12
Ular naga baparáng lawan parampuan deng dia pung ana
1 Abis itu, takuju sa beta lia ada satu tanda luar biasa yang muncul di langit, yang manusia balóm parná lia: ada satu parampuan yang dia pung badan ada tabungkus deng matahari. Dia alas dia pung kaki di atas bulan. Dia pake topi raja yang ada 12 bintang.
2 Dia ada dudu parú, deng ada manangis, te dia su dapa saki mo barana.
3 Takuju sa, beta dapa lia lai satu tanda luar biasa laen yang muncul di langit. Ada satu ular naga mera yang bésar. Dia pung kapala ada tuju, deng dia pung tandok ada sapulu. Dia ada pake tuju topi raja di dia pung kapala dong.
4 Dia pake dia pung ekor ko sapu barisi kasi ilang satu bagian dari bintang-bintang di langit. Yang sisa, cuma dua bagian sa. Ais dia lempar buang itu bintang dong pi bumi. Tarús dia pi badiri mangada itu parampuan, ko tunggu-tunggu sampe dia barana. Te dia mau kodo memang itu ana.
5 Ais, itu parampuan barana ame satu Ana laki-laki. Ma Tuhan Allah pung ana bua satu dari sorga datang rampas ame itu Ana, ju bawa pi Tuhan ko itu Ana parenta sama-sama deng Tuhan Allah di sorga. Te itu Ana tu, nanti parenta samua bangsa di bumi deng kuasa yang paling hebat.
6 Ma itu parampuan lari pi satu tampa sunyi yang Tuhan su siap kasi dia. Nanti dong urus sang dia di situ sampe tiga taon satenga (andia, 1.260 hari).
Mikael baparáng lawan ular naga di sorga
7 Abis itu ju jadi paráng bésar di sorga. Tuhan Allah pung ana bua dari sorga deng dong pung panglima Mikael baparáng lawan itu ular naga deng dia pung ana bua dong.
8 Ju Mikael dong kasi kala itu ular naga deng dia pung ana bua dong. Ais itu dong larang itu ular naga deng dia pung ana bua dong, ko sonde bole tenga di sorga lai.
9 Tagal itu, dong usir buang sang dong dari sorga, ais lempar buang pi bumi. Itu ular naga tu, andia setan dong pung bos, yang dong bilang, ‘Iblis’. Dari mula-mula dia yang maen putar-balek manusia ko dong bekin sala.
10 Ais beta dapa dengar lai satu suara karás dari langit, bilang,
“Dolu itu ular naga badiri tarús di Tuhan pung muka.
Dia tu, tukang bawa mulu yang maen lempar sala kasi kotong pung sodara yang parcaya dong.
Dia maen tudu sang dong siang-malam.
Ma sakarang dia su talempar buang dari sorga.
Te sakarang dia pung waktu su sampe ko Tuhan kasi salamat sang manusia.
Sakarang Tuhan su pegang parenta deng Dia pung kuasa yang hebat.
Deng Dia su angka Kristus,
itu Orang yang Dia su pili ko jadi Raja kasi samua bangsa.
11 Kotong pung sodara orang parcaya dong su kasi kala itu ular naga yang dolu lempar sala kasi sang dong,
tagal Domba Ana pung dara su tumpa ko hapus dong pung sala-sala.
Dong ju kasi kala sang dia,
tagal dong barani kasi tau Tuhan pung Kata-kata.
Biar orang mara ko mau bunu sang dong ju,
dong sonde ondor.
12 Jadi, samua yang idop di sorga, musti sanáng!
Ma samua yang idop di bumi musti bajaga,
tagal calaka su mau jato kaná sang bosong.
Setan dong pung bos su turun datang di bosong.
Dia su mara mo mati,
tagal dia tau, bilang, dia pung waktu bekin jahat tu, su mau abis!”
Ular naga cari-cari sang itu parampuan di bumi
13 Waktu itu ular naga dapa tau, bilang, dia su tabuang di bumi, ju dia pi cari ko mau bekin susa sang itu parampuan yang su barana ame itu Ana.
14 Ma dong kasi itu parampuan dua sayap, sama ke burung garuda pung sayap, ko biar dia tarbáng pi sambunyi di itu tampa sunyi yang jao dari itu ular naga. Di situ dong urus sang dia sampe tiga taon satenga.
15 Lia bagitu, itu ular naga sumbur kasi kaluar aer sama ke banjer, ko mau sapu bawa itu parampuan.
16 Ma bumi tolong itu parampuan deng buka dia pung tana ko kodo abis itu aer yang malele kaluar dari itu ular naga pung mulu, ko biar itu aer jang sampe di itu parampuan.
17 Ais ju, itu ular naga mara mo mati sang itu parampuan. Jadi, dia kaluar ko pi baparáng lawan itu parampuan pung ana-ana laen dong, andia orang yang idop iko Tuhan Allah pung parenta, deng kasi tasiar tarús-tarús Yesus pung Kabar Bae.
18 Ais ju, itu ular naga pi badiri di laut pung pinggir, deng makan gigi.