1 Iwe, ekewe re Efraim ra kö pwe repwe feila maun. Ra feila pekilan ewe chanpupu Jortan ren Safon o üreni Jefta, “Pwota ka feila pekila o maun ngeni chon Amon, nge kosap kökkörikem pwe aipwe etuk? Aipwe kenukelong lon imwom.” 2 Nge Jefta a üreniir, “Äm me aramasei a wor äm koumfengen me chon Amon, nge lupwen üa körikemi, ämi ousap amanauaei seni lepöür. 3 Iwe, lupwen üa küna pwe ousap alisiei, üa püsin fangala manauei o feila pekila pwe üpwe maun ngeni chon Amon. Nge ewe Samol mi Lapalap a atolongeer lepei. Pwota oua feito rei ikenai pwe oupwe maun ngeniei?” 4 Mürin, Jefta a amwichafengeni ekewe re Kiliat meinisin, a maun ngeni chon Efraim o akufuur. Ekewe chon Efraim ra apasa, “Ämi chon Kiliat oua chök choisä seni Efraim me Manasa.” 5 Iwe, ekewe re Kiliat ra liapeni petepeeten ewe chanpupu Jortan mwen ekewe re Efraim. Nge are eman lein ekewe re Efraim mi süsüfetal a feito o tüngor, “Oupwe mwüt ngeniei pwe üpwe feila pekila,” ekewe re Kiliat ra aisini, “Ifa usun, en eman re Efraim?” Iwe, lupwen a apasa, “Ap,” 6 ekewe re Kiliat ra üreni, “Kopwe apasa, ‘Shipolet.’ ” Nge are i a apasa, ‘Sipolet,’ pun esap tongeni anewenewaöchü ewe kapas, mürin ra turufi o niela arun petepeeten ewe chanpupu Jortan. Lon ena fansoun ra mäla faik me ruungeröü re Efraim.

7 Iwe, Jefta ewe re Kiliat a soukapwüng lon Israel lon ükükün wonu ier. Mürin, Jefta a mäla, nge ra peiaseni lon an we telinimw lon Kiliat.

8 Mürin Jefta, Ipsan seni Petleem a soukapwüng lon Israel. 9 Iwe, a wor ükükün ilik nöün Ipsan mwän pwal ilik nöün fefin. A apwüpwülüa nöün kewe fefin lükün an eterekes, nge a uwato ilik fefin seni lükün an eterekes pwe pwülüen nöün kewe mwän. Iwe, Ipsan a soukapwüng lon Israel lon ükükün fisu ier. 10 Mürin, Ipsan a mäla, nge ra peiaseni lon Petleem.

11 Iwe, mürin Ipsan, Elon ewe re Sepulon a soukapwüng lon Israel lon ükükün engol ier. 12 Mürin, Elon a mäla, nge ra peiaseni lon Aijalon lon ewe fanü Sepulon.

13 Iwe, mürin Elon, Apton nöün Hilel we mwän ewe re Piraton a soukapwüng lon Israel. 14 A wor ükükün faik nöün Apton mwän, pwal ilik nöün nöün mwän mi wawa fik aas. Iwe, a soukapwüng lon Israel lon ükükün walu ier.

15 Mürin, Apton a mäla, nge ra peiaseni lon Piraton lon ewe fanü Efraim won chukuchukutän fanüen chon Amalek.