Kaheba Katilallasam natuli' Yohanes
Bätäna issinna
Inde suha' natuli' mesa passikolanna Puang Yesus to napakamaja (Yoh. 13:23; 19:26; 20:2; 21:2-7; 21:20-24). Situhu' passangainna to Sahani yolona, Yohanes-um too indo to untuli' inde suha'.
Illaam inde Kaheba Katilallasam, Puang Yesus disangai Kadanna Debata to inna deemmi mengkalao dio mai. Iam too mengkubalim mendadi hupatau anna tohho illaam alla'-alla'taa'. Kasuhunganna anna natuli' Yohanes inde suha' anna mala: “...ungkatappa'ia' muua Puang Yesus-um too indo To dilanti' la mepasalama', Änä'na Puang Allataala; anna la ullambi'koa' katuboam umpolalam indo kamatappasammua' lako kalena” (20:31).
Illaam hondongam 2-12 dituli' diona sanaka-naka tanda memängä-mängä napogau' Puang Yesus sola ingganna pepatuduanna. Ingganna ia too umpa'patandaam kalena anna mala diissam diua: Ia indo To dilanti' la mepasalama', to masäem napemmitai to Yahudi la sule, Änä'na Puang Allataala. Naitanna tau ingganna ia too, iya deem ungkatappa'i Puang Yesus, deem umbalii. Illaam hondongam 13-17 dipomakaleso dituli' maaka susi kasipakamajaanna Puang Yesus anna passikolanna illaam indo bengi la disakkam Puang Yesus. Dituli' toi diona kada pepakahanganna Puang Yesus lako passikolanna bengi eta too. Illaam hondongam 18-21 dituli' diona Puang Yesus disakka, dihotto', dipatei yabo kaju sitambem, tubo sule, anna umpa'paitaam kalena lako passikolanna.
Illaam 7:53-8:11 dituli' diona mesa baine to dilambi' ullullu' pa'bannetauam. Indo ingganna issinna balajam ia too dituli' illaam alla'na dua tanda ma'lekko susi inde: [...] aka tula' ia too umbai' tä'pi deem indo anna uhu-uhunai natuli' Yohanes inde suha'. Moinna anna susi, sapo' dipatama siam inde suha' aka masäem anna dipatamai suha' Battakada Debata.
Illaam inde suha', handam napaitoo'na Yohanes diona katuboam sule lako salako-lakona indo talambi' illaam Kristus. Katuboam ia too mala talambi' inde lino, anna mala natahima ingganna to ungkatappa'i Puang Yesus abana anggam Ia lalam lako kamaloloam anna katuboam bakahu. Deem pehapangam naala Yohanes susinna uwai, hoti, kamasiäsam, to ma'kambi', domba, bätäna anggur anna täkena anna budapi senga'na. Ingganna pehapangam ia too napake umpepatuduam diona lalam kasalamasam.
Lesoanna issinna
1. Kada passu'bä' (1:1-18)
2. Tanda memängä-mängä napogau' Puang Yesus sola pepatuduanna umpa'patandaam kalena anna mala naissam hupatau naua Ia Änä'na Puang Allataala (1:19-12:50)
a. Pa'pahandusanna pengkähänganna Puang Yesus illaam inde lino (1:19-4:54)
b. Kadadiam dio Yerusalem illaam allo Katohhoam (5:1-47)
c. Kadadiam dio Galilea illaam allo Kalappasam (6:1-71)
d. Kadadiam dio Yudea illaam allo kasalle Bahum Daum (7:1-10:21)
e. Kadadiam illaam allo Kalappasam katampasanna nakadioi heem Puang Yesus (11:1-12:50)
3. Umpatudu passikolanna Puang Yesus illaam indo bengi la diolaam dipatei ke masiäi (13:1-17:26)
4. Puang Yesus disakka, dipatei, anna tubo sule (18:1-20:29)
5. Kasuhunganna anna dituli' inde suha' (20:30-31)
6. Puhai tubo sule Puang Yesus, iya umpa'paitaammi kalena lako passikolanna (21:1-25)
1
Puang Yesus diuaam Kadanna Debata
1:1-18
1 Wattunna anna tä'pi dipadadi inde lino inna deemmi indo to diuaam Kadanna Debata. Indo Kada ia too inna solam Puang Allataala, anna Ia siam Puang Allataala.
2 Inna silolemmi Ia Puang Allataala mengkalao dio mai.
3 Ia ungkähäi anna deenni ingganna-ingganna sia. Tä' deem aka-aka dipadadi ke tä'i Ia ungkähäi.
4 Ia naongei buttu katuboam anna katuboam ia too umbaba kamasiäsam umballoi ma'hupatau.
5 Kamasiäsam ia too paindo illaam alla'-alla'na kamalillingam anna tä' mala napi'dei kamalillingam.
6 Iya sulem mesa tau nasua Puang Allataala isanga Yohanes
7 la mendadi sa'bi ussa'bii diona indo kamasiäsam anna mala nahingngi ingganna hupatau nasuhum matappa'.
