122
Akaaya keꞌYerusaleemu, mukizi kahuunira
1 Izaburi ya Dahudi. Luli mu yimbwa na ábali mu zamuukira i Yerusaleemu.
Ikyanya nꞌgabwirwa kwo tugendage ha nyumba ya Nahano,
nanashambaala ngana-ngana.
2 E Yerusaleemu, tukoli yimaaziri ha miryango yeꞌnzitiro zaawe.
3 Akaaya keꞌYerusaleemu, ngiisi kwo kakayubakwa,
inyumba ziyegeriini.
4 Imilala yaꞌBahisiraheeri, haaho ho bali mu zamuukira,
gira bagendi huuza iziina lya Nahano.
Iyo migeeza, Abahisiraheeri bakoli gihaabirwi.
5 Abandu ba mwiꞌkondo lya mwami Dahudi,
haaho, ho bateresiri ibitumbi byoꞌkutwira kweꞌmaaja.
6 Yako kaaya keꞌYerusaleemu, mukizi kahuunira umutuula,
munadete kwokuno: «Ngiisi ábakukuuziri, bakizi langwa bwija.
7 Mu kati keꞌnzitiro zaawe, mukizi ba umutuula.
Na mu nyumba zaawe nzitire,
abandu bakizi langwa mwo bwija.
8 E kaaya keꞌYerusaleemu, hiꞌgulu lya beene witu naꞌbiira biitu,
ngakizi deta kwo ukizi ba mwoꞌmutuula.
9 E Yerusaleemu, mu mwawe, mwo muli inyumba ya Rurema Nahamwitu.
Kwokwo, ndoziizi kwo ukizi genduukirwa.»