2
I dad untung fagu di kfulung
1 Tingàgu, flinge ge i tdògu ge,
na nangam nlifet i kafngewegu ge.
2 Flinge ge i gman i kfulung faldam,
na toom fkah di nawam na fnaglabatam di fandamam.
3 Hae, toom fni i kfulungam mebe ktom,
na fadlug ge mni i kaglabat.
4 Na toom fanngabal i kfulung faldam,
salngad i kafngabalam salafì demen i knun buni.
5 Du ku nimoam ani glabatam i klikò di Dwata,
na nun gnadeam gablà di kenen.
6 Du Dwata mlé kfulung faldam,
na di kenen gumdà i gnadè na kaglabat.
7 Mlé kenen tabeng di dad to matlu,
na kenen i klungla.
8 Hae, kenen kamlung i dad to mimò fye di demela to,
na nalakan dad to i gsaligan di dalan gumagula.
9 Na ku alò ge flinge deg, glabatam kadang ku tan i fye,
na di kdee nimoam di demem to, too matlu.
10 Du mbaling ge kadang to fulung faldam,
na mdà di gnadeam nun klehewam.
11 I kfulungam mebe ktom na i kaglabatam i kamlung ge,
12 du fye gawag ge di nimò, na di talù i dad to sasè.
13 Dad to én, tagakla i matlu na malwa dalan,
na magu ale di gukmifun.
14 Na too ale lehew mimò sasè
na di kagsalàla, too ale baling flehew.
15 Na dad to ani, bigkò i dalanla,
na là ale gsalig.
16 Na i too glut kfulung ani, fadnan ge di boyo i libun mkat lagi.
17 I libun gambet ani, kahan i yaanan,
na nlifetan i fakangan di Dwata di ksongla.
18 Na ku salu ge ditù di gumnean, én gumagum di dalan fati,
na i ksalum ditù, salngad ku salu ge ditù di gumnè i dad mati.
19 Balù simto tlang di kenen, landè di dale gasfulê di fye knè.
20 Taman tingàgu, toom lalò i ldam dad to matlu,
na magu ge di matlu dalan.
21 Du i dad to matlu, ale sa gamdawat i kafye blé Dwata, na mlawilale di tah tanà ani.
22 Kabay i dad to sasè, snabà Dwata mdà di tah tanà ani,
na nsoan ale, gambet i ksò i dad bnas mdà di tanà.