8 Indo Yohanes taia indo diuaam kamasiäsam sapo' to ussa'bii diona indo kamasiäsam.
9 Aka la sule illaam inde lino indo kamasiäsam si'da-sia ummasiä'i ingganna hupatau.
10 Indo Kadanna Debata tohho inde lino anna Ia siam ungkähäi indo anna dipadadi inde lino. Sapo' moinna anna susi, tä' di naissam to lino.
11 Sule mentama botto litä'na, sapo' natumpu pala' di solana.
12 Sapo' menna-menna untahimai anna ungkatappa'i, tau ia too napadadi änä'na Puang Allataala.
13 Taia kahana pa'padadinna hupatau nasuhum mendadi änä'na Puang Allataala, anna taia toi kahana pa'elo'na battu haka pattujunna hupatau, sapo' pa'elo'na Puang Allataala nasuhum napadadi änä'na.
14 Indo Kadanna Debata mengkubalimmi mendadi hupatau anna tohhom illaam alla'-alla'taa'. Taitam kamatandeanna. Anna kamatandeam ia too namanasam Puang Allataala aka Ia Änä' mesanna. Iam too taongei ungkaleso tongam diona Puang Allataala sola pa'kamasena.
15 Yohanes umpaissanni hupatau diona Kada ia too. Si metamba-tamba naua: “Iam too inde indo si kutula' kuua: ‘Deem la sule ibundingku sapo' matande puha Ia anna la kao, aka tä'pä' kao dadi anna inna deemmi Ia.’ ”
16 Anna tadisihanteam pa'kamasena napolalam tamonda-monda untamba'kia'.
17 Musa Ia napalandasangkia' pahentana Puang Allataala. Sapo' illaam Yesus Kristus taongei ungkaleso tongam diona Puang Allataala sola pa'kamasena.
18 Tä'pi deem tau moi podo la mesa muita Puang Allataala. Sapo' malakia' muissam Puang Allataala aka Änä' mesanna umpaissannikia', indo to sipadaam Puang Allataala anna to illaam kalena.
Passa'biinna Yohanes to si mantedo'
1:19-28
Mat. 3:1-12; Mrk. 1:1-8; Luk. 3:3-6, 15-17
19 Susi inde passa'biinna Yohanes diona Puang Yesus. Deem sanaka-naka sando sola pessubunna Lewi nasua to kasallena to Yahudi dio Yerusalem le'ba' umpellambi'i Yohanes anna nakutanai naua: “Mennako iko isanga indee?”
20 Naakui anna nasindohoi Yohanes ma'tula' naua: “Kao-kao taiaä' indo To dilanti' la mepasalama'.”
21 Iya natimba'um naua: “Maka' susi, iya menna hako? Elia hakoka tubo sule?”
Natimba' Yohanes naua: “Taia.”
Iya mekutana pole oom naua: “Ikongka indo Nabi to puha didandi?”
Natimba' oom Yohanes naua: “Taia.”
22 Mane mekutana oi naua: “Menna hako iko setonganna? Tulasangkam anna malai kiissam kitulasam lako to ussuakam. Menna hako iko isanga?”
23 Natimba'i Yohanes naua: “Kaom too indo puha natula' nabi Yesaya naua: ‘Deem to la metamba-tamba dio pohiallasam naua: hampasanni anna ummaloloanganni lalanna Debata.’ ”
24 Iya mekutana oom sanaka-naka indo pesuana to illaam kakalebuanna Parisi naua:
25 “Maka' taiako indo To dilanti' la mepasalama', taiako Elia, taia toko indo Nabi to didandi, iya aka hi anna mantedo' dako?”
26 Natimba' Yohanes naua: “Kao-kao uwai kupopantedo', sapo' deemmi illaam alla'-alla'mua' tä'pi muissanna'
27 ibundi Ia umpalako pengkähänganna. Sapo' moi la kubukkaiam pekapu' sapatunna tala sihatannä'.”
28 Ingganna ia too dadi dio Betania tandai mata allona Salu Yordan indo si naongei Yohanes mantedo'.
Passa'biinna Yohanes diona Puang Yesus to disangai Änä' Dombana Puang Allataala
1:29-34
29 Masiänai, naitam Yohanes sule Puang Yesus la umpellambi'i. Iya ma'kadam Yohanes naua: “Petua'ia' indem dio indo Änä' Dombana Puang Allataala sule la umpa'dei dosana ma'hupatau.
30 Iam too indo to si kutula' kuua: ‘Deem la sule ibundingku sapo' la matande puha Ia anna la kao, aka tä'pä' kao dadi anna inna deemmi Ia.’
