Ci kʊ n y'a ba
EBREE GƱƆƆ
ma
Ci kʊ n y'a ba Ebree gʊɔɔ ma bɩ
gasʊʊrɛ
Wɔɔ n gʊaa k'a ci bɩ ba bɩ dɔ y. Bɩ gʊaa m, an gʊaasɩbabaa gusire ci bɩ dɔ mɩŋŋa. A a da ma ci bɩ ba k'a ʊ bɩ, Rɔm zannɔ n Zerizalɛm Wosocɛ bɩ zɔ y, bala n gɔɔta n nɩ mannɩ bam Wosocɛ b'ʊ.
A ba a ʊ kristagʊɔɔ kʊ zɩɩfʊrɔ m, ŋn'ɩ fɩr yɩm sɩrakarɛ bɩ tɔ ma rɔ wɔɔ ma. Brɔɔ nyɩnta ŋn'a heer zaar bam, nɔɔm n'a ŋʊam k'a a bɔ sɩrakarɛ ʊ. A n bɩ, an a hɩ ŋ nɩ a ʊ, kʊ ŋ y'a bɔ Krista ʊ nyaanlɛ zaa ŋn'a sam. A m naa, an nɩ Yeezuu gʊtabaa kan a zibəə gʊtabaa kɩ mim dɩndarɛ ŋ nɩ, kʊ nka m Yeezuu kʊ ŋ n'a dɔ paan…, an nɩ hɔdɩndarɛ ŋ nɩ sɔ kʊ ŋ sɩrakarɛ n yaa ka.
Ci bɩ nɔ ʊ bɩ, a y'a hɩnkarɛ ŋ nɩ a ʊ, gʊaasɩbabaa gusire bɩ yaadarɛ zaarɔ wɔɔ haay kan a mannɩbarɛ zibəə bɩ kɩ haay bɩ, Yeezuu mim ŋn'a dɩndam kʊ bɩ n tolle ba an bʊr. Bala, Yeezuu Woso a bɔ ʊ k'an yɩ gʊaasɩbabaa daa bɩ zɛkʊrazaa, bɩ gʊaasɩbabaa naa do ɩ lɛ da haay, bala, Yeezuu ga an a mɩŋŋa ka Woso ʊ, a m mannɩ k'an mɩŋŋa an lɛ da haay m. A tɔ ma gʊaa haay a da ma an a zɔ Woso ma, an yɩ Woso soʊre hɔ.
Kʊ Krista dogʊɔɔ kaanm m bɩ, pakra m sɔ kʊ wɔɔ n yɛ fɩr ma a tɔ ma.
Ⅰ
Woso meer ba kan wɔɔ kɩ a Nyɩ bɩ lɛ m
Ⅰ Biisi bɩ, Woso meer ba kan wɔɔ yaabɔɔ wɔɔ kɩ a lɛsinnɩsorazannɔ lɛ m, gallɛm hɔka, zaa y'a hʊnhɔ m. Ⅱ Bɩ, kɛɛrɛ naa, jɛ dɔmɩm kʊ wɔɔ n ta ʊ naa ma bɩ, Woso meer ba kan wɔɔ kɩ a nyɩ bɩ lɛ m. A Nyɩ bɩ tɔ ma y'a ka an durnya bɩ da, a Nyɩ bɩ bɔ a ʊ sɔ k'an a so hɔ haay ʊ. Ⅲ Nyɩ bɩ nɩ Woso mɩŋŋa lɛbɔʊrɛ hɩnkam, kʊ Woso lʊnlɔ bɩ, a mɩŋŋa maam, an n'a kam durnya bɩ nɩ gɔɔtarɛ a bɩncɛ ʊ, a lɛ meerbaa paŋŋa m. K'a gʊɔɔ mimbʊnyaarɔ gʊ ŋ ma zi ba an a nya bɩ, a a hʊr an aa nyɩnta Woso k'a nɩ cirbəə m bɩ bɩsɩ ra arzana ʊ. Ⅳ Woso Nyɩ bɩ tɔ bɩ lɛ da malɛɛkarɔ wɔɔ tɔ m soyy…. Naa n'a hɩnkam wɔɔ m, ʊ a dɔ ʊ ʊ, a lɛ da malɛɛkarɔ wɔɔ m gʊta maam-maam.
