20
Ikyanya ugalonga amakuba, Nahano akizi kutabaala
1 Imwoꞌmwimangizi waꞌbimbi. Izaburi ya Dahudi.
2 Ikyanya ugalonga amakuba, Nahano akizi kutabaala.
Ee! Iziina lya Rurema wa Yakobo, likizi kulanga.
3 Akizi kutumira ubutabaazi, ukulyoka mu nyumba yage nyeeru.
Akizi na kusikamya ukulyoka ku mugazi Sayuni.
4 Amatuulo gooshi go watanga, akizi gakengeera,
kiri naꞌmatuulo gaawe goꞌkusiriiza.
5 Ikyanya ugakizi yifwija igambo mu mutima gwawe, akizi kuheereza lyo.
Ishungi zaawe zooshi, akizi zigenduusa.
6 Ikyanya ugaahima, tugakizi banda utubuuli ku busiime, awi yiyi yiyi!
Tunashonie niꞌrembera, hiꞌgulu liꞌziina lya Rurema witu.
Ngiisi byo ugakizi huuna Nahano, akizi kuheereza byo.
7 Bwo Nahano keera akatoolaga umwami,
anamúshiiga amavuta, nyiji kwo aganamúkiza.
Ee ma! Agamúshuvya ukulyoka mwiꞌgulu, Ahandu Heeru.
Na mu kumúkiza, agakoleesa ubushobozi bwage.
8 Bandu baguma, bakoli biisiri umulangaaliro ku magaare giꞌzibo.
Abandi, bali mu gubiika ku fwarasi.
Haliko twehe, tuli mu gubiika imwa Rurema Nahamwitu.
9 Yabo bandi, bagasiitara ngana, banayibumbulike haashi.
Haliko twehe, tugayimuka, tunabe tuki sikamiri.
10 E Nahano, ukizi gashaanira mwami, halinde ahime.
Ikyanya tugakizi kutabaaza, ukizi tushuvya.