13
O Izrael ela zňičimen vaš leskro modlarstvo
1 Sar o Efrajim vakerelas, o manuša izdranas;
sas barardo andro Izrael,
ale kerďa o binos le Baaloha a muľa.
2 Ale the akana mek furt keren o bini
a keren peske o trastune modli;
o modli šukares kerde le rupestar,
savore hine e buči le majstroskri.
Vakerel pes pal lende:
„On obetinen le manušen* 13,2 Abo: o manuša, so obetinen a čumiden le gurumňoren!“
3 Vašoda našľona sar e tosarutňi chmara,
našľona sig sar e rosa,
sar o phus, so hino odphurdlo andral o humnos,
abo sar o thuv, so džal avri prekal e oblaka.
4 „Ale me som o RAJ, tiro Del,
savo tut iľa avri andral o Egipt.
Na viznavineha avre devles, ča man;
ňisavo aver zachrancas nane, ča me!
5 Starinavas man pal tu pre pušťa,
andre avrišuki phuv.
6 Sar len davas te chal, čaľile;
čaľile a lengro jilo ačhiľa barikano,
vašoda pre ma bisterde.
7 Avke prekal lende avava sar o ľevos,
sar o leopardos, so užarel paš o drom.
8 Chučava pre lende sar e medveďica, savake ile le ciknen;
rozčhingerava lenge e hruďa
a chava len sar e ľevica –
o dziva džviri len čhingerena pro kotora.
9 Kada hin tiro koňec, Izraelona,
bo džas pre mande – pre oda, ko tuke šaj pomožinel.
10 Kaj hino tiro kraľis,
hoj tut te zachraňinel andre savore tire fori?
Kaj hine tire vladara, saven tuke mangehas:
‚De man kraľis the vladaren!‘?
11 Avke tut diňom choľaha kraľis
a choľaha les tutar iľom het.
O RAJ imar na odlela o sudos pal o Izrael
12 E vina le Efrajimoskri hiňi zapisimen andro zvitkos
a o trestos hino pripravimen vaš leskro binos.
13 Avle pre leste o dukha sar pre khabňi džuvľi,
ale ov nane o goďaver čhavo,
bo sar avel o časos te uľol,
ov na kamel te avel avri andral la dakro per.
14 Cinava kale manušen avri andral e zor le Šeoloskri† 13,14 Oda hin o than, kaj hine o mule.?
Cinava len avri andral o meriben?
Kaj hin tire rani, ó meriben?
Kaj hin tiro trňos, ó Šeol?
Imar mange na ela pharo vaš tumenge!
15 Kajte o Izrael kvitňisaľol maškar o phrala,
avela e vichodno balvaj, e balvaj le RAJESTAR,
a phurdela la pušťatar;
avke leskre prameňa šučona avri
a andre leskri chaňig našľola o paňi.
Odi balvaj lestar lela savore vzacna veci.“