46
Yakobo Ugunina Nukusi Si Niya Itifita
1 Eketa Yakobo, yota kana wava kana vinuwa Isineni, ugunina nukusi si vikukuwayauna Itifita fasinei. Eketa tovanama si nemiya Biyasiba, yomuyomu i vibwanaoseisiya amana Aisake yana Guyau nenei. 2 Na nuwabunanama nenei Guyau kenokitai i iyaviya i bwaduwa, “Yakobo! Yakobo!”
Eketa i vinowaniya, “Iyau weka.”
3 Eketa Guyau i bwaduwa, “Iyau Guyau, amau yana Guyau. Muka kuna matuta ku niniya Itifita fasinei, uḡuna noko menaninama nenei susukwau ana givinakasiya. 4 Iyau nukusi tana sobuwa Itifita eatu yawane yota susukwau nukusi ana makavinimiya nofemai. Eatu kwaḡa o natuu Yosefa nimanei kuna vidawana.”
5 Eketa waganusonisima tufomu i vininitisiya nenesiyai Yakobo natunatuna si totoiya yota kakawasi keta natunatusi, eketa menana Biyasiba si teweiya. 6-7 Bunanige 7:15Yota yasi yomuyomu be kukuwa matatafuna Kenani nenei kasi fwasimowai i kikinomana, nukusi si niisiya Itifita. Yakobo i misiniya natunatuna namoḡa be vivine keta yota waḡawaḡana nukusi.
Yakobo Ugunina Nukusi Si Kikinomana Itifita
28 Yakobo Yuda i visimeiya i venuviketanuna Yosefa ina matakawiya vitana fafani Goseni nenei sina vikaninisaḡa. Tovanama si kikinomana nokomai, 29 Yosefa yana aviya kana waganusoni si gidewadewiya keta i niya Goseni, amana i venufotefotiya. Tovanama amana i kitiya, i nusiya keta i bwediiya matanubwayouna. 30 Keta Yakobo Yosefa i iyaviya i bwaduwa, “Kimoki gewa naki tauku matakuwai tafakaiu a kitiya na yawasiu, eyo muniyai kana nufota ina kakavikuwa.”