79
Uyijage duba, utubonere ulukogo
1 Izaburi ya Hasafu.
E Rurema, ibinyamahanga keera bikateera ikihugo kyawe,
byanayulubaza kiri neꞌnyumba yawe ndaluule.
Akaaya kooshi keꞌYerusaleemu, kakoli ba mushaka.
2 Ibirunda byaꞌbakozi baawe, bikola mu jojomolwa noꞌtunyuni,
binakola mu liibwa na barumungu.
3 Na bwo ndaaye woꞌkubaziika, bakola mu bolera i bulambo.
Umuko gwaꞌbandu gwâli kizi golomba mu Yerusaleemu nga nyiiji.
4 Buno, yibyo binyamahanga, bikiri mu tuhonyoleza, wa honyo.
Bikiri mu tuhonyoleza, iri binatushekeereza.
5 E Nahano, ka ugayama uturakariiri halinde imyaka neꞌmyakuula?
Uluugi lwawe lugagenderera ukuyaka halinde mangoki?
6 Yubwo buraakari bwawe, ubuyonerage ku binyamahanga.
Si boohe, batagweti bagakutwaza.
Yago maami ágatasimbahiri iziina lyawe,
gabe go ugakizi rakarira.
7 Mukuba, keera bakamirangusa abandu baawe Abahisiraheeri,
banashereeza neꞌkihugo kyabo.
8 Bashokuluza biitu, bâli kizi yifunda mu byaha.
Kundu kwokwo, tutali twe tukwaniini ukuhanwa.
Yoho wee! Si tukoli vunisiri imitima.
Aaho! Uyijage duba, utubonere ulukogo.
9 E Rurema, Lukiza witu, ututabaale, we kongwa,
halinde wenyene ukizi gingikwa.
Utukoge ibyaha biitu, unatuguluule,
halinde iziina lyawe likizi yivugwa.
10 E Rurema, ibinyamahanga keera byayona umuko gwaꞌbakozi baawe.
Aahago! Kituma kiki wangaki leka kwo bikizi tuhonyoleza ti:
«Rurema winyu alyagagi hayi?»
E Rurema, utuyereke ngiisi kwo ugayihoola ibinyamahanga.
11 Ukizi yuvwiriza amalira gaꞌbashweke.
Ee! Yabo bashweke, kundu bakatwirwa ulubaaja lwoꞌkuyitwa,
haliko ubakizagye ku bukalage bwawe buhamu.
12 E Nahano, yibyo binyamahanga kwo bituzungulusiri, ikyanya biri mu kizi kutuka,
ubihaniirize ubugira kalinda.
13 Twe bandu baawe, tuli bibuzi bya mu ndagiriro yawe.
Tugakizi kuyivuga imyaka neꞌmyakuula,
halinde ku bibusi byoshi.