O Žalmos 36
1 Oleske, ko ľidžal o bašaviben. Le RAJESKRE služobňikostar le Davidostar.
2 O nalačho manuš šunel, so leske phenel o binos andro jilo,
a nane andre leste ňisavi dar le Devlestar.
3 Igen but peske pal peste gondoľinel,
vašoda na udžanel peskro binos a na odsudzinel les.
4 O lava andral leskro muj hin ča o nalačhipen the o klamišagos;
preačhiľa te kerel goďaha the mištes.
5 Pre peskro hadžos gondoľinel avri o nalačhipen,
mukľa pes pro nalačhe droma
a na odphenel le nalačhipnaske.
6 RAJEJA, tiro verno kamiben dodžal dži o ňebos
a tiri vernosť dži o chmari.
7 Tiro spravodľišagos hin sar o nekučeder verchi,
tire sudi sar le moroskre hlbini.
RAJEJA, starines tut pal o manuša the pal o džviri.
8 Savo vzacno hin tiro verno kamiben, Devla!
Savore manuša pes garuven andro ciňos tire kridlengro.
9 Čaľaren pes le pherdo chabenenca andral tiro kher,
des lenge te pijel andral o paňi tire lačhipnastar.
10 Tu sal o prameňis le dživipnaskro;
andre tiro švetlos dikhas o švetlos.
11 Ma preačh te del tiro verno kamiben olen, ko tut džanen,
the tiro spravodľišagos olen, ko hine čače andro jile.
12 Te na uštarel pre ma o pindro le barikaneskro
a te na man tradel het o vast le nalačhe manušeskro.
13 Dikh, sar pele ola, ko keren o nalačhipen;
sas čhide tele a našťi ušťen upre!