15
Yohanis lia sorga pung isi
1 Ais itu, beta dapa lia satu hal di langit yang luar biasa, sampe beta heran mo mati. Ada tuju ana bua dari sorga, satu-satu pegang kuasa ko kirim calaka bésar pi bumi. Ini tuju calaka ni, andia calaka tarahir. Kalo dong samua su jadi, na, dia pung arti, bilang, Tuhan Allah pung hati su dingin, sampe Dia su sonde mara lai sang manusia.
2 Ais beta dapa lia laut yang manyala sama ke kaca yang tacampor deng api. Beta ju dapa lia banya orang yang badiri di itu laut pung pinggir. Dong tu, orang yang sonde iko itu binatang buas tu, sonde songgo dia pung patong, deng sonde tarima dia pung cap. Dong samua ada pegang alat musik sama ke sasando yang dong tarima dari Tuhan Allah.
3 Ais dong manyanyi satu lagu dari ba'i Musa, andia Tuhan Allah pung orang suru-suru dolu-dolu. Itu orang dong ju manyanyi satu lagu ko puji-puji sang Yesus. Te dolu orang bunu bekin mati sang Dia, sama ke orang bunu domba ana di Tuhan Allah pung Ruma Sambayang ko bekin dingin Dia pung hati. Dong manyanyi, bilang,
“Botong puji-puji Tuhan Allah!
Botong angka tinggi-tinggi Dia pung nama!
Tagal Tuhan pung kuasa, luar biasa.
Deng Tuhan pung hebat, talalu heran.
Tuhan su pegang parenta sang samua bangsa di bumi.
Tuhan su jadi Raja kasi samua suku di dunya.
Tuhan pung bekin, luar biasa!
Tuhan pung karjá, bagus batúl!
Tuhan pung jalan, lurus mo mati!
Tuhan pung idop, paling batúl!
4 Samua orang angka tinggi-tinggi Tuhan pung nama,
samua orang puji-puji Tuhan pung bae.
Tagal cuma Tuhan sandiri yang barisi.
Cuma Dia sandiri sa yang sonde ada pung sala.
Nanti samua bangsa datang sémba sang Tuhan.
Nanti samua suku datang minta tarima kasi sang Tuhan.
Tagal samua orang su lia Tuhan pung bekin yang bae.
Deng samua orang su tau Tuhan pung hati yang lurus.”
5 Waktu itu orang dong manyanyi abis, ju beta dapa lia itu Kamar yang Paling Barisi di Tuhan pung Ruma Sambayang di sorga, deng dia pung kaen pele ada tabuka lebar.
6 Ais beta lia itu tuju ana bua dari sorga yang bawa itu tuju calaka tu. Dong ada jalan kaluar dari Tuhan pung Ruma Sambayang. Dong pake pakean yang bacaya puti barisi, deng pake salempang dari mas tulen.
7 Tarús beta lia satu dari itu 4 binatang luar biasa yang ada di sablá Tuhan pung korsi parenta tu, bagi tuju bokor mas kasi sang itu tuju ana bua dong. Itu tuju bokor dong, satu-satu ta'isi deng hukuman dari Tuhan Allah. Dia yang ada tarús sampe salamanya. Te Dia su siap ko po'a Dia pung mara pi atas bumi.
8 Sonde lama lai ju, itu Ruma Sambayang su ponu deng asap yang kaluar dari Tuhan Allah pung hebat deng Dia pung kuasa. Sonde ada satu orang ju yang bisa maso pi situ. Itu tuju ana bua dong musti po'a bekin abis itu tuju calaka di bumi, baru orang bisa maso pi situ.