146
Ngakizi huuza Rurema
1 Tukizi huuza Nahano!
Ngakizi huuza Nahano ku mutima gwani gwoshi,
2 kiri na mu burambe bwani bwoshi.
Ku kyanya ngaaba ngiri ho,
ngakizi yimbira Rurema wani inyimbo zoꞌbwivuge.
3 Mutakizi biika umulangaaliro ku batwali.
Si boohe, bali ba kufwa naaho, batanâye kize!
4 Ikyanya bali mu fwagaga, bali mu yami galukira mu luvu.
Ku lwolwo lusiku, ngiisi byo batáshungisiri,
binayami fwa ubusha.
5 Ahiriirwi ngiisi úgweti úgakizi longa ubutabaazi imwa Rurema wa Yakobo,
anabe amúbiisiri kwoꞌmulangaaliro.
Yoyo, ye Rurema Nahamwabo.
6 Nahano akabumba igulu, neꞌkihugo, neꞌnyaaja, na byoshi íbibiri mwo.
Anayamiri ali mwemeera, halinde imyaka neꞌmyakuula.
7 Ngiisi ábakandamiirwi, ali mu kizi baheereza íbibakwaniini.
Na ngiisi ábashalisiri, ali mu baheereza ibyokulya.
Na ábashwesirwi mu mbohe, ali mu bashwekuula.
8 Na ábahumiri, ali mu bahumuula.
Na ábayinamiri, ali mu bayinamula.
Ngiisi ábakwaniini imbere lyage, ali mu ba abakuuziri.
9 Nahano ali mu kizi tanduula ábalyosiri i mahanga.
Anali mu tabaala neꞌfuuvi, na banamufwiri.
Si abandu babi boohe, kundu bashungisiri amabi,
ali mu bahangirira.
10 E bandu beꞌSayuni, Rurema Nahamwinyu ayamiri
atwaziri imyaka neꞌmyakuula, halinde mu bibusi byoshi.
Tukizi huuza Nahano!