29
Rurema akizi haabwa ubulangashane
1 Izaburi ya Dahudi.
E baganda ba mwiꞌgulu, mweshi mukizi huuza Nahano!
Mukizi múhuuza hiꞌgulu lyoꞌbulangashane bwage noꞌbushobozi bwage.
2 Mukizi huuza Nahano,
bwiꞌziina lyage likwaniini ukulonga ubulangashane.
Munakizi múhuuza, bwo ali mweru bweneene.
3 Izu lya Nahano Rurema, liri mu yuvwikana ku miiji.
Na bwo ali mwoꞌbulangashane, ali mu kizi kungula.
Ee! Ali mu kizi kungula hiꞌgulu lyeꞌnyaaja.
4 Yiryo izu lyage, liri noꞌbushobozi bweneene,
linali lya kahebuuza.
5 Izu lya Nahano liri mu koona ibiti byeꞌmyerezi.
Irya munda i Lebanooni, agweti agabijajagula-jajagula.
6 Agweti agasimbusa-simbusa imigazi yeꞌLebanooni,
nga nyana iri mu ganga.
Agweti agasimbusa-simbusa umugazi Herimooni nga mwana weꞌmbogo.
7 Yiryo izu lya Nahano, ligweti ligalavya bweneene,
8 linali mu juguuvya ishamba.
Ee! Agweti agajuguuvya ishamba lyeꞌKadeeshi.
9 Yiryo izu lya Nahano, ligweti ligarandura ibiti byeꞌmikamba.
Liri mu shooshola ibiti byoshi mu lubako.
Booshi mu nyumba yage bagweti bagaadeta kwokuno:
«Rurema akizi haabwa ubulangashane!»
10 Nahano atwaziri hiꞌgulu lyoꞌmwijulire.
Yenyene alyagagi mwami, anatwaziri imyaka neꞌmyakuula.
11 Nahano agweti agatabaala abandu baage, gira babe bihagarusi.
Anali mu bagashaanira mu kati koꞌmutuula!