31 Yolona tä' duka' kuissam kuua Iam too indo To dilanti' la mepasalama'. Sapo' ia anna suleä' umpopantedo' uwai, anna mala naissam to Israel naua Iam too indo To dilanti' la mepasalama'.”
32-33 Ma'tula' polepi Yohanes ussa'bii naua: “Tä'pi duka' kuissam eta too kuua Puang Yesus-um too indo To dilanti' la mepasalama'. Sapo' Puang Allataala to ussuaä' untedo'i uwai ma'kada naua: ‘Maka' too muitam Penaba Masehona Puang Allataala tuhum hampo lako mesa tau, iya iam too to la umpopantedo' Penaba Maseho.’ Iya deem siam kuita Penaba Maseho tuhum yabo mai suhuga susi dangam-dangam hampo yabona anna tohho illaam kalena.
34 Ma'kalemä' muitai anna kusa'bii kuua Iam too Änä'na Puang Allataala.”
To uhu-uhuna mendadi passikolanna Puang Yesus
1:35-42
35 Masiäna polei, dio oom indo ongeanna Yohanes sola passikolanna dua.
36 Tappana muita liu Puang Yesus, iya ma'kadam naua: “Petua'i iam too dio indo Änä' Dombana Puang Allataala!”
37 Uhhingnginna tula'na Yohanes indo passikolanna dua, iya tappa le'ba' siahanni untuhu' Puang Yesus.
38 Tappana menggihi' Puang Yesus lako boko'na naitam indo to untuhu'i, iya nakutanaim naua: “Aka umpahalluanna'?”
Iya natimba'um naua: “O Rabi, umba ngei si muongei tohho?” (Rabi kalembasanna: Tuangguhu.)
39 Ma'kada Puang Yesus naua: “Maikoa' anna ma'kalekoa' muitai.” Iya le'ba'im duka' sola anna napetua'i indo ongeam si naongei Puang Yesus. Wattu eta too tette' appa'um kahubem, iya tohhopi sola Puang Yesus sule lako bengi.
40 Indo mesa to uhhingngi tula'na Yohanes anna le'ba'i untuhu' Puang Yesus isanga Andreas, solasubunna Simon Petrus.
41 Iya tappa le'ba' siaham Andreas umpeä Simon anna napa'tulasanni naua: “Silambi'ungkam kami' indo Mesias,” (battu diua To dilanti' la mepasalama').
42 Iya umpasolam Simon le'ba' umpellambi'i Puang Yesus. Sulei lako, napetua'-tua'um Puang Yesus anna napa'kadai naua: “Iko-iko Simon änä'na Yohanes, la disangaingko Kepas.” (Kepas illaam basana to Yahudi ditula' Petrus ia illaam basa Yunani. Kalembasanna: batu.)
Filipus anna Natanael natambai Puang Yesus
1:43-51
43 Masiänai, mualam kattuam Puang Yesus la lako Galilea. Tä'pi mengkalao anna sitammum Filipus, iya nauaammi: “Maiko tuhu'ä'.”
44 Indo Filipus to buttu dio mai Betsaida kota kadadianna Andreas sola Petrus.
45 Iya le'ba'um Filipus umpellambi'i Natanael anna natulasanni naua: “Silambi'ungkam kami' indo to si natula' Musa illaam suha' pepaondonganna anna si napa'paissangam duka' ingganna nabi. Iam too indo to buttu dio mai Nazaret, änä'na Yusuf isanga Puang Yesus.”
46 Natimba' Natanael naua: “La deem daka tia to mapia buttu illaam mai tondä' Nazaret?”
Nauam Filipus: “Maiko anna ma'kaleko iko duka' muitai.”
47 Naitanna Puang Yesus sule Natanael umpellambi'i, iya ma'kadam untula' diona Natanael naua: “Petua'ia' inde dio, mesa tungka to Israel to malolo penaba.”
48 Iya tappa mekutana Natanael lako naua: “Maaka hia susi anna malaä' muissam?”
Natimba'i Puang Yesus naua: “Indo anna tä'poko natambai Filipus, iya kuitako illaam kakuasaangku muokko' dio ibi'na kaju ara.”
49 Mane ma'kadai Natanael lako Puang Yesus naua: “O Tuangguhu, Änä'nako Puang Allataala! Tomahajanna si'dangko to Israel!”
50 Natimba' Puang Yesus naua: “Matappa' dakoka aka kutulasangko kuua puhangko kuita dio ibi'na indo kaju ara? La deem polepi too muita dako' kaha-kaha memängä-mängä puha anna ia too.
51 Aka setongam-tonganna la muitakoa' langi' tibukka anna buda malaika'na Puang Allataala ma'sinule lu längäm lu yabo mai, Kao Änä' Mentolino napoeham.”