Woso Nyɩ bɩ lɛ da malɛɛkarɔ m
Ⅴ Woso n meer ba kan malɛɛka kɩ cɩna, a ʊ:
Ɩbɩɩ m mɔɔ Nyɩ,
an a sa her ma,
mɔɔ n'ɩbɩɩ Zɩ y.
A n a hɩ malɛɛka ma sɔ cɩna, a ʊ:
Mɔɔ yɩrɛ a Zɩ,
an yɩ mɔɔ Nyɩ y.
Ⅵ Bɩ, Woso k'a bʊr k'a Nyɩ lɛɛkarɛzaa bɩ nyɔɔ durnya ʊ bɩ, a a hɩ, a ʊ:
Bɩ kʊ Woso malɛɛkarɔ haay
n kukurə zɛ a taa.
Ⅶ Hɔ kʊ Woso a hɩ malɛɛkarɔ mim nɔ ʊ bɩ ba n nɩ:
Malɛɛkarɔ wɔɔ, ŋ ba a ʊ,
ɩ ʊ hɩnhɛr nɩ ŋ mɩ,
a zibəənyɩnɔ m,
am sɛ nɛɛnnɔ m.
Ⅷ Bɩ meerbaa k'a a ba a Nyɩ bɩ mim nɔ ʊ bɩ ba n nɩ, a ʊ:
Ɩbɩɩ m Woso,
ɩ cirbəə nyarɛ ba ʊ y.
Ɩ so ɩbɩɩ nawʊrɛ
ɩ cirbəə kʊ b'ʊ tɩrgabaa nɔ ʊ.
Ⅸ Ɩbɩɩ hɔ k'an tɩrga ŋʊa,
ɩ n'ɩ sɔm hɔ bʊnyaa m.
Bɩ y'a ka, Woso,
ɩ Woso bɩ n'ɩ bɔ ʊ,
an heernyɔɔ nyɔɔ tɔ ɩ mim ʊ.
A ɩbɩɩ ŋʊa an cem ɩ muno wɔɔ han,
bɩ tɔ ma m an ɩ bɔ ʊ.
Ⅹ A a ya, an a hɩ sɔ, a ʊ:
Zuuba, durnya sɩŋŋɩda ʊ bɩ,
ɩbɩɩ ɩ tara burə da,
bɩ, brama k'an ta ʊ naa,
ɩbɩɩ wɔ zibəə m.
Ⅺ Brɔɔ cenim,
b'ɩbɩɩ gɔɔtam tee….
Brama kan tara bɩ kɩ zarm
am huu hɔ bɩ m,
Ⅻ ɩbɩɩ yɩ ŋ huŋŋum
am huu hɔ bɩ m,
denter m, ɩbɩɩ yɩ ŋ lʊrm
am huuro m.
Bɩ, ɩbɩɩ bɩr ɩ lʊrlɛ y,
ɩbɩɩ cenle ba ʊ y.
ⅩⅢ Woso n a hɩ malɛɛka m cɩna, amba a a hɩ a Nyɩ bɩ m, a ʊ:
Bʊr ɩ nyɩnta mɔɔ bɩsɩ ra,
kʊ m a ka k'ɩ jɩnnɔ n bɩ nyɩnta ɩ taa y.
ⅩⅣ Malɛɛkarɔ wɔɔ, nyiro m, ŋn'ɩ Woso zi bam, Woso n ŋ nyɔɔ kʊ ŋ nɩ bɩ ziro ba ŋn'a da gʊɔɔ kʊ ŋ nɩ zɛm bɩ bʊmbɔrɛ hɔjirle yɩ rɔ wɔɔ han.