1 Una kum bungbung ra, a king Erod i tulu a kum tene inaim, sur det in dat pas ara taro tagun a taro na lotu, sur din banlaulau det. 2 I itula sur din tau doko o Jems, a tisin o Jon, namin totok na inaim. 3 I tama i lena a taro Juda, det gas nama minatin o Jems, ra i dat pas o Pita bulung una ra bung epotor tan a kum lamlabino bung na lotu na beret ra kalako is uni. 4 Ra i sa dat pas o Pita, i uruk tari una karabus. Ra a noino ma wonom na tene inaim det tamtamabati. Det ukukeles, a wat det munung numur a wat det bulung i lenkutra. O Erod i nemi sur in ben pirso i sur din warkurai i umatan a taro, numur tana kum lamlabino bung na lotu na Wanlakai. 5 Ikut ra o Pita i kis una karabus, a taro na lotu rop ka det mana nama niaring torom o God suri.

6 Una mirum, numugu tana bung ra o Erod in ben pat o Pita sur a warkurai, o Pita i inep epotor tana ru tene inaim. Det sa ker tari nama ru sen. Ma a ramano kum tene inaim kai, det tur una matansako ma det tamtamabat a karabus. 7 A ensel anun a Labino i wanpat kisin toromi, ma a talapor i utalapor a balano rumu na karabus. I rapus wangun o Pita una paporino, ra i watungi tano lena, “Un katutur lakit!” Ra aru sen der tapalos gusun aru lamano. 8 Ra a ensel i watungi tano lena, “Un emar pas, ma un pas pas anum aru su.” Ra o Pita i pami lenutra. Ma a ensel i watungi tano lena, “Un ubek pas anum a saket, ma un mur iau.” 9 Ra o Pita i mur pirso i gusun a karabus. Ikut i nuki lena a utna ri a ensel i pami, ausur a lingmulusino. I nuki lena i tama a tamtama kut. 10 Der wan sakit ru a mugano tene tamtamabat, ra der wan sakiti bulung a murmurino. Numur der wanpat una matansako na aen, ra di ser pirpirso uni unago utamon. Der tur tiro iai, ra a matansako i papos oros kut, ma der pirso. Ra der wanpat una nubual ra a kisapi i wan susuaro iai, a ensel i rorom mut gusuni.

11 Numur a nuknukin o Pita i talapor pat, ra i watungi lena, “A tasman mulusi lena a Labino i tulu ru anun a ensel, ra i sa ulaun pas iau gusun a laman o Erod, ma gusun a kum utna ra a taro Juda det nem na pami un iau.”

12 Ra i sa tasman lele i lena i sa langolango, i wan sur a rumu anun o Maria, a nan o Jon ra ara risano kai o Mak. A susut na taro det kis tomo tiro iai, ra det wararing. 13 O Pita i pinpidik una matansako, ra ara tultul a toraro, a risano o Roda, i kalabor sur in tonok tiro una matansako. 14 Ra i longoro lele pas in nalngan o Pita, i gas. Ra una nun a gasgas, ke papos mo, i kalabor melet, ma i inanos det lena, “O Pita kuri mukut i tur taru una matansako.” 15 Ra det watungi tano lena, “U lai, u longlong?” Ma i pul det kut lena, “I lingmulus ut, kuri kut i upiso.” Ra det watungi lena, “Kutiro anun a ensel kut mira.” 16 Ikut o Pita i pinpidik liklik kut. Ra det papos saro pasi, det tama i maragom, ra det kisin uni. 17 Ra i turbat det nama lamano, sur det in kis wowowon. Numur i inanos det una pinapam anun a Labino ra i ben petlan pirso pasi gusun a karabus. Ma i watungi lena, “Mot in inanos o Jems ma det, ra dat tar tistisino una nurnur, una utna ri.” Ra i wan gusun det sur ara tamon gisen.

18 Ra una kobot, a kum tene inaim det sisio sur o Pita, ma a nuknukin det i talara lena, “Awai mi uniri?” 19 Ra o Erod i longoro i lena, o Pita ke kis mo una karabus, i itula sur det in sisio suri. Ikut ka det sio pasi. Numur i tikin wakak a taro na inaim ra det tamtamabat una karabus, ma i itula sur din um doko det. Numur o Erod i wan tagitiro una papor Judia utong o Sisaria, sur in kis pas munung tong iai.

20 O Erod i kankan torom a taro tagun aru tamon, o Tair ma o Saidon. Ra a taro tagun aru tamon ra, det wan tomo sur det in tama i, ma det in saringi sur a malmal. Uni anundet aru tamon det laun kut nama utna na inangon, tagun a papor anun a king Erod. Det emarom mugu pas nam o Blastus, a labino tene tamtamabat anun a king, ra i warut det sur det in tama a king.

21 Una bung ra o Erod i kubus tari tandet, i emar pas nama kum malu na king, ma i kis taru una kiskis na king, ra i wasiso torom a taro. 22 A taro det kukukuk nama gasgas lena, “In nalngan ara god kut ri, ausur a musano.” 23 Uniutra, a ensel anun a Labino i umi, uni i madek a taro det watung ulabo pasi, ikut, i ut ke ulabo pas o God. Ra a kum suisui det wan a pinino, ra i mat.

24 Ikut a wasiso anun o God i lubung, ma i wan sarara una susut na tamon.

25 O Sol ma o Banabas der urop anunder a pinapam sapat o Jerusalem, ra der milet melet utong o Antiok. Der ben pas o Jon, ara risano kai o Mak, ra detul wan tomo.