1 Petrus
Petrus pung surat partama
1
Salam
1-2 Ini surat dari beta, Petrus, andia Yesus Kristus pung utusan.
Beta tulis ini surat kasi bosong samua yang Tuhan Allah su pili ame. Bosong ada idop tasiar pi banya tampa di propinsi Pontus, propinsi Galatia, propinsi Kapadokia, propinsi Asia, deng propinsi Bitinia.
Sodara sayang dong! Dari mula-mula, Allah Bapa su pili memang sang bosong ko jadi Dia pung orang. Dia pung Roh ju bekin bosong jadi barisi kasi sang Dia, ko biar bosong bisa bekin iko samua parenta yang Yesus Kristus ada kasi sang bosong. Deng kalo bosong bekin iko Dia pung parenta samua tu, itu sama ke Tuhan ada parcík Yesus pung dara di bosong, ko jadi tanda, bilang, bosong su jadi barisi kasi sang Dia.
Beta sambayang ko Tuhan Allah kasi tunju Dia pung hati bae sang bosong, ko biar bosong bisa idop tamba hari, tamba aman, dame, deng tanáng.
Kalo kotong parcaya sang Tuhan, kotong basandar sang Dia
3 Samua puji kasi sang Tuhan Allah! Dia tu, kotong pung Bos Yesus Kristus pung Bapa. Tagal Tuhan pung hati mas, andia ko Dia talalu kasian sang kotong. Yesus Kristus mati, ais Dia idop kambali. Jadi, kalo Kristus bekin kotong idop, Dia kasi kotong idop baru, sama ke kotong lahir kambali. Andia ko kotong parcaya sang Kristus tarús, te kotong baharap deng yakin, bilang, Dia nanti piara bae-bae sang kotong.
4 Kalo satu bapa mati, na, dia kasi tenga dia pung harta sang dia pung ana-ana dong. Bagitu ju, Yesus su simpan harta kasi kotong di langit. Ma itu harta sonde bisa rusak, sonde bisa ancor, deng sonde bisa ilang buang.
5 Bosong parcaya, bilang, Tuhan Allah ada pung kuasa ko tolong ame sang bosong. Dia piara sang bosong, deng jaga sang bosong, ko jang ada yang bekin ancor sang bosong. Deng nanti kalo dunya kiamat, Dia mau kasi tunju, Dia kasi salamat sang bosong deng cara karmana.
6 Andia ko bosong pung hati sanáng, biar sakarang bosong rasa barát tagal bosong musti kaná susa macam-macam.
7 Tuhan Allah kasi biar kotong dapa coba'an dong, ko mau uji kotong pung parcaya sang Dia. Kalo kotong lolos dari coba'an, itu kasi tunju, bilang, kotong pung parcaya tu, kuat deng batúl. Kotong bisa banding deng mas. Te kotong musti kasi panas mas dalam api, ko biar dia pung kotoran kaluar dolo, baru kotong dapa mas tulen. Padahal, iko Tuhan Allah pung pikir, kotong pung parcaya pung harga lebe mahal dari mas. Jadi, kalo kotong pung parcaya lolos dari coba'an bagitu, nanti waktu Yesus Kristus datang kambali, Tuhan Allah ju puji sang kotong, ais Dia kasi tunju kotong pung hebat, deng Dia hormat sang kotong.
8 Biar bosong balóm lia langsung sang Yesus, ma bosong sayang sang Dia. Biar bosong sonde lia sang Dia sakarang, ma bosong parcaya sang Dia. Bosong ju ada pung hati babunga lebe-lebe, biar sonde ada kata yang pas ko kasi tau orang so'al bosong pung hati sanáng.
9 Tagal bosong parcaya sang Dia, bosong pung upa tu, andia Tuhan Allah kasi salamat sang bosong dari bosong pung sala.
10 Tuhan Allah pung jubir dolu-dolu dong ada cari tau ko mau mangarti lebe bae, karmana Tuhan kasi salamat orang dari dong pung sala. Itu jubir dong kasi tau memang so'al Tuhan kasi tunju Dia pung hati bae sang bosong, tagal Dia su siap memang ko kasi salamat sang bosong.
11 Kristus pung Roh ada karjá dalam dong pung hati ko kasi tau memang, bilang, nanti Kristus musti kaná susa, deng jalan karmana Dia musti dapa sangsara, abis itu samua, baru Tuhan angka tinggi-tinggi sang Dia. Andia ko itu jubir dong mau cari tau kapan ini hal dong jadi.
