55
Towokase ahtao tope a
Tawi nymerohpyry, inekarohpyry eremiaketõ tuisary a.
1 Ritonõpo, jotururu etako!
Ajohpãme sã ekaropotoh wino eramara exiko.
2 Jomiry etako, kuezuhko;
tapotũkehse ywy torẽtyke jehtoh ke.
3 Jerehnõko jepetõkara jenaroximaryhtao eya xine;
yyryhmaryhtao popyra exiketomo a
jakurihmõko mã toto.
Popyra ehtoh enehpõko mã toto ypona;
yzehno mã toto, yse pyra mã toto ipunaka.
4 Ukurohtao enaromỹke ase ipunaka,
joorikyry zuno jehtoh jakurihmõko mana.
5 Enaromỹke ywy itamurume,
tykytyky ãko ase; tonaroxitapãse ywy.
6 Aporiry tõ se sã hano utuku samo,
mya jytotohme oserematoh taka!
7 Ywy epary myahxo ahno esaka pyra,
moroto jehtohme rokẽ rahkene.
8 Axĩ sã osa jamihmã zupiry ywy otonẽtohme
tyryrykane winoino, konopoimo winoino roropa.
9 Ritonõpo, jepetõkara omiry akorekehkako,
toto otupitohme.
Imehnõ etapary eya xine,
osetapary roropa enease pata tõ po!
10 Saereme ahtao, koko roropa ytoytõko mã toto
pata zomye, apuru tõ poro imehnõ ryhmãko;
popyra ehtoh poko mã toto.
11 Emero rokẽ po osema tao roropa imehnõ
ryhmãko mã toto; ematonanohnõko mã toto,
imehnõ enekunohnõko mã toto.
12 Jepekarame ahtao jeunohnõko, ywy
eanahtory; yzehno exikety ykerekeremaryhtao
otonẽkety sã rokẽ jexiry roropa repe.
13 Yrome omoro mase, ymaro ytoytokety,
ymaro atamorepakety jepemehxo repe!
14 Soturuase oximaro emero poko, sytoase
oximaro oseahmase ahno maro Ritonõpo Tapyĩ tao.
15 Ah jepetõkara norihno
toto aorihtoh exipyra ahtao ro;
ah nyhtõ toto isene ro toto ahtao aorihtyã esaka.
Popyra ehtoh itapyĩkõ tao mana, ikurohtao xine roropa!
16 Yrome Ritonõpo Jesẽ kohmãko ase
jakorehmatohme, ypynanohnõko mana.
17 Pakeimo, tãxiahtao, koko roropa xitãko ase
jotururume eya, mame jomiry etãko mana.
18 Jenehnõko ropa mana kure rokene etonatoh poe osetapary poko jahtao jepetõkara tuhkãkõ maro.
19 Ritonõpo, tuisamehxo Exikety moino
apitorymã poe, jomiry etãko mana
mokaro poremãkãko mana;
toetyorõmarykõ se pyra toexirykõke,
Ritonõpo imehxo enetuputyry se pyra
roropa toexirykõke.
20 Jepẽpo tõsetapase tope tõ maro,
toto poremãkapotohme; tõmihpyry tamonohse eya.
21 Aomiry kure sã nexiase mãteka samo
enekunohtohme, yrome ikurohtao imehnõ se pyra
ipunaka exiketyme nexiase.
Aomiry kure sã nexiase azeite samo,
yrome tapema taere exikety sã nysahkatoh sã nexiase.
22 Torẽtyke oehtohkõ ekaroko Ritonõpo a,
mame ãkorehmãko mana.
Tõmihpyry omipona exiketõ
onyporemãkapopyra mana.
23 Yrome mokaro imehnõ etapananomo te,
imehnõ ewokananomo, ajohpe exiketõ roropa
emãko mase, Ritonõpo, aorihtyã esaka;
isene toto ehtoh zokonaka exipyra ahtao ro.
Yrome ywy, oenetupuhnõko ase.