3
Jesús Moisésga pul tule-tummad
1 Kwenadgan-Pabzhikmalad, imi Pabdin ampa pemal-chusmalmo-choggu, al pemal Jesúsginbi pinzheenabmal. Tegin anmal chogmalbal: “Jesús, anmal-Tummad.” Tenal Jesús, Pab-Tummad-nuggin-palmilegalid tegin tule-irwal-Pabzhe-koled-pul-tummadbal.
2 Imi Moisés Pab-neg-yaginmalad-abalgin inniki nanedi-kujad-yopí, Jesúsdin Pab-choged-pallí nanedi-kusmo, akal-akal kwen nanaszhul-kus. 3 Imi tule-neg-chobed pul nug-okannoleged-wilub, pul neg-choblejadga. Al Jesús Moisésga pul nug okannoleged-wilubmo.
4 Imi pe takalil, neg pato chobal chii, pe wiis tule-walgwen we neg chobzha. Tenal Pabdin pel-kwapa immalmal opinnis.
5 Imi Moisés Pab-neg-yaginmalad-abalgin mosga inniki arpadi-kus. Tenal Moisés chogzhagusdo, we kakade kujal-choglenoniko. 6 Tenal Cristo Pab-Machidbal inniki Pab-neg-yaginmalad-takchii. Al anmal Pabgin pengunonijulil anmal-tobzhulidgin-tulemalga-chogzhadyob Pab anmal-abonogo, anmaldin Pab-neg-yaginmaladmo.
Pe nuekwa aga takermal melle Pabgin pengugal
7 Al pe Pab-Purpa-Nued-chogedyob pe imakenabmal. Tenal Pab Purpa Nued Pab-kartagin chogdo:
Imis pe Pab-kakapurwa itogel,
8 pedin, pe melle chogo: “Chul.”
Pedin Pab-kakapurwa abingeenabmal.
Tenal pe-tadgan akpene neg-nikchulidbal
Pab Tummadgin abin-kwisgunonikidyob,
pe melle kumalo.
Tenal pemal-tadgan Pab-Tummad-wilub-takchadyob,
pe melle kumalbalo.
Sal. 95:7-9
9 Tenal Pab Purpa Nued Pab-kartagin tadgangin chogbaldo:
Imi teun pe-tadgan pirka-tulabo
an-immal-imajad takchamal,
tenal pe-tadgan yabli an-wilub-takti-kusmal,
tegin an-kwen-itoszhulmalbal.
10 Al antin pe-tadganbak sae-itononigu,
an chogdejun:
“Imi we tulemal keg-chulgu
immal-akaloedgin pinzhemal.
Tenal we tadgan an-igal-mezhijadbal
kwen nanebijulmalbal.”
11 Al an ulubgin sae-itogedgin
an-napírra-chogzhadgin
pe-tadgangin an chogdebalzhun:
“We tulemal meke-igi
an-ulukued-neggin kwen togojul-kuo.”
Sal. 95:9-11
12 Kwenadgan, pe nuekwa aga takermal, pe melle aga ulubgin iskuedgin pinzhemalo, tegin pe melle Pabgin ibzhejul-kuo, pe melle Pab-Tula-Maid-ebegal.
13 Imis ampa we ibe-naidgin, pe pane-pane aga muchub-muchub okannomalo, pe melle iskuedgin-yardalejadbal pe Pabgin pengunonigal. 14 Tenal anmal kepe-saglagin Pab-penzhul-kudigujadyob anmal ampa ukin-ukin ilgwen-naneel, anmal Cristobak mecha kudigumalo.
15 Imi Pab-karta chogzhadyob an kannan chogbaldo:
Imis pe Pab-kakapurwa itogel,
pedin, pe melle chogo: “Chul.”
Pedin Pab-kakapurwa abingeenabmal.
Imi akpene pe-tadgan
Pab Tummadgin abin-kwisgunonikidyob,
pe melle kumalo.
Sal. 95:7-8
16 ¿Tede toa-tulemalzhun Pab-kakapurwa itosmalgu, Pab-Tummad-abin-kwisgunonimaladdé? ¿Moisés-Egipto-akar-tadgan-onismaladzhulzhí? Teobdo. 17 ¿Tenal Pab Tummad pirka-tulabo toa-tulemalbak sae-itodi-kusdé? ¿Tule-iskuedgin-tiidbal neg-nikchulidbal purkwismaladzhulzhí? Teobdo.
18 ¿Tenal Pab toa-tulegin napírra chogzhabaldé: “We tulemal meke-igi an-ulukued-neggin kwen togojul-kuo?” ¿Tadgan-Pab-chogzhad-pallí-kwen-nanejulmaladzhulzhí? Teobdo. 19 Al anmal takchamaldo, anmal-tadgan Pabgin-ibzhejulidbal keg Pab-ulukued-neggin toggusmal.