99
Nahano ali mwami
1 Nahano, ye mwami,
anabwatiiri ha kati ka bamakerubi.
Kwokwo, abandu beꞌmilala yoshi bakizi juguma.
Bakizi lenga mwoꞌmusisi hooshi mu kihugo.
2 Mu kaaya keꞌSayuni, Nahano ye mukulu.
Kiri na mu mahanga, ye sumbiri bweneene abandi booshi.
3 E Nahano, yabo booshi bakizi yivuga iziina lyawe.
Mukuba, liri likulu, linali lya kahebuuza, linali lyeru bweneene.
4 E mwami, uli mu ba kihagange, unakuuziri ukuli.
Mu Bahisiraheeri, we keera ukasikamya íbikwaniini,
unagweti ugaagira íbikwaniini mu kati koꞌkuli.
5 Rurema Nahamwitu, ali mweru bweneene.
Kwokwo, mukizi fukama imbere lyage, iri munamúhuuza.
6 Musa na Harooni, bâli riiri mu bagingi baage.
Samweri naye, âli mu bandu ábâli kizi mútabaaza.
Neꞌkyanya Abahisiraheeri bâli kizi mútabaaza ku malira,
anakizi bashuvya.
7 Âli kizi baganuuza mu nguliro yeꞌkibungu.
Neꞌkyanya akabaheereza imaaja, banakizi zikulikira.
8 E Rurema, Nahamwitu, ikyanya abandu baawe bâli kizi kutabaaza,
wanakizi bashuvya, wanakizi bakoga.
Haliko, ikyanya bâli kizi gira amabi, wanakizi bahana.
9 Mukizi huuza Rurema Nahamwitu.
Ee! Mukizi múyikumba ku mugazi gwage mutaluule.
Mukuba, Rurema Nahamwitu ali mweru bweneene.