4
Pi kasi tau orang dong Tuhan Allah pung Kata-kata
1-2 Yesus Kristus nanti datang kambali di ini dunya ko pegang parenta sama ke raja. Bae orang yang masi idop, bae orang yang su mati dong, sama-sama mangada sang Dia, ko Dia putus dong pung parkara. Tagal itu, di muka Tuhan Allah deng Yesus Kristus, beta minta batúl-batúl sang lu ko pi kasi tau orang dong Tuhan Allah pung Kata-kata. Siap salalu! Sonde usa pikir dia pung waktu bae ko sonde. Kasi tunju orang pung sala. Ma togor bae-bae sang dong deng sabar. Kasi kuat orang pung hati pake ajaran yang batúl.
3 Te nanti beso-lusa, orang su sonde mau dengar lai ajaran yang batúl. Nanti dong kumpul ame guru-guru yang bisa omong iko dong pung mau, ko bekin enak dong pung talinga sa.
4 Dong sumbat dong pung talinga ko tola ajaran yang batúl. Ma dong pasang dong pung talinga ko dengar carita dongeng omong kosong dong!
5 Biar karmana ju, lu musti kalam sa. Bakuat dalam sangsara. Pi kasi tau Kabar Bae ko orang dong tarima sang Yesus Kristus. Layani orang deng hati sanáng sampe itu karjá abis. Jang satenga-satenga sa.
6 So'al beta pung diri, sonde usa pusing, te beta pung waktu mati su deka-deka. Sama ke galás, yang dia pung isi su mau amper kosong.
7 Ma beta su batanding deng bae. Beta su lari sampe di garis finis. Beta su iko tarús sang Yesus Kristus, deng sonde serong pi mana-mana.
8 Sakarang, cuma tenga satu hal yang beta ada tunggu-tunggu. Andia, piala juara yang kotong pung Bos su simpan kasi samua orang yang idop lurus. Kotong pung Bos tu, andia juri yang adil. Dia sonde tau barát sablá. Nanti pas deng dia pung waktu, Dia sarakan kasi beta itu piala juara. Deng bukan cuma beta sa. Samua orang yang sayang sang Dia, deng yang tunggu-tunggu Dia pung datang, dong ju dapa piala bagitu!
Paulus kasi pasán macam-macam hal
9 Tius, é! Datang capát-capát ko lia sang beta dolo!
10 Te sakarang beta sandiri-sandiri sa. Kreskes su barangkat pi di propinsi Galatia. Deng Titus su pi di da'era Dalmatia. Ma Demas su lebe cinta hal-hal yang sonde batúl di ini dunya, jadi dia su jalan kasi tenga sang beta, ko pi di kota Tesalonika.
11 Cuma Lukas sa yang ada tenga deng beta di sini. Cari ame sang Markus ko bosong dua datang sama-sama. Te dia bisa tolong macam-macam sang beta di sini.
12 Beta su kirim sang Tikikus pi di kota Efesus.
13 Kalo lu datang, na, jang lupa bawa beta pung baju panas yang beta ada kasi tenga di Karpus pung ruma di kota Troas. Deng jang lupa bawa beta pung tulisan dong, lebe-lebe yang ada tulis di kulit binatang tu.
14 Aleksander, tukang tambaga tu, su bekin jahat sonde sadiki sang beta. Kasi tenga pi, te nanti Tuhan yang balas sang dia, sama ke dia pung bekin-bekin tu.
15 Lu musti ati-ati deng itu orang, tagal dia suka malawan kotong pung kata-kata.
16 Waktu partama kali beta badiri di muka hakim ko bela beta pung parkara, sonde ada satu orang ju yang batamán deng beta. Dong samua jalan kasi tenga sang beta. Tenga pi sa! Biar ko Tuhan lupa buang dong pung sala sa.
17 Biar bagitu ju, ma Tuhan Allah sonde kasi tenga sang beta. Dia bekin kuat sang beta, ko biar beta bisa kasi tau Dia pung Kabar Bae deng sonde kurang satu apa ju. Beta kasi tau bagitu sang samua orang bukan Yahudi dong, ko dong dapa dengar itu Kabar Bae. Deng beta ju su talapás dari calaka bésar.
18 Deng Tuhan Allah nanti kasi lapás sang beta dari samua yang jahat. Deng Dia antar bawa sang beta deng salamat, maso pi dalam sorga. Di situ, Dia yang pegang parenta.
Tuhan tu, talalu hebat! Beta puji angka nae sang Dia sonde putus-putus pung! Amin.
Paulus konci dia pung surat
19 Jang lupa kasi salam sang susi Priskila, deng dia pung paitua, bu Akila. Bagitu ju deng Onesiforus pung kelu samua.
20 Erastus ada tenga di kota Korintus. Tempo hari, beta kasi tenga sang Trofimus di kota Miletus, te itu waktu dia ada saki barát.
21 Usaha ko musim dingin balóm datang, na, lu su sampe di sini. Tamán-tamán di sini dong, andia: Ebulus, Pudes, Linus deng susi Klaudia ada kirim salam kasi bosong. Bagitu ju deng sodara Kristen laen dong.
22 Beta harap Tuhan Allah ada sama-sama deng lu tarús. Biar ko Tuhan kasi tunju Dia pung hati bae sang bosong samua.
Bagitu sa,
Paulus