Билдадму «Яманларниң яман ақивити» тоғрилиқ сөз қилиду

1 Шухалиқ Билдад җававән мундақ деди: —

2 Сәндәк адәмләр қачанғичә мундақ сөзләрни тохтатмайсиләр?

Силәр убдан ойлап беқиңлар, андин биз сөз қилимиз.

3 Биз немишкә силәрниң алдиңларда һайванлар һесаплинимиз?

Немишкә алдиңларда ахмақ тонулимиз?□

4 Һәй өзүңниң ғәзивидә өзүңни житқучи, сени дәпла йәр-зимин ташливетиләмду?!

Тағ-ташлар өз орнидин көтирилип кетәмду?!□ ■

5 Қандақла болмисун, яман адәмниң чириғи өчүрүлиду,

Униң от-учқунлири ялқунлимайду.

6 Чедиридики нур қараңғулуққа айлиниду,

Униң үстигә асқан чириғи өчүрүлиду.

7 Униң мәзмут қәдәмлири қисилиду,

Өзиниң несиһәтлири өзини моллақ атқузиду.

8 Чүнки өз путлири өзини торға әвәтиду,

У дәл торниң үстигә дәссәйдиған болиду.

9 Қилтақ уни тапинидин иливалиду,

Қапқан уни тутувалиду.■

10 Йәрдә уни күтидиған йошурун арғамча бар,

Йолида уни тутмақчи болған бир қапқан бар.

11 Уни һәр тәрәптин вәһимиләр бесип қорқитиватиду,

Һәм улар уни из қоғлап қоғлаватиду.■

12 Мағдурини ачарчилиқ йәп түгәтти;

Палакәт униң йенида пайлап жүриду.□ ■

13 Өлүмниң чоң балиси униң терисини йәватиду;

Униң әзалирини шорайду.□

14 У өз чедиридики аманлиқтин жулуп ташлиниду,

Өлүмниң тунҗиси уни «вәһимиләрниң падишаси»ниң алдиға ялап апириду.■

15 Өйидикиләр әмәс, бәлки башқилар униң чедирида туриду;

Туралғусиниң үстигә гуңгут яғдурулиду.□

16 Униң йилтизи тегидин қурутулиду;

Үстидики шахлири кесилиду.

17 Униң әслимисиму йәр йүзидикиләрниң есидин көтирилип кетиду,

Сиртларда униң нам-абройи қалмайду.□ ■

18 У йоруқлуқтин қараңғулуққа қоғливетилгән болуп,

Бу дуниядин һайдиветилиду.

19 Әл-жутта һеч қандақ пәрзәнтлири яки әвлатлири қалмайду,

У мусапир болуп турған йәрләрдиму нәсли қалмайду.■

20 Униңдин кейинкиләр униң күнигә қарап алақзадә болиду,

Худди алдинқиларму чөчүп кәткәндәк.□

21 Мана, қәбиһ адәмниң маканлири шүбһисиз шундақ,

Тәңрини тонумайдиған кишиниңму орни чоқум шундақтур. □

□18:3 «Биз немишкә силәрниң алдиңларда һайванлар һесаплинимиз?» — «силәр» дегән сөзгә қариғанда, Билдадниң бу сөзиниң пәқәт Аюпқила қилинған әмәслигини билдүриду. Уларниң йенида гәп аңлиғучилардин бәзиләр Аюпниң җасарәтлик сөзлирини аңлап униңға қол қойдиму-я?

□18:4 «Һәй өзүңниң ғәзивидә өзүңни житқучи, сени дәпла ... тағ-ташлар өз орнидин көтирилип кетәмду?!» — Аюп 16-бап, 9-айәттә, «У (Худа)ниң ғәзиви мени титма қилди» дегән. Билдад, шүбһисизки, бу гәпни мазақ қилип: «Сениң житилишиң Худаниң ғәзиви билән әмәс, бәлки өз-өзүңниң ғәзиви биләндур» демәкчи. Билдад йәнә Худа инсандин улуқ һәм алий болғачқа, Аюп униң билән дидарлишай, һозуриға кирип униң билән сөзлишәй дәп өз әқлидин адашқан, дәп мазақ қилиду — демәкчи. Билдад «Инсанниң Худа билән беваситә сөзлишиши, көрүшүши зади мүмкин әмәс» дегән көзқарашта болиду. Бирақ Аюп ахирида һәқиқәтән Худа билән көрүшиду; униң үстигә биз Аюпни Худани өзиниң әң йеқин һәмраһи дәп билгән киши, дәп көрәләймиз (29:4).

■18:4 Аюп 13:14; Зәб. 112:6; Йәш. 54:10; Мат.10:29-31; Рим. 8:32

■18:9 Аюп 5:5

■18:11 Аюп 15:21; Йәр. 6:25; 46:5; 49:29

□18:12 «Мағдурини ачарчилиқ йәп түгәтти» — башқа бир хил тәрҗимиси «Балаю-апәт уни жутуветишкә ачкөзлүк билән күтиватиду...»

■18:12 Аюп 15:23

□18:13 «өлүмниң чоң балиси» — бәлким бир хил кесәлни (Аюпниң кесилини?) көрситиду.

■18:14 Аюп 8:13, 14; 11:20; Пәнд. 10:28

□18:15 «...башқилар униң чедирида туриду» — яки « ...от униң чедирида туриду».

□18:17 «Сиртларда...» — яки: «Яйлақларда...» яки «Далада...».

■18:17 Зәб. 108:13; Пәнд. 10:7

■18:19 Йәш. 14:22; Йәр. 22:30

□18:20 «Худди алдинқилар чөчүп кәткәндәк» — Билдад ейтқан «алдинқилар»ниң өз дәвридики рәзил адәмләрниң әһвалиға қарап чөчүп кәткәнлигини көрситиши мүмкин. Башқа бир хил тәрҗимиси: «Мәшриқтикиләр униң күнигә қарап алақзадә болиду, мәғрибтикиләр униң күнигә қарап алақзадә болиду, мәшриқтикиләрму чөчүп кетиду».

□18:21 «Мана, қәбиһ адәмниң маканлири шүбһисиз шундақ, Тәңрини тонумайдиған кишиниңму орни чоқум шундақтур» — Билдадниң бу сөзлиридә: «қәбиһ адәм», «Тәңрини тонумайдиған киши» дегини, «сән Аюптин башқа киши әмәс» демәкчи.