4
Conto dari ba'i Abraham. Dia babae deng Tuhan tagal parcaya sang Dia
1 Jadi, kalo kotong lia conto dari botong orang Yahudi pung nene-moyang, ba'i Abraham, kotong bisa balajar apa, so'al jadi babae deng Tuhan tagal parcaya sang Kristus tu?
2 Kotong bisa balajar bagini: kalo Abraham bisa babae deng Tuhan tagal dia bekin hal yang bae, dia ju ada pung dasar ko bisa omong bésar di manusia pung muka. Ma di Tuhan pung muka, dia sonde bisa omong apa-apa.
3 Ma ada tatulis dalam Tuhan pung Tulisan Barisi, bilang,
“Tagal Abraham parcaya sang Tuhan Allah,
andia ko Tuhan cap sang dia, orang hati lurus yang babae deng Dia.”
4 Naa, orang yang karjá, tarima dia pung gaji. Itu gaji bukan doi parsén, ma doi yang bos bayar ko ganti itu orang pung cape. Te itu orang karjá pung hak.
5 Naa, Tuhan yang ada pung hak ko bilang, orang yang parcaya sang Yesus Kristus bisa babae kambali deng Dia, biar dolu itu orang su bekin sala deng sonde toe sang Tuhan. Sonde ada satu hal yang orang bisa bekin, ko dia babae deng Tuhan. Te orang musti parcaya sang Yesus Kristus, baru Tuhan cap sang dia ke orang hait lurus, deng tarima sang dia.
6 Raja Daud ju kasi tau, bilang, orang pung hati babunga waktu Tuhan Allah cap sang dong, bilang, dong tu, orang hati lurus, biar dong sonde bekin apa-apa ju. Te Daud tulis, bilang:
7 “Biar ini orang dong su langgar Tuhan pung Atoran,
ma Dia su hapus buang dong pung sala-sala.
Andia ko dong paling ontong!
Orang yang bekin jahat dong,
Tuhan su lupa buang dong pung sala-sala.
8 Te kalo Tuhan sonde ba'itong orang pung sala-sala,
na, itu orang ontong batúl!”
9 Naa, mangkali bosong ada pikir, bilang, cuma orang Yahudi yang sunat, yang bisa ontong ko babae deng Tuhan, wuang? Deng orang bangsa laen yang sonde sunat, sonde bisa, wuang? Sonde! Pikiran bagitu, sala! Andia ko botong su kasi inga sang bosong, bilang, tagal Abraham parcaya sang Tuhan, andia ko Tuhan cap sang dia, orang hati lurus yang babae deng Dia.
10 Kapan Tuhan cap sang Abraham bagitu? Waktu dia su sunat ko, waktu dia balóm sunat? Yang batúl, bukan waktu dia su sunat abis, ma waktu dia masi balóm sunat.
11 Batúl! Waktu Abraham balóm sunat, Tuhan Allah su cap sang dia, orang hati lurus yang babae deng Tuhan. Lama-lama, baru dia sunat ko jadi tanda, bilang, dia jadi orang yang parcaya sang Tuhan. Deng bagitu, Abraham yang buka jalan kasi samua orang yang parcaya sang Tuhan Allah. Te Tuhan tarima sang samua orang yang parcaya sang Dia, ko dong babae deng Dia, biar dong sunat, ko sonde.
12 Abraham ju buka jalan kasi botong orang Yahudi yang kaná sunat. Bukan tagal botong sunat, ma tagal botong parcaya sang Kristus, sama ke Abraham parcaya sang Tuhan waktu dia balóm sunat.
Kalo kotong parcaya sang Tuhan Allah, na, kotong tarima apa yang Dia janji
13 Tuhan Allah ada ika janji deng Abraham deng dia pung turunan, bilang, lama-lama dunya anteru jadi dong pung pusaka. Tuhan janji bagitu, tagal Abraham parcaya sang Dia, ais Tuhan cap sang dia, bilang, orang hati lurus yang babae deng Dia. Ma Tuhan sonde janji bagitu, tagal Abraham bekin iko Dia pung Atoran dong.
14 Te kalo orang yang cuma bekin iko Tuhan pung Atoran bisa tarima ame pusaka yang Tuhan janji tu, dia pung arti, bilang, parcaya sang Tuhan tu, parcuma sa. Deng Tuhan pung janji tu, ju sonde ada pung guna.
15 Di mana Tuhan pung Atoran ada, na, di situ kotong ju katumu orang yang langgar itu Atoran. Deng kalo orang langgar Dia pung Atoran, na, Tuhan mara, ais Dia hukum sang dong. Deng kalo Tuhan pung Atoran sonde ada, na, tantu sonde ada orang yang langgar itu Atoran.
16 Andia ko kotong musti parcaya sang Dia. Itu, lebe pantíng dari samua. Te Tuhan suka kasi tunju Dia pung hati bae deng pardeo sang orang yang parcaya sang Dia. Deng kalo kotong parcaya sang Dia sama ke Abraham, tantu kotong mau tarima apa yang Dia janji, biar kotong orang Yahudi yang bekin iko Dia pung Atoran, ko sonde. Jadi, kotong samua yang parcaya tu, sama ke Abraham pung turunan.
17 Dalam Tuhan pung Tulisan Barisi, Dia su janji sang Abraham, bilang, “Beta bekin ko lu jadi banya bangsa pung nene-moyang.” Abraham parcaya sang Tuhan Allah. Ais, lama-lama Tuhan Allah bekin jadi Dia pung janji. Dia ju yang kasi idop kambali orang mati. Dia cuma tenga omong sa, ko barang yang sonde ada, jadi memang.
18 Abraham parcaya sang Tuhan, deng tunggu-tunggu sang Dia, biar dia sandiri balóm ada ana. Andia ko Tuhan bekin sang dia jadi “banya bangsa pung nene-moyang.” Itu sama ke yang ada tatulis dalam Tulisan Barisi, bilang, “Turunan bam-banya nanti datang dari lu.”
19 Abraham parcaya kuat sang Tuhan, biar dia tau dia pung badan su tua kakaluk, su umur saratus taon. Deng Sara pung tampa ana karíng, deng dia ju su tua ganggók.
20 Ma Abraham pung parcaya sonde tagoyang, ko, pikir Tuhan sonde bisa bekin iko Dia pung janji. Dia pung parcaya sang Tuhan batamba kuat waktu dia angka tinggi-tinggi Tuhan pung nama.
21 Abraham yakin batúl-batúl, bilang, apa yang Tuhan su janji, Dia mampu bekin iko.
22 Andia ko Tuhan Allah cap sang Abraham, orang hati lurus yang babae deng Dia.
23 Ma Tuhan pung Tulisan Barisi bilang, Tuhan sonde itong bagitu kasi Abraham sandiri sa,
24 ma kasi kotong ju! Te kalo kotong parcaya sang Dia, Dia ju cap kotong orang hati lurus yang babae deng Dia. Tuhan tu, yang kasi idop kambali sang kotong pung Bos Yesus dari Dia pung mati.
25 Yesus mati, tagal kotong pung bekin sala. Ais ju, Dia idop kambali ko buka jalan ko biar kotong bisa babae kambali deng Tuhan Allah.