar orang laen dong dapa lia bosong pung idop yang bae. Deng lia bagitu nanti dong puji sang Tuhan Allah, bilang, ‘We! Bosong pung Bapa di sorga tu, talalu hebat, ó!’ ”
Tuhan Yesus datang ko bekin ganáp Tuhan Allah pung atoran
17 “Bosong jang pikir, kata, Beta datang di ini dunya, ko mau hapus buang Tuhan Allah pung atoran yang Dia kasi sang ba'i Musa. Deng jang kira Beta sonde toe deng apa yang Tuhan Allah pung jubir dong su omong memang dari dolu. Te Beta datang ni, mau bekin samua jadi parsís sama ke samua hal yang dong su omong memang.
18 Tagal itu, dengar bae-bae, é! Langit deng bumi balóm bisa ancor buang, kalo samua balóm jadi iko Tuhan Allah pung atoran dong. Biar satu titi ko koma ju, sonde ada yang bisa tahapus buang.
19 Orang yang langgar Tuhan pung atoran, tagal dia pikir, bilang, ‘Hee! Ini atoran ni, kici sa, sonde ada pung guna apa-apa!’ Ais dia ajar bagitu kasi orang laen, nanti Tuhan Allah di sorga bekin dia jadi orang kici sa. Ma, orang yang bekin iko Tuhan Allah pung atoran samua, ais dia ajar bagitu kasi orang laen, nanti Tuhan Allah bekin dia jadi orang yang ada pung guna.
20 Parcaya sang Beta! Kalo bosong sonde idop lurus lebe bae dari itu guru agama deng orang partei Farisi dong, na, bosong sonde bisa maso jadi Tuhan Allah pung orang.”
Tuhan Yesus ajar orang dong ko jang bamara
(Lukas 12:57-59)
21 “Bosong su tau ba'i Musa pung atoran yang dia kasi tau memang sang kotong pung nene-moyang, bilang, ‘Jang bunu orang, te sapa yang bunu orang, nanti dia kaná hukum.’
22 Ma Beta mau kasi tau bagini: jang bamara, te sapa yang bamara deng dia pung sodara, nanti dia kaná hukum. Orang yang maruak sang dia pung sodara, bilang, ‘Lu otak kea!’ nanti itu orang musti mangada di muka tua-tua agama dong. Deng orang yang masparak sang dia pung sodara, bilang, ‘Bodo, é!’, nanti dia kaná hukum di api naraka.
23 Jadi, kalo lu ada bawa persembahan kasi sang Tuhan Allah, ma lu inga, bilang, lu ada bamara deng lu pung sodara,
24 na, jang taro itu persembahan dolo. Lu pi badame deng lu pung sodara dolo, ais itu baru lu pi taro itu persembahan kasi sang Tuhan Allah.
25 Kalo ada orang yang mau bekin parkara deng lu, na lebe bae lu pi urus dame capát-capát deng dia dolo. Kalo sonde, na, nanti itu orang hela bawa sang lu pi mangada di hakim. Ais hakim sarakan sang lu pi di polisi, ju dong sese maso sang lu pi dalam bui.
26 Beta omong batúl ni! Nanti lu tenga tarús dalam bui sampe bayar abis lu pung utang samua.”
Tuhan Yesus ajar orang ko jang maen serong
27 “Bosong su tau ba'i Musa pung atoran yang bilang, ‘Jang maen serong.’
28 Ma Beta mau kasi tau bagini: orang yang angka mata ko lia satu parampuan, ais dia pung hati kapingin tidor bakumpul deng dia, na, itu laki-laki tu su maen serong deng itu parampuan dalam dia pung hati.
29 Kalo lu bekin sala pake lu pung mata kanan, na, do'i buang sang dia sa. Te lebe bae lu maso pi dalam sorga deng lu pung mata satu sa, daripada dong lempar buang sang lu pi api naraka deng lu pung mata biji dua-dua.
30 Deng kalo lu bekin sala pake lu pung tangan kanan, na, potong buang itu tangan sa. Te lebe bae lu maso pi dalam sorga deng lu pung tangan satu sa, daripada dong lempar buang sang lu pi api naraka deng lu pung tangan dua-dua.”
