1 Mɛciì mmɑɑ́ mɛ cĩ́ɛ̃̀tɛ̀ ntɛ kɛ còńnɛ́ yɛsɑ̃ǹkɛ̀ yɛ̀yiekɛ̀, 2 kɛ kùɔ iwũɔ̃, kɛ kùɔ̀ti mɛnɑɑ̀ nkɛ còńnɛ́ tɑ́bùrì, 3 kɛ tɔ̃ mbɛnitipotɔ̃mbɛ̀ dihɛì, kɛ̀ bɛ̀ còḿmú dɛ̀ɛ̀ ikú kɛ yu, 4 kɛ tú: Díndi tiyɛìntì kɔtɛnní diɛ. Kɛ nɑ́ɑ́ ntidìɛ̀ntì kɛ tú: 5 Kɔtɛnní kɛ́di n diitì, kɛ́yɑ̃̀ n nɑɑ̀ n kùɔ̀ti mɛ̀. 6 Yóunɛ̀ tiyɛìntì kɛ́fòutɛ. Tũnnɛnɛ̀ mɛciì nkó kucɛ.

7 Kɑ̀ɑ tié ntɛpɔ̀tɛ̀ yiɛ̀ nhò dɑ́ senkɛ̀rìmu, kɑ̀ɑ tié nhonitiyonkuwe ò dɑ sɑ̃́mmú. 8 Bɑ́ɑ́ tié ntɛpɔ̀tɛ̀ yiɛ̀, ò yɑ̀ɑ̀ bo dɑ sĩntɛnɛ̀, tié nwèè ciì kòò ndɑ dɔ́. 9 Kɑ̀ɑ tié nwèè ciì ò dɔ̀kɛ ɔ̃ɔ̃ ciitɛ́mu, kɑ̀ɑ tié nhonitisɑ̀ɑ̀wè dɛ̀ɛ ò yìɛ́ mɛciì. 10 A bo ndémɛ̀ Kuyie ndɛɛ̀ tu mɛciì nkó diketirì, kɑ̀ɑ dɔ̀ɔ̀ri Kuyie ndɔ́mɛ̀ ɑ mɔɔtɛ mɛyɛ̀mmɛ̀. 11 Kɛ̀ mɛciì bɛ́i nkɛ dɔ̀: Mí mmɛciì m bo okùnnɛ ɑ fòmmu kó yɛwe kɛ̀ yɛ̀ɛ sṹṹ. 12 Kɑ̀ɑ ciì dɛ̀ tu ɑ kó mɛsɑ̀ɑ̀ mmɛ, kɑ̀ɑ tu tɛpɔ̀tɛ̀ yiɛ̀ nhɑ pɛ́tɛ́ dɛ kó tiyeti ɑmɑ́ɑ̀.

13 Tiyɛìntì dònnɛ̀ onitipòkù nwe wèè wékɛtɛ kɛ yɛi nkɛ í yɛ̃́ dɛ̀mɑrɛ̀, 14 kɛ kɑri o cĩ́ɛ̃̀tɛ̀ bòrì, dihɛì ikú dɛ̀. 15 Kɛ yu bɛ̀ɛ̀ bɔkù kucɛ kɛ pɛ̃nkù, kɛ tú: 16 Díndi tiyɛìntì kɔtɛnní diɛ, kɛ nɑ́ɑ́ ntidìɛ̀ntì kɛ tú: 17 Mɛniɛ mmɛ̀ɛ̀ yùúkú mɛ̀ wɛ̀ɛ̀timu, kɛ̀ musɔ̀rìkɛ̀diì nɑɑti. 18 Bɛ̀ mɛ nyí yɛ̃́ kɛ tú bɛ̀ kɔ̀ri mukṹṹ mborɛ̀ ndɛ, kɛ̀ dɛ kóo nitipòkù yu bɛ̀ kɛ̀ bɛ̀ tɑti kudɔnkù.