112
Bahiriirwi ngiisi ábasimbahiri Nahano
1 Tukizi huuza Nahano!
Bahiriirwi ngiisi ábasimbahiri Nahano,
banasimbahiri neꞌmaaja zaage.
2 Abaana baabo bagakizi ba bikalage mu kihugo,
banabe bagashaniirwi.
3 Imikolezi yabo miija, igakizi genderera, halinde imyaka neꞌmyakuula.
Neꞌnyumba zaabo, zigakizi lundwa mwaꞌkanyabungaka keꞌbindu.
4 Yabo bandu boꞌkuli, kundu bangaba bakola mu kihulu,
haliko, umulengeerwe gugakizi batanguulira.
Bagweti bagakizi tabaalana, banali mu gashanirana,
banali mu yuvwiranwa indengeerwa.
5 Ee! Yabo bandu, bali mu shagaluka,
banali mu kaabana, buzira kuhuuna ubunguke.
Bali mu ba bakulikiriziizi ukuli.
Kyo kitumiri bagakizi gashaanirwa.
6 Ku kasiisa, abandu boꞌkuli batâye kakazibwe.
Si bayamiri bakengiirwi imyaka neꞌmyakuula!
7 Yabo bandu batayobohiri, mbu bangayiji kangwa neꞌmyazi mibi.
Si imitima yabo isikamiri, inabiisiri Nahano kwoꞌmulangaaliro.
8 Ee! Bweꞌmitima yabo isikamiri, batayobohiri.
Na hagaatama, bagaabona ngiisi kwaꞌbagoma baabo bagaahimwa.
9 Yabo bandu, bali mu kizi tabaala abakeni ku mutima úgushenguusiri,
banayamiri bakulikiiri íbikwaniini, halinde imyaka neꞌmyakuula.
Kinatume bagagingikwa bweneene.* 112.9 2 Bakorindo 9.9.
10 Si balya banangora-mabi, ikyanya bagaabona kwokwo,
bagayagalwa, banakizi shya amiino ku bute, bakabuli nyerera.
Ee! Yabo banangora-mabi, ngiisi byo bagweti bagayifwija, batâye bilonge.