3
E Rurema, uyimukage, gira ungize
1 Izaburi ya Dahudi, ku kyanya akatibita mugala wage Habusalumu.
2 E Nahano, abagoma baani bakoli luguusiri,
banakola mu yiji ndeera.
3 Kwo bali bingi, bagweti bagambonyoleza, ti:
«Honyo! Si Rurema atâye múkize!»
4 E Nahano, kundu kwokwo, we siribo yani.
Ee! We gweti ugambiika mwoꞌbulangashane, iri unanguza.
5 Ikyanya ndi mu lira imbere lyawe,
uli mu njuvya ukulyoka ku mugazi gwawe mutaluule.
6 Bwo Nahano ayamiri andaaziri,
ndi mu gwejera, ninayami toola iro lyeꞌkimbodooto.
Na ha nyuma, na njubi vyuka.
7 Kundu ngoli zungulusirwi neꞌbinoono byaꞌbagoma,
ndaakyo kyoba nyuvwiti.
8 E Rurema Nahamwitu, uyimukage maashi, gira ungize.
Abagoma baani, we mu bangomoolera mu migeka.
Ee! Banangora-mabi, we mu bahoohola amiino.
9 E Nahano, we mu kiza abandu baawe.
Kwokwo, ukizi bagashaanira.