142
Dahudi atabaaza Nahano
1 Izaburi ya Dahudi, ku kyanya âli bishamiri mu lwala, anatabaaza Rurema.
2 Ngweti ngalirira Nahano kwiꞌzu lihamu,
gira anyuvwirwe indengeerwa.
3 Na ndi mu múyereka amalibu gaani,
ngiisi kwo ngoli goozirwi.
4 Ngiisi ho ndi mu lenga,
abagoma bali mu gwanwa bambiikira heꞌmitego.
Kundu kwokwo, ikyanya ngoli yihebwiri,
wenyene uyiji injira yo ngwaniini ukufuuka mwo.
5 Ngweti ngalooza woꞌkuyiji ndabaala,
haliko, ndaaye úndwaziizi.
Ndaanaye úli mu mbahala, ndaanaho nangatibitira.
6 E Nahano, we kongwa, ngweti ngakulirira kwokuno:
«Wehe we butibitiro bwani.
Ikyanya ngiri mugumaana, wehe naaho, we ndoziizi.»
7 Buno, keera najagabuka.
Aaho! Ukizi yuvwa ngiisi kwo ndi mu lira.
Balya bagoma baani, bakoli mbimiri imisi.
E maashi! Ubangize mwo.
8 Undyose mwiꞌno nyumba yeꞌmbohe,
lyo ndonga ukukizi huuza iziina lyawe.
Haaho ngiisi ábakwaniini, bagaaba banzokaniini,
mu kubona amiija mingi go wangirira.