Tuhan Yesus ajar ko jang bacere
(Mateos 19:9; Markus 10:11-12; Lukas 16:18)
31 “Bosong su tau ba'i Musa pung atoran, bilang, ‘Orang yang cere buang dia pung bini, na, dia musti kasi surat cere sang itu parampuan.’
32 Ma Beta kasi tau bagini: orang yang cere buang dia pung bini, padahal dia pung bini sonde parná maen serong, itu su sama deng dia cap dia pung bini, parampuan barsina. Deng kalo ada laki-laki laen kawin ame sang itu parampuan, na, dong dua su maen serong tu.”
Tuhan Yesus ajar so'al angka janji
33 “Bosong su tau ba'i Musa pung atoran yang dia kasi tau sang kotong pung nene-moyang dong, bilang, ‘Kalo lu angka janji pake sumpa deng Tuhan Allah pung nama, na, lu su ta'ika deng itu janji.’
34 Ma Beta kasi tau bagini: kalo lu angka janji, na, jang pake sumpa. Jang sumpa pake sorga pung nama, tagal sorga tu, Tuhan Allah pung tampa tenga.
35 Jang sumpa pake bumi pung nama, tagal bumi tu Tuhan Allah pung alas kaki. Deng jang sumpa pake Yerusalem, tagal Yerusalem tu, Raja Bésar pung kota.
36 Jang sumpa deng bosong pung kapala. Te bosong sonde ada pung kuasa ko parenta rambu satu daon ko jadi itam ko puti.
37 Jadi, kalo bosong mau angka janji, bilang, iya, na, kasi tau, bilang, ‘Iya’ sa. Ma kalo sonde, na, bilang ‘Sonde’ sa. Kalo bosong bilang laen dari itu, na, itu su ba'akar di setan.”
Tuhan Yesus ajar ko jang babalas jahat deng jahat, ma musti layani deng lebe bae lai
(Lukas 6:29-30)
38 “Bosong su tau ba'i Musa pung atoran, bilang, ‘Kalo ada orang bekin rusak lu pung mata, na, balas bekin rusak dia pung mata. Deng kalo ada orang bekin rubu lu pung gigi, na, balas bekin rubu dia pung gigi ju.’
39 Ma Beta kasi tau bagini: jang balas jahat deng jahat. Kalo orang tampeleng lu pung pipi sablá, na, kasi tenga ko dia tampeleng pipi yang laen lai.
40 Kalo ada orang yang mau bekin parkara deng lu, ko mau ame lu pung baju, na, kasi pi lu pung baju panas lai.
41 Kalo ada tantara satu paksa sang lu ko jalan pikol bawa dia pung barang satu kilometer, na, pikol bawa tarús sampe dua kilometer.
42 Kalo ada orang minta lu pung barang apa, na, kasi pi sa. Deng kalo ada orang yang mau pinjam lu pung barang apa, na, kasi pi sa.”
Tuhan Yesus ajar ko sayang orang yang binci sang kotong
(Lukas 6:27-28, 32-36)
43 “Bosong su dengar orang bilang, ‘Sayang sang lu pung sodara, deng binci orang yang binci sang lu.’
44 Ma Beta mau kasi tau bagini: lu musti sayang sang orang yang binci sang lu. Deng minta ko Tuhan kasi berkat sang orang yang bekin sangsara sang lu.
45 Kalo lu bekin bagitu, na, lu kasi tunju bilang, lu ni Bapa di sorga pung ana. Tagal Dia bekin matahari basinar kasi orang bae, deng Dia ju bekin matahari basinar kasi orang jahat. Dia ju kasi turun ujan kasi orang yang bekin iko Dia pung parenta sama-sama deng orang yang malawan Dia pung parenta.
46 Jadi, kalo lu cuma sayang sang orang yang sayang sang lu, na, lu kira Tuhan Allah musti balas deng berkat kasi sang lu, ko? Sonde! Te orang jahat ju sayang dong pung tamán yang sayang sang dong.
47 Jadi, kalo lu cuma kasi saloom sang lu pung tamán, na, dia pung lebe apa? Te orang yang sonde parcaya sang Tuhan Allah ju bekin bagitu.
48 Jadi inga, é! Lu pung Bapa di sorga sayang samua orang. Jadi lu ju musti bekin iko bagitu!”