12 Ais, Kristus pung Roh tu, ju kasi tau sang itu jubir dong, bilang, bukan dong, ma bosong yang dapa lia ini hal dong. Naa, sakarang bosong ju dapa dengar so'al ini hal dong, tagal Tuhan pung Roh Barisi dari sorga su kirim orang laen ko pi kasi tau Tuhan pung Kabar Bae sang bosong. Padahal, Tuhan pung ana bua dari sorga dong ju ada kapingin mau lia ini hal dong.
Tuhan suru ko kotong idop barisi
13 Andia ko bosong musti siap sadia ko mangarti bae-bae ini hal dong samua. Jaga bae-bae ko bosong pikir lurus. Siap sadia ko parcaya tarús sang Yesus Kristus sampe Dia datang kambali. Tagal itu waktu, Tuhan mau kasi tunju Dia pung hati bae sang bosong.
14 Bosong musti dengar-dengar sang Tuhan Allah, sama ke ana-ana dengar-dengar sang dong pung mama-bapa. Dolu, bosong balóm mangarti Tuhan pung jalan idop yang batúl. Ma sakarang bosong su mangarti. Jadi, jang idop iko bosong pung kapingin bekin jahat lai. Te itu bosong pung jalan idop yang lama.
15 Andia ko sakarang bosong musti idop barisi. Te Tuhan tu, barisi. Dia yang pange ame sang bosong ko jadi Dia pung ana. Tagal itu, bosong musti barisi dalam bosong pung idop anteru.
16 Te ada tatulis dalam Tuhan pung Tulisan Barisi, bilang, “Bosong musti barisi, tagal Beta barisi.”
17 Bosong suka ba'omong deng Tuhan Allah sama ke Dia tu, bosong pung Bapa. Dia ju jadi Tukang Putus Parkara yang nanti pareksa tiap orang pung idop. Ma Dia putus orang pung parkara deng fer, deng sonde barát sablá. Andia ko bosong musti idop deng ati-ati. Te bosong sama ke orang asing yang tenga tahan di ini dunya sa.
18 Bosong su tau, bilang, Kristus su bayar putus ko tabús ame sang bosong dari bosong pung idop yang sonde ada pung ujung-pohon. Itu idop model bagitu tu, bosong tarima ame dari bosong pung nene-moyang dong, sama ke satu harta pusaka. Ma inga, te Kristus bayar kasi sang bosong sonde pake mas ko perak yang nanti ilang buang.
19 Ma Dia bayar kasi sang bosong pake Dia pung dara sandiri. Itu, mahal mo mati! Dia mati sama ke satu domba ana yang sonde parná bekin sala, yang dong horo jadi korban.
20 Waktu Tuhan Allah balóm bekin ini dunya, Dia su tau memang samua yang nanti Kristus bekin. Ma dolu, Tuhan Allah balóm kasi tunju Kristus sang orang di ini dunya. Baru sakarang ni, Dia kasi tunju Kristus, ko jadi berkat kasi bosong.
21 Tagal Kristus pung bekin, bosong bisa parcaya sang Tuhan Allah. Te Dia su kasi idop kambali sang Kristus, deng angka tinggi-tinggi sang Dia. Tuhan Allah bekin bagitu ko biar bosong parcaya sang Dia, deng baharap ko Dia bekin iko apa yang Dia su janji memang.
22 Bosong bekin iko apa yang batúl. Jadi sakarang bosong bisa karjá ukur kuat kasi sang Tuhan. Itu bekin bosong sayang batúl sang bosong pung sodara orang parcaya dong. Bosong pung sayang tu musti batamba kuat, tagal bosong pung hati barisi.
23 Sakarang, bosong su dapa idop baru. Ma ini idop baru ni, bosong sonde dapa dari bosong pung mama-bapa di ini dunya yang nanti mati, ma bosong dapa dari kotong pung Bapa di sorga yang sonde tau mati. Bosong pung idop baru ni, bosong dapa lewat Tuhan pung Kata-kata. Dia pung Kata-kata ni, ada bawa idop yang batúl, deng ada batahan tarús.
24 Te Tuhan pung Tulisan Barisi ada tulis, bilang,
“Manusia tu, sama ke satu rumput, ko, satu bunga.
Te dong pung bagus tu, sonde batahan tarús.
Rumput, layu buang.
Bunga ju, gugur buang.
Lai sadiki dong mati, ais ilang buang.
25 Ma kotong pung Bos pung Kata-kata,
batahan tarús, deng sonde tau putus-putus.”
Naa, Tuhan pung Kata-kata dong tu, andia itu Kabar Bae yang botong su kasi tau sang bosong.