1 Nsɑ̃ntínɛ̀ Kuyie, kù bomu nsɑ̃́ɑ̃̀!

N yó nsɑ̃ntímu n Yiɛ̀ nKuyie nnɛ̀ n yɛ̀mmɛ̀ mɛmɔu

bɛ̀ɛ̀ tũ ntimɔ́mmɔnti bɛ cuokɛ̀, ku tĩ̀nnì tìkú dɛ̀.

2 Ti Yiɛ̀ nKuyie ntɔ̃mmú dɛumu,

bɛ̀ɛ̀ mù dɔ́ kɛ̀ bɛ̀ wɑnti kɛ́ mù yĩ̀ɛ̃́tɛ́.

3 Ku tɔ̃mmú dɛumu kɛ wenni,

kù dɔ̀ɔ̀ri timɔ́mmɔnti nti sɑ̃́ɑ̃̀.

4 Kù dɔ́ tí nyɛ̃́mu kù pĩ́ mmùù tɔ̃ndiɛmù kpɛ́í,

ti Yiɛ̀ nKuyie nsɑ̀mu kɛ mɔkɛ onìtì kó mɛsémmɛ̀.

5 Kɛ duɔ̀ mmudiì bɛ̀ɛ̀ kù dé,

kù í yĩɛ̃̀ nkù bɛ̀ dɔúnnɛ̀ dìì nùù kpɛ́í bìtì.

6 Kù bɛnkɛmu ku nìtìbɛ̀ kù pĩ mmùù tɔ̃ndiɛmù,

kɛ bɛ̀ duɔ́ nyibotí tɛì kó yɛhɛkɛ̀ kɛ̀ bɛ̀ tiekɛ.

7 Kù dɔ̀ɔ̀ri dɛ̀ɛ̀ kó dimɑ̀ɑ̀ tu timɔ́mmɔnti nti kɛ síɛ́,

ku tɑnnɔ̀ í ceeri.

8 Yɛ̀ fìíkúmu sɑ̃́ɑ̃̀, yɛ̀ í yóó ceetɛ,

yɛ̀ tu timɔ́mmɔnti nti kɛ síɛ́.

9 Kuù dontɛ́ ku nìtìbɛ̀,

kɛ bɛ̀ dɔ̀ɔ̀nɛ̀ mɛtɑummɛ̀ kɛ̀ mɛ̀ bo sɑ̃́ɑ̃̀.

Kù dò mpɑ́íí nwe, kɛ duò tikɔ̃m̀bùɔ̀tì.

10 A bo ndémɛ̀ Kuyie ndɛɛ̀ tu mɛciì nkó diketírì,

bɛ̀ɛ̀ dɔ̀ɔ̀ri mɛmmɛ bɛ̀ mɔ̀kɛ mɛyɛ̀mmɛ̀ mmɛ.

Kuyie nhɑ sɑ̃nni bomu nsɑ̃́ɑ